Хитай миллий ишлар комитети: бәзи йәрлик даириләр, аз санлиқ милләтләр сияситини дәпсәндә қилған

 Сәйшәнбә күни, хитай миллий ишлар комитети тәрипидин елан қилинған бир баянатта, " бу йил бәзи йәрлик даириләр, мәркәзниң милләтләр сияситигә хилап, аз санлиқ милләтләрниң һессиятини рәнҗитидиған паалийәтләрни елип бериш арқилиқ улар арисида наразилиқлар келип чиқишиға сәвәб болған" дейилгән.

Хитай миллий ишлар комитетиниң баянатида, мәсилиләрниң аз сандики районларда көрүлгәнлики, лекин әгәр буниң алди елинмиса, башқа районларға кеңийип, җиддий ақивәтләрниң келип чиқишиға сәвәб болидиғанлиқи әскәртилгән.

Мәзкүр комитет йәнә, йәрлик һөкүмәт даирилирини, аз санлиқ милләтләрниң һоқуқини қоғдаш үчүн тәдбир елишқа чақирған.

Лекин, сиясий мулаһизичиләр ниң ейтишичә, хитай һөкүмити аз санлиқ милләт районлиридики мәсилиләр тоғрисида йәрлик һөкүмәтләрни әйибләшниң орниға, мәркәзниң аз санлиқ милләтләргә қаратқан сияситини қайтидин көздин кәчүрүши керәк икән.

Улар, хитай миллий ишлар комитетиниң аз санлиқ милләтләр районлиридики мәсилиләр һәққидики баянатини, мәзкур районларда аз санлиқ милләтләр һоқуқиниң дәпсәндә болуватқанлиқиниң, хитай даирилири тәрипидинму етирап қилинғанлиқ пакити дәп қаримақта.