Хитайниң һәр бир америкилиққа даир йетәрлик санлиқ мәлумат оғрилиғанлиқи мәлум

Мухбиримиз мәмәтҗан җүмә
2021.08.08
Share on WhatsApp
Share on WhatsApp
Америка дөләт хәвпсизлик кеңишиниң сабиқ хитай ишлири директори мат поттингер хитайниң уйғурларға ирқий қирғинчилиқ йүргүзүватқанлиқини тәкитлиди Америка дөләт хәвпсизлик кеңишиниң сабиқ хитай ишлири директори мат поттингер(оттурида) “бир бәлвағ бир йол” мунбириниң ечилиш мурасимида. 2017-Йили 14-май, бейҗиң.
REUTERS

Чаршәнбә күни кеңәш палатаси ахбарат комитетиниң испат аңлаш йиғинида гуваһлиқ бәргән сабиқ америка президенти трампниң муавин дөләт бихәтәрлик мәслиһәтчиси матев поттиңгер хитайниң тор һуҗуми вә башқа васитиләр арқилиқ һәр бир америкилиққа алақидар сәзгүр учурларни оғрилиғанлиқидин агаһландуруш бәргән.

Матев поттиңгерниң билдүрүшичә, хитай америка вә дуня миқясида оғрилиған санлиқ мәлуматларни ишлитип, сиясий рәһбәрләрдин тартип адәттики пуқраларғичә болған барлиқ кишиләргә аит архип турғузалайдикән.

У мундақ дегән: “кишиләр үстидә архип топлаш әзәлдин ленинчә һакимийәтниң бир алаһидилики, әмма бейҗиңниң дуня миқясидики 5G торини өз ичигә алған рәқәмлик торға сиңип кириши һәқиқәтән буни бир йеңи бир балдаққа көтүрди. Шуңа, бу партийә һазир дунядики милйонлиған чәтәл пуқралири үстидин һөҗҗәт топлап, топлиған материялларни тәсир көрситиш, нишанлаш, қорқутуш, мукапатлаш, қақти-соқти қилиш, йүзини төкүш вә ахирида бөлүп бойсундуруш үчүн ишлитәләйду.”

Поттиңгер йәнә мундақ дегән: “бейҗиң даирилири оғрилиған сәзгүр санлиқ мәлуматлар һәр бир америкилиқ қурамиға йәткәнләр вә нурғун балилиримиз үстидин архип тәйярлашқа йетиду, улар бейҗиңниң сиясий уруш қаидиси бойичә бир адил оюн һесаблиниду.”

Поттиңгер йәнә чаршәнбә күни хитайниң аталмиш бирлик сәп бөлүминиң америкиға тәсир көрситиш тиришчанлиқи һәққидиму агаһландуруш бәргән.

Чаршәнбә күни америка кеңәш палатасиниң истихбарат комитетида ечилған испат аңлаш йиғинида хитайниң америкиниң дөләт бихәтәрликигә елип келиватқан тәһдитиниң күнсери күчийиватқанлиқи тәкитлигән.

Кеңәш палатаси истихбарат комитетиниң рәиси марк варнер сөзидә америка җамаитиниң бу тәһдиттин хәвири тепиши керәкликини тәкитләп “адәттә истихбарат комитети очуқ испат аңлаш йиғини ачмайду, әмма муавин рәисимиз марко рубийо вә мән болуватқанлардин америка җамаитиниң хәвири болуши керәк дәп қараймиз” дегән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.