ម្ដេច​ឆាប់​ភ្លេច

ដោយ ផេង សូភ័ណ
2013.01.01

១. មក​ដល់​ស្រុក​លិច​ភ្លេច​ស្រុក​កើត    ភ្លេច​ភូមិ​កំណើត​ឆើត​ឧត្ដម
ភ្លេច​វាល​ស្រែ​ស្រូវ​ពណ៌​លឿង​ទុំ    ភ្លេច​យាយ​តា​អ៊ំ​វត្ត​លោក​សង្ឃ។

២. ភ្លេច​ជ្រក​ក្នុង​ខ្ទម​ភ្លៀង​ស្រិចៗ    ភ្លេច​ទាំង​កើត​លិច​រួម​ជើង​ត្បូង
ភ្លេច​បាយ​កញ្ចប់​វេច​ទៅ​ស្ទូង        ភ្លេច​ស្រះ​អណ្ដូង​ធ្លាប់​ដង​ងូត។

៣. ភ្លេច​រដូវ​ភ្ជួរ​នៅ​ដើម​ខែ    ចំប៉្លង​ស្រងែ​នឹង​លំចង់
ដុះ​តាម​ភ្លឺ​ស្រែ​ទឹក​ថ្លាយង់    ក្រឹម​ក្រាញ់​ក្ដាម​ពង​នឹក​មិន​ឃើញ។

៤. ភ្លេច​កាល​រើស​ខ្យង​ក្រោយ​រនាស់    ភ្លេច​អស់​ភ្ជួរ​រាស់​ព្រោះ​សំណាប
ដក​ស្ទូង​បោក​បែន​ខ្ទម​ចាំ​ចាប    ភ្លេច​ផ្ទះ​រនាប​ក្បែរ​មាត់​ទឹក។

៥. ភ្លេច​ចង្កៀង​ខ្លាញ់​ដាក់​ក្នុង​ចាន    ភ្លេច​ពោង​ជើង​ក្រាន​ដោត​មែក​រាំង
ភ្លេច​ប្រហុក​កប់​ម្ជូរ​ក្រសាំង    ភ្លេច​ថា​ទំពាំង​ស្នង​ឫស្សី។

៦. ចេះ ABCភ្លេច​កកា    ភ្លេច​ទាំង​ពាក្យ​ថា​អភ័យទោស
ជាប់​មាត់ SORRYទាំង​ស្រី​ប្រុស    គិត​ថា​ពីរោះ​ជាង​ពាក្យ​ខ្លួន។

៧. ភ្លេច​អស់​សំពះ​ជម្រាប​សួរ        លើក​ដៃ helloជំនួស​វិញ
ភ្លេច​បាទ​ភ្លេច​ចាសyes yesពេញ    ស្ទាត់​ដូច​ទន្ទេញ​ទាំង​ចាស់​ក្មេង។

៨. ភ្លេច​ពាក្យ​អរគុណ​នោះ​ទទេ    ចាំ​តែ​អង់គ្លេសsay thank you
ភ្លេច​ជម្រាប​លា​មីង​អ៊ំ​ពូ        ចាំ​តែ see you ច្បាស់​ជាង​គេ។

៩. ហឺ​គិត​ទៅ​ភ្លេច​អស់​ហើយ​ពាក្យ​ឯង    ពិត​ខ្លាច​ហើយ​ក្រែង​រលាយ​បង់
បាត់​អស់​ព្យញ្ជនៈ​អក្សរ​ផ្ចង់    ​ស្រះ​ពេញតួ​គង់​រលាយ​សូន្យ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។