Xelq'ara kechürüm teshkilati shiwétsariyini güentanamodiki 3 neper tutqun'gha panahliq bérishke chaqirdi

Xelq'ara kechürüm teshkilati peyshenbe küni shwétsariye hökümitini gu'antanamo arilida 6 yildin béri amérika teripidin tutup turuluwatqan, lékin qobul qilidighan birer dölet chiqsa qoyup bérilishi muqimlashqan 3 neper chet'ellik tutqun'gha panahliq bérishke chaqirdi.
Muxbirimiz erkin xewiri
2008-08-21
Share

 Shwétsariye hökümiti shu küni güentanamodiki bir Uyghur, bir liwiyilik we bir aljiriyilikni mezkur döletke qobul qilish heqqidiki iltimasni tapshuruwalghanliqini étirap qildi.

Roéytérs agéntliqining xewer qilishiche, shwétsariye fédéral köchmenler idarisining emeldari jonas montani " biz bu iltimasni körüp chiqishqa bashliduq, biz buni chet'eldin tapshuruwalghan bashqa panahliq iltimaslirigha qoyulghan shertler buyiche bir terep qilimiz " dep tekitligen.

Xewerde xelq'ara kechürüm teshkilati panahliq bérishke chaqirghan 3 neper tutqunning ichidiki bir Uyghurning ismi tilgha élinmighan, lékin bu kishilerning amérika hökümiti teripidin aqlan'ghan kishiler ikenliki ilgiri sürülgen. Xelq'ara kechürüm teshkilatining köchmenler mesilisi kordinatori graf bu heqtiki bayanatida mundaq deydu": shwétsariye bu 3 kishini qobul qilip, xelq'ara jem'iyetke insanperwerlikni ipadileshning waqti‏ - sa'iti yétip kelgenlikini körsitishi kérek. Biz gu'antanamoning taqilishigha yardem qolimizni sunishimiz lazim."

Bu 3 kishi 11 - séntebir weqesidin kéyin pakistanda qolgha élinip gu'antanamogha yollan'ghan tunji türkümdiki tutqunlar idi. Grafning eskertishiche, amérika da'iriliri bu 3 kishini düshmen jengchisi, dep békitken bolsimu, lékin ular üstidin resmiy sot achmighan. Nöwette gu'antanamoda 265 neper elqa'ide we taliban gumandari tutup turulmaqta.

Amérika dölet mudapi'e ministirliqi bularning ichidiki 80 dek kishini üstidin urush jinayiti sadir qilish bilen eyiblep, sot échishni oylashmaqta iken. Xelq'ara kechürüm teshkilatidiki graf, bu kishilerni gu'antanamodiki mewjüt shara'it astida özlüksiz tutup turushning insanperwerlikke sighmaydighanliqini tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet