១. ចៅអើយគួរគេងគិតនិងកុំ តាមពាក្យបណ្ដាំពីដូនតា
គិតរ៉ាយរ៉ាប់ប្រាប់អាវ៉ា អានអក្ខរាសស្ត្រាស្លឹករឹត។
២. ចៅអើយគួរគេងគិតរំពៃ គួរស្គាល់តម្លៃនៃជីវិត
គួរដឹងរាក់ជ្រៅខុសត្រូវពិត គួរយល់សុចរិត និងបាបកម្ម។
៣. គួរប្រមូលមិត្តកាត់សត្រូវ គួរដើរតាមផ្លូវប្រកាន់ស្ដាំ
គួរដើរគន្លងដូនតាផ្ដាំ គួរត្រាច់ចំណាំមាគ៌ាល្អ។
៤. គួរស្គាល់ឲ្យច្បាស់ពីកិច្ចការ គួរខំឧស្សាហ៍ក្រែងខ្លួនក្រ
គួរប្រុងប្រៀបប្រាណឲ្យបានល្អ គួរកាន់ព្រះធម៌ចិត្តខន្តី។
៥. គេងឲ្យរវៀសរហ័សប្រាណ គេងប្រៀបប្រមាណរឿងវែងខ្លី
គេងស្រណោះពេលមានតម្លៃ គេងស្ដាយវេលាជាមាសប្រាក់។
៦. គេងកល់ខ្នល់ខ្នើយកើយសញ្ជឹង គេងបូកដកចែកលេខអត្ត
គេងស្អែកក្រោកឡើងខំសស្រាក់ គេងត្រាប់កិច្ចការកុំទម្រន់។
៧. គេងនឹកប្រយោជន៍ក្រែងនិរាស គេងខ្លាចគេជៀសលឿនទៅមុន
គេងខ្លាចកិច្ចការថ្លោះស៊យស៊ុន គេងហើយប្រឹងប្រិតពិចារណា។
៨. គេងគូឲ្យជាប់ឲ្យគប្បី គិតវែងគិតខ្លីឲ្យពិស្ដារ
គិតដល់បងប្អូនគិតអាត្មា គិតសព្វប្រការឲ្យបានច្បាស់។
៩. គិតថ្ងៃទៅមុខអនាគត គិតប្រឹងប្រយុទ្ធសម្រាប់ចាស់
គិតទាន់នៅក្មេងកុំឲ្យខ្វះ គិតគ្រប់កិច្ចការកុំឲ្យសល់។
១០. គិតកូនប្រពន្ធខ្ញុំកំដរ គិតអរិយធម៌មានតម្កល់
គិតស្វែងរកធម៌ព្រះបន្ទាល់ គិតហើយសឹមគូណាពុំងារ។
១១. កុំឲ្យហ៊ឺហាក្រែងនាំក្រ កុំឲ្យទុច្ចរិតចិត្តឫស្យា
កុំឲ្យកុហកពាក្យមុសា កុំឲ្យចោលម្សៀតឃ្លាតញាតិមិត្ត។
១២. កុំឲ្យកោងកាចកេងប្រវ័ញ្ច កុំឲ្យកំណាញ់និងទុច្ចរិត
កុំឲ្យសេពគប់ក្រុមទ្រុស្តមិត្ត កុំឲ្យប្រព្រឹត្តអបាយកម្ម។
១៣. កុំភ្លេចសន្សំលុយមាសប្រាក់ កុំភ្លេចពាក្យពេចន៍តាបានផ្ដាំ
កុំភ្លេចឲ្យទានអ្នកឃ្លានញ៉ាំ កុំភ្លេចម្ដាយឪពុកអ្នកមានគុណ៕