Amérika dölet mejliside, xitaydiki diniy erkinlik mesilside yighin ötküzüldi

6‏ - Ayning 20‏ - küni amérika dölet mejliside xitaydiki diniy erkinlik mesilside ötküzülgen yighin'gha alahide teklip bilen qatnashqan, Uyghur milliy herikitining rehbiri we dunya Uyghur qurultiyining re'isi rabiye qadir xanim, "xitay hökümiti Uyghurlarning diniy erkinlikini cheklesh arqiliq ularning milliy kimliki we medeniyitini yoqitishqa tirishiwatidu," dédi.
Muxbirimiz ömer qanat xewiri
2008-06-21
Share

 Amérika dölet mejlisi ezasi we diniy erkinlik xizmet guruppisining re'isi tirnt franks ependining yighini ichish nutqidin kéyin sözge chiqqan rabiye qadir xanim, xitay hökümitining 2008‏ - yilliq olimpik tenheriket yighinigha sahibxaniliq qilish hoquqi béyjinggha bérilgende, kishilik hoquqning weziyitini yaxshilash toghrisida xelq'ara jama'etke bergen wedilirining héchbirige emel qilmighanliqini, bolupmu sherqiy türkistan we tibetke qaratqan siyasiy we diniy bésimini téximu kücheytkenlikini bildürdi.

Sözide, xitay hökümitining 11‏ - séntebir térrorluq weqesidin kéyin, xelq'ara térrorluqqa qarshi urushtin Uyghurlarning milliy herikitini basturush we ularning siyasiy we diniy erkinlikini téximu boghush üchün paydilan'ghanliqini eskertken rabiye qadir xanim, béyjing hökümiti emdi olimpik sewebidin xelq'ara jama'etning diqqiti xitaygha buralghan bir mezgilde, türlük térrorluq hékayiliri toqup chiqip xelq'ara jama'etning kallisida térrorchi Uyghur obrazi yaritishqa tirishiwatidu dédi. U shundaqla xitay da'irilirining béyjing olimpik tenheriket yighinini bahane qilip, yolgha qoyghan bixeterlik tedbirliri pütün sherqiy türkistanni üsti ochuq bir türmige aylandurdi dep, körsetti.

Xitay da'irilirining olimpikke qarshi we béyjing olimpik tenheriket yighini jeryanida térrorluq hujumlar ilip bérishni pilanlighan dégen guman bilen qolgha élin'ghan 65 neper Uyghurni sotlashqa teyyarliniwatqanliqi we bularning az dégende 20 nepirige ölüm jazasi bérilish éhtimalliqi barliqi heqqide xewerler chiqqanliqini eskertken, Uyghur milliy herikitining rehbiri rabiye qadir xanim, amérika hökümiti we xelq'ara jama'etni, olimpik harpisida xitay da'irilirining Uyghurlargha ölüm jazasi bérishining aldini élish üchün, xitay hökümitige bésim ishlitishke chaqirdi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet