Дөлитигә қайталмайватқан түркийә вәтәндиши йәһя қурбанниң арилиқта икки йил лагерда ятқанлиқи ашкариланди

Мухбиримиз шөһрәт һошур
2021-05-18
Share
Дөлитигә қайталмайватқан түркийә вәтәндиши йәһя қурбанниң арилиқта икки йил лагерда ятқанлиқи ашкариланди 45 Йилниң алдида түркийәгә вәтәндаш, йәни пуқра болған йәһя қурбан вә униң түркийә пуқраси аяли аминә қурбан. 2016-Йили үрүмчи.
Photo: RFA

44 Йиллиқ түркийә вәтәндиши йәһя қурбан үрүмчидә тутқун қилинип ана юрти қағилиққа елип кетилгәндин кейин, униң қануний салаһийити һәққидә түркийә һөкүмитиму, униң түркийәдики пәрзәнтлириму учур алалмай келиватқан иди. Роза һейтниң биринчи күни сақчиларниң назарити астида пәрзәнтлири билән өткүзгән видейолуқ сөһбәттә у қизиниң қистап сориши нәтиҗисидә, өзиниң нөвәттә "әркин" икәнлики, "тәрбийәләш" тин 2019-йилиниң ахири чиқип болғанлиқини баян қилиш арқилиқ, өзиниң 2017-йилдин башлап икки йил лагерда ятқанлиқини ашкарилиған.

44 Йиллиқ түркийә вәтәндиши йәһя қурбан аяли билән үрүмчидә тутқун қилинғандин кейин, икки йилға қәдәр уларниң қағилиққа әкитилгәнликидин башқа һиечқандақ учур болмиған. Түркийә ташқий ишлар министирликиму йәһя қурбан вә аяли һәққидә һечқандақ учур алалмиған. Улар2019-йилниң ахиридин башлап түркийәдики пәрзәнтлири билән арилап икки-үч минутчә телефонда сөзлишиш пурситигә игә болған болсиму, әмма улар бу сөһбәттә өзлириниң сақ-саламәтликидин башқа учур берәлмигән.

Бу йил роза һейтниң биринчи күни сақчиларниң назаритидә өткүзүлгән видейолуқ сөһбәттә, йәһя қурбанниң чоң қизи ханқиз қурбан дадисиниң җазамуддитини өтәватқан яки өтимәйватқанлиқини, йәни кесилгән яки кесилмигәнликини қистап сориши нәтиҗисидә, у өзиниң җаза өтимәйватқанлиқи вә "әркин" яшаватқанлиқини билдүргән. У көрүшүштә қизиға өзиниң "тәрбийәләш" тин алиқачан чиқип болғанлиқини баян қилиш арқилиқ өзлириниң арилиқта икки йил лагерда ятқанлиқини ашкарилиған.

Өзиниң 2019-йили 10-айда лагердин чиқип болғанлиқини тилға алған йәһя қурбан, қизиниң уларниң немә үчүн, йәни қандақ бир хаталиқ билән лагерда ятқанлиқи һәққидики соалиға җавап берәлмигән.

Мәлум болушичә, 2017-йили лагер тутқуни башланғанда, ханқиз қурбан ата-анисиниң түркийәгә қайтип келивелишини тәләп қилған. Әмма йәһя қурбан өзиниң түркийә пуқраси икәнликини вә өзигә хәвп йәтмәйдиғанлиқини билдүрүп, пәрзәнтлирини хатирҗәм қилған.

Йәһя қурбан өзиниң лагердин чиқип болғанлиқини билдүргән болсиму, немә үчүндур, йәнила чәклимә ичидә яшаватқанлиқиниң, дөлити түркийәгила әмәс, һәтта үрүчигә беришқиму рухсәт алалмайватқанлиқиниң сәвәбини чүшәндүрүп берәлмигән.

Ханқиз қурбан видейо сөһбити давамида ата-анисини назарәт қилип туруватқан көк кийимлик икки хадимниму көрүп қалған.

Йәһя қурбанниң сөһбәттики баянлиридин мәлум болушичә, улар лагердин чиқип болған, "қарлиқ" намидики бир аилиликләр қоросида олтуруватқан болсиму, әмма улар йәнила назарәт вә чәклимиләрдин қутулуп болалмиған.

Өткән йили мәкит наһийәсидә лагердин чиққанлар үчүн қурулған "14-‏аһалиләр кометити" намидики бир аилиликләр лагериниң барлиқи, бу лагерда мәхсус "тәрбийәләш" тин қоюп берилгәнләрниң орунлаштурулғанлиқи, уларниң аилә әзалири билән бирликтә яшаш һоқуқиға еришкән болсиму, әмма йәнила уруқ-туғқанлири билән ихтияри көрүшүш вә җәмийәткә арилишиш һоқуқи чәкләнгәнлики ашкариланған иди.

Йәһя қурбан вә аяли туруватқан "қарлиқ" қоросуниңму әнә шундақ мәхсус лагердин чиққанлар үчүн қурулған аилиликләр лагери болуши еһтималлиқи оттуриға чиқмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт