Norwégiye parlaméntida “Uyghur dostluq guruppisi” qurushning tunji qedimi bésildi

Norwégiye Uyghur komitétining yéngi nöwetlik rehberliri ikki aydin buyan toxtimay tirishchanliq körsitish netijiside 21-séntebir küni norwégiye parlaméntida “Uyghur dostluq guruppisi” qurushning tunji qedimini muweppeqiyetlik basti.

Norwégiye Uyghur komitétining bildürüshiche, bu yil élip bérilghan saylamdin kéyin jem'iyetning yéngi nöwetlik re'is we hey'et ezaliri norwégiyediki herqaysi asasliq partiyeler bilen alaqe ornitishqa tirishqan. Üzlüksiz türde élip bérilghan uchrishish we di'aloglar netijiside Uyghurlarni qollaydighan norwégiyediki bir qisim partiyeler bilen dostane munasiwet ornatqan.

Norwégiye Uyghur komitétining ilgiri sürüshiche, ular tunji bolup körüshken we dostluq ornatqan partiye - norwégiye sotsiyalist solchillar partiyesi iken. Igilinishiche, bu partiye norwégiyede ochuq - ashkara halda xitaydiki kishilik hoquq mesilisini tenqid qiliwatqan we uni xelq'arada küntertipke qoyushni teshebbus qilip kéliwatqan partiyelerning biri iken.

Norwégiye parlaméntida “Uyghur dostluq guruppisi” qurushni emelge ashurush ishi norwégiye Uyghur komitétining uzundin buyan tirishchanliq körsitip kéliwatqan pilanlirining bir iken shundaqla norwégiye Uyghur komitétining yéngi nöwetlik rehberliki bu qétimliq saylamda emelge ashurushqa wede bergen xizmet nishanlirining biri iken.

Igilinishiche, 9-ayning 21-küni norwégiye Uyghur komitétining re'isi bextiyar ömer, komitétning hey'et ezaliridin semet abla we perhat yaquplar norwégiye parlaméntida sotsiyalist solchilar partiyesining wekili nikolas wilkinson ependi bilen körüshken.

Nikolas wilkinson ependi bu qétimliq körüshüshte özining bir parlamént ezasi bolush süpiti bilen bundin kéyin norwégiye Uyghur komitéti bilen bolghan dostluqni kücheytidighanliqi we “Uyghur dostluq guruppisi” ning qurulushi üchün küch chiqiridighanliqini bildürgen.

Norwégiye Uyghur komitétining re'isi bextiyar ömer ependi bu munasiwet bilen ziyaritimizni qobul qildi. U, norwégiye parlaméntidiki bu qétimliq uchrishishta Uyghurlarning öz wetinide duch kéliwatqan derijidin tashqiri zulum we bésimlar toghriliq tepsiliy chüshenche bergenlikini bildürdi. Shuning bilen birge yene norwégiyediki Uyghur jama'itining ehwali heqqidimu chüshenche bergenlikini ilgiri sürdi.

Norwégiye Uyghur komitétining sabiq re'isi we yéngi nöwetlik komitétning hey'et ezasi semet abla ependimu ziyaritimizni qobul qilip, norwégiye parlaméntida “Uyghur dostluq guruppisi” ni qurush ishining norwégiye Uyghur komitétining bundin kéyinki eng muhim xizmet nishanlirining biri ikenlikini tekitlidi.

Norwégiye Uyghur komitétining hey'et ezaliridin biri bolghan perhat yaqup ependimu ziyaritimizni qobul qilip, Uyghur teshkilati bilen Uyghur jama'itining üzlüksiz élip barghan tirishchanliqlirining norwégiyede ünüm körsitishke bashlighanliqini tilgha aldi.