Adams (ADAMS) yer shari balilar ramizan pa'aliyitide Uyghur medeniyiti namayan qilindi
2024.02.20
Amérikining wirjiniye shitatidiki musulmanlarning teshkilati- “Adams merkizi” (ADAMS Center) sahibxaniliq qilghan ikkinchi qétimliq adams yer shari balilar ramizan pa'aliyiti 2024-yili 17-féwral shenbe küni ötküzülüp, köp xil medeniyetler namayan qilindi. Bu pa'aliyette wirjiniye we washin'gton shehiri etrapidiki jaylardin kelgen Uyghur baliliri we bashqa musulmanlar we musulman perzentliri jem bolup, ramizan rohini tebriklep özlirining medeniyet nemunilirini körsetti.
Mezkur pa'aliyetler kishini meptun qilidighan qonchaq körgezmisi, medeniyet-sen'et nomurliri we xelq'araliq körgezmilerni öz ichige alghan bolup, bular köpchilikni chongqur hayajan we xushalliq ichige chömdürdi. Pa'aliyet qatnashchiliri yene zamaniwilashqan ramizan baziridiki özgiche öy bézekliri, kiyim-kéchek, islami kitablar we her türlük pa'aliyetlerdinmu huzur aldi. Her xil yémeklik we tatliq türümler bilen tebriklesh pa'aliyiti ramizanning bay medeniyet arqa körünüshi we xushalliqini heqiqiy eks ettürdi.
Bu pa'aliyetke amérika Uyghur birleshmisi bilen wirjiniyediki “Méhriban ana” (Ana Care) ana til mektipi qatnashqan bolup, ular bu pa'aliyette intayin muhim rol oynap, Uyghur medeniyiti, Uyghur en'eniwi kiyim-kéchekliri we dangliq ta'amlar bilen Uyghur kimlikini namayan qildi. Uningdin bashqa yene bu pa'aliyette amérika Uyghur birleshmisi we “Méhriban ana” mektipi yene Uyghur élide xitayning kommunizm idé'ologiyesi we jungxu'a milliti ortaq éngining tesirige uchrap islam dini étiqadini yoqatqan we étiqad erkinlikidin mehrum bolghan, shundaqla Uyghur tilida sözlishi we ma'arip terbiyesi élishi cheklen'gen Uyghur balilirining hazirqi échinishliq ehwalini teswirleydighan tesirlik süretlerni körgezme qilish arqiliq pa'aliyet qatnashquchilirigha shu ré'alliqni chüshendürüp berdi. Bu pa'aliyet, qatnashquchilargha nisbeten Uyghurlarning étiqad erkinliki we medeniyitining boghulushqa uchrawatqanliqi heqqidiki tonushini östürüsh pursiti yaritip bergen.
Bu qétimliq adams merkizining balilar ramizan pa'aliyitide, “Méhriban ana” (Ana Care) mektipining oqughuchiliri janliq ussul nomurliri arqiliq talantini namayan qilip, tamashibinlarning qizghin alqishigha érishti. Bu pa'aliyette gödek Uyghur baliliri yene paratqa qatnashqan bolup, ular güzel Uyghur kiyimlirini we chimen doppilirini kiyip, qollirida her türlük muzika eswabliri, medeniy miras buyumliri we Uyghurlarning dangliq kitablirini kötürüp hem sherqiy türkistan kök bayriqini lepilditip, en'eniwi Uyghur medeniyitini namayan qildi. Bu pa'aliyet jeryanida yene, Uyghur ta'amliridin sangza, samsa we bashqilar heqsiz tarqitildi.
Biz bu pa'aliyet munasiwiti bilen amérika Uyghur birleshmisi re'isi elfidar iltebir xanimni ziyaret qilduq. Elfidar xanim xitayning éghir cheklimilirige duch kelgen Uyghur éli ichidiki Uyghurlargha sélishturghanda, muhajirettiki Uyghurlarning bu muqeddes ayni erkin-azade kütüwalidighanliqini bildürdi.
U yene adams yer shari balilar ramizan pa'aliyitige oxshash pa'aliyetlerning Uyghurlargha ramizan mezgilide medeniyet we diniy kimlikini qoghdash hem ipadilesh üchün sehne hazirlap bérish rolini oynighanliqini tekitlidi.
Biz yene bu pa'aliyette aktip rol oynighan bir qanche Uyghur yashni ziyaret qilduq. Ularning biri washin'gtonda aliy mektepte oquwatqan Uyghur qizi asina izgil we wirjiniyede turushluq yash diniy zat enqer haji bolup, ularmu bu qétimliq ramizan pa'aliyitige qatnishishtiki meqsiti heqqide toxtilip ötti.
Yuqiriqi awaz ulinishidin tepsilatini anglighaysiz.