Хитай америка ахбарат органлирида ишләватқан пуқралирини хизмитини ташлашқа буйруған

Мухбиримиз җүмә
2020-03-22
Елхәт
Пикир
Share
Принт
«Мухбирларни қоғдаш комитети» ниң хитай ташиқи ишлар министирлиқиниң америка ахбарат органлирида ишләватқан пуқралирини хизмитини ташлашқа буйруғанлиқи һәққидә бәргән баянати. 2020-Йили 20-март.
«Мухбирларни қоғдаш комитети» ниң хитай ташиқи ишлар министирлиқиниң америка ахбарат органлирида ишләватқан пуқралирини хизмитини ташлашқа буйруғанлиқи һәққидә бәргән баянати. 2020-Йили 20-март.
cpj.org

Бейҗиң даирилири американиң хитайда турушлуқ ахбарат органлирида ишләватқан 7 нәпәр хитай пуқрасини хизмитини ташлап чиқип кетишкә буйруған.

«Мухбирларни қоғдаш комитети» ниң җүмә күндики баянатиға қариғанда, хитай ташиқи ишлар министирлиқи қармиқидики шәхсий мулазимәт оргини җүмә вә пәйшәнбә күнлири уқтуруш чиқирип, «ню-йорк вақит» гезити вә «америка авази» қатарлиқ ахбарат органлириниң бейҗиңда турушлуқ идарилиридә хизмәт қиливатқан хәвәр ярдәмчилирини хизмитини ташлашқа буйруған. 

«Мухбирларни қоғдаш комитети» баянатида хитайниң америка ахбарат органлириниң бейҗиңдики хәвәр топлаш хизмитини пүтүнләй битчит қилишқа бәл бағлиған болуши мумкинликни ейтқан. 

‍Уларниң ейтишичә, мәзкур ахбарат органлиридики хитай тиллиқ ярдәмчиләр хәвәр топлаш, издәш вә тәтқиқ қилишта интайин муһим ролларни ойнап кәлгән икән. 

«Америка авази радийоси» хитайниң бу қаттиқ қол васитисиниң мәзкур радийониң хитайдики хәвәр топлаш хизмитигә оңушсизлиқларни елип келидиғанлиқини билдүргән. 

Мәлум болушичә, хитай қанунида чәтәл ахбарат органлириниң хитайдин биваситә хизмәтчи қобул қилиши чәкләнгән болуп, улар хизмәтчи қобул қилишта пәқәт хитай ташқи ишлар министирлиқиға қарашлиқ шәхсий мулазимәт оргиниға тайинишқа мәҗбур икән. 

Хитай һөкүмити 17-март «вал стрет журнили», «вашингтон почтиси» вә «ню-йорк вақит гезити» қатарлиқ ахбарат органлириниң 13 нәпәр мухбирини хитайдин қоғлап чиқарған иди. 

Бу, хитайниң америкилиқ вә чәтәллик мухбирларни тунҗи қетим хитайдин қоғлап чиқириши әмәс. 

Хитай һөкүмити 2015-йили декабирда «бай көмүркан вәқәси» ниң террорлуқ вәқәси әмәсликидә чиң турған франсийәлик мухбир урсула гуйтер ханимни хитайдин қоғлап чиқарған. 

Хитай 2018-йили йәнә «бузфид» тор гезитиниң мухбири мага раҗагопаланниң хитайда ишләш визисини йеңилап бәрмәй, уни хитайдин чиқип кетишкә мәҗбурлиған иди. 

Мага ханим хитайниң уйғурларға қаратқан бастуруш вә тәқибләш сиясити мупәссәл баян қилинған «21-әсирдики сақчи дөлити» намлиқ мақалиси арқилиқ тонулған мухбир иди.

Пикирләр (0)
Share
Толуқ бәт