Америка икки хитай кишилик һоқуқ паалийәтчисиниң из дерәксиз йоқап кәткәнликидин қайғурмақта

 Америка әлчиханисиниң баянатчиси сузан стевенсонниң әскәртишичә, баш әлчи кларк рандт йеқинда хитай ташқи ишларминистирлиқи әмәлдарлири билән өткүзгән сөһбәттә бейҗиңдики бир йәр асти черкавиниң попи хуа хуйчи вә әйдиз бимарлириниң һоқуқини қоғдиғучи зат ху җяниң аяли зең җинйәнниң из дерәксиз йоқап кетиш вәқәсини оттуриға қойған. Кишилик һоқуқ тәшкилатлириниң әскәртишичә, зең җинйән 8 ‏ - авғуст күни бейҗиң олимпик мусабиқисиниң ечилиш мурасимидин бурун из дерәксиз йоқап кәткән.

Зең җинйән йоқап кетип 3 күндин кейин мәхпий сақчилар хуа хуйчини президент бушниң йәкшәнбилик ибадәткә қатнишидиған черкавға кетиватқанда тутуп кәткән. Баянатчи сузан стевенсон " биз хитай һөкүмитиниң олимпик мәзгилидә кишилик һоқуққа җүмлидин пикир әркинлики вә диний әркинликкә һөрмәт қилиш сәмимийити көрситишкә чақиримиз " дәп тәкитлигән.

Лекин америка, баш әлчисиниң хитай ташқи ишлар министирлиқидики әмәлдарлар билән өткүзгән сөһбитиниң тәпсилий диталлирини ашкарилашни рәт қилған. Кишилик һоқуқ тәшкилатлириниң хитайни олимпик мәзгилидә кишилик һоқуқни, ахбарат әркинликини яхшилаш тоғрисида бәргән вәдисидә турмиди, дәп әйибләватқанлиқи кишиләргә сир әмәс. Лекин хитай бу түрдики тәнқидләрни рәт қилип кәлмәктә иди.

Йеқинда хитай җ х даирилириниң олимпик мәзгилидә намайиш қилиш райони қилип бекиткән бейҗиңдики бир бағчида намайиш қилиш илтимаси сунған бири 74 яш, йәнә бир 77 яшлардики икки момайға әмгәк билән өзгәртиш җазаси бәргәнлики дуня мәтбуатлирида ғулғула қозғиған иди.