Хуавей сақчиға "уйғур агаһландуруш сигнали" әвәтәләйдиған сүний идраклиқ назарәт қилиш техникисини тәрәққий қилдурған

Мухбиримиз җүмә
2020-12-13
Share
Хуавей сақчиға Хуавейниң "уйғур агаһландуруш сигнали" системисини тәрәққий қилдурғанлиқи IPVM тәтқиқат оргини тәрипидин байқалған.
Social Media

Бу һәптә ашкариланған һөҗҗәтләрдә көрситишичә, хуавей ширкити чирай сканнерлаш камера системиси арқилиқ сақчиға "уйғур агаһландуруш сигнали" әвәтәләйдиған сүний идраклиқ назарәт қилиш техникисини тәрәққий қилдурушқа қатнашқан.

"вашингтон почтиси" гезитидә көрситишичә, хуавей бу тәқибләш техникилирини он нәччә бихәтәрлик һөддигәрлири билән һәмкарлишип тәрәққий қилдурған болуп, ширкәт сетиш һөҗҗәтлиридә уларниң бәзилири адәмниң миллитини пәрқләндүрәләйду, яки йошурун намайишни бастурушқа ярдәм берәләйду, дәп тәрипләнгән.

Хуавейниң "уйғур агаһландуруш сигнали" системисини тәрәққий қилдурғанлиқи тунҗи болуп, IPVM тәтқиқат оргини тәрипидин байқалған вә "вашингтон почтиси гезити" тәрипидин тунҗи болуп хәвәр қилинған.

Һалбуки, хуавей вәкиллири BBC ға қилған сөзидә, бу һөҗҗәттә "уйғур агаһландуруш сигнали" аталғусиниң ишлитилгәнликини "пүтүнләй қобул қилғили болмайду" дәп рәт қилған вә өз техникисиниң милләтләрни пәрқләндүрүш үчүн лайиһәләнмигәнликини тәкитлигән.

Хәвәргә қариғанда, хуавей вә униң шериклири уйғур аптоном районидики һөкүмәт органлирини бу бир қисим көзитиш мәһсулатлири билән тәминлигән. Буларниң ичидә, үрүмчидә сақчилар ишлитидиған чирай тонуш системиси вә пүткүл райондики ташйолни назарәт қилиш камера системиси қатарлиқлар бар икән.

Вәһаләнки, хуавейниң бу техникиси хәлқарада күчлүк наразилиқ қозғиди. Җүмлидин фирансийә путбол чолпини гриезман хуавей ширкитиниң уйғурларни тәқибләш үчүн техника тәрәққий қилдурғанлиқи сәвәблик хуавей билән болған һәмкарлиқини үзди.

У, пәйшәнбә күни өзиниң "инстаграм" бетигә елан қилған баянатида мундақ деди: "мән бу пурсәттин пайдилинип хуавейни бу әйибләшләрни рәт қилипла қалмай, тездин конкретни һәрикәт қоллинип, бу кәң көләмлик бастурушни әйибләшкә вә өзиниң тәсир күчидин пайдилинип, җәмийәттә кишилик һоқуқ вә аяллар һоқуқиниң һөрмәт қилиниши үчүн төһпә қошушқа чақиримән."

Өткән йили америка сода министирлиқи хуавей вә униң "мәгви", "сәнстайм" қатарлиқ шерикликни уйғурларға қаритилған тәқибләш қурулушиға төһпә қошқанлиқи сәвәблик "қара тизимлик" кә алған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт