Ottura mektep tarix oqutquchisi yüsüpjan yasin 18 yilliq késiwétilgen

Muxbirimiz shöhret hoshur
2021-12-08
Share
turme-uyghur-siyasiy-mehbus.jpg Türmige élip kiriliwatqan Uyghur siyasiy mehbuslar.
Social Media

Ötken heptidiki anglitishimizda jem'iyette “Ot yürek tarixchi” dep nam alghan ürümchi 23 ‏-ottura mektepning oqutquchisi yüsüpjan yasinning tutqunda ikenliki heqqide xewer bergeniduq. Muxbirimizning ilgirilep élip barghan éniqlashliri dawamida, uning yazghan kitab we sözligen léksiyeliri seweblik 2018 ‏-yilning axiri bölgünchilik bilen eyiblinip 18 yilliq késilip ketkenliki delillendi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Hörmetlik radi'o anglighuchilar, jem'iyette “Ot yürek tarixchi” dep nam alghan oqutquchi yüsüpjan yasin heqqide ürümchidin yollan'ghan bir mektupta, uning 4 yildin buyan iz-déreksiz ghayib ikenliki bayan qilinish bilen birlikte, bu ehwalning yüsüpjanning chet'eldiki dostlirigha bildürülüshi, jümlidin awstraliyede yashawatqan tetqiqatchi we pa'aliyetchi memtimin elagha xewerlendürülüshi hawale qilin'ghan. Memtimin elaning bayan qilishiche, yüsüpjan yasin uning yurtdishi we ottura mekteptiki sawaqdishi bolup, yüsüpjan yasin shinjang uniwérsitétini püttürgendin kéyin bir mezgil 14 ‏-ottura mekteptimu oqutquchi bolghan. Memtimin elaning özi körgen-anglighanlirigha asasen bayan qilishiche, tetqiqatida Uyghur milliy rohini qézish, gewdilendürüsh we urghutush üchün ter aqquzghan yüsüpjan yasin, bu emgekliri seweblik, xitay da'irilirining közige sighmighan we da'iriler uni oqutquchiliq xizmitidin élip tashlap, bir mehel közetchilik wezipisi bilen mektep derwazisigha qaratquzghan. Déyilishiche, yüsüpjan bu jazalinishtin xorluq emes sherep hés qilghan we öz imkani da'iriside ilmiy tetqiqat we terghibat ishliri bilen shughullan'ghan.

Ötken heptidiki éniqlashlirimizda ürümchidiki mektep we ma'arip nazariti xadimliri yüsüpjan yasinning tutqunda ikenlikini ashkarilighan bolsimu, emma uning késilgen-késilmigenliki heqqide melumat bermigenidi. Bügünki éniqlashlirimiz dawamida ürümchi sheherlik baxuliyang saqchixana xadimi yüsüpjan yasinning bölgüchilik teshwiqati bilen shughullandi dep qarilip 18 yilliq késilgenlikini ashkarilidi. Emma, u yüsüpjanning késilishige qaysi kitab yaki léksiyesining seweb bolghanliqini tilgha almidi.

Radiyomizgha kelgen inkasta déyilishiche, yüsüpjan yasin atushning azaq yéza téjen kentide tughulup ösken. Shunga biz, atushning azaq yéziliq saqchixanigha téléfon qilip, yüsüpjan yasinning késim mudditi heqqide özlirining we yüsüpjanning uruq-tughqanlirining xewiri bar-yoqluqini soriduq. Saqchi xadimi yüsüpjan yasinning 18 yilliq késilgenlikini mu'eyyenleshtürüsh bilen birlikte, özlirining bu sot hökümidin téjendiki uruq-tughqanlirini xewerlendürgenlikini bayan qildi.

Tordiki matériyallardin melum bolushiche, yüsüpjan yasinning kitab we léksiyeliri muhajirettiki Uyghurlar arisidimu küchlük qiziqish qozghighan bolup, bezi heweskar diktorlar, uning “Uyghur milliy rohining asasliri” namliq maqalisini oqup tarqatqan.

Yüsüpjan yasin ishtin sirtqi waqitlirida metbu'atlarda, yeni asasliqi tor betliride Uyghur tarixi, milliy rohiyiti mesililiri boyiche köpligen ilmiy maqalilerni yézip élan qilip, jama'etning alqishigha érishkenidi.

Hörmetlik radi'o anglighuchilar, yuqirida “Ot yürek tarixchi” yüsüpjan yasinning yazghan kitabliri seweblik 18 yilliq késilgenlikining delillen'genliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet