នាទីវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃអង្គារ ទី២២ ខែតុលា បានពិភាក្សាលើប្រធានបទទាក់ទងនឹងការបោះពុម្ព និងធ្វើចរាចរក្រដាសប្រាក់ថ្មីប្រភេទ ២សែនរៀល របស់រដ្ឋាភិបាលនៃក្រុមគ្រួសារត្រកូល ហ៊ុន។
លោក សម រង្ស៊ី អះអាងថា ការដែលរដ្ឋាភិបាល លោក ហ៊ុន ម៉ាណែត បោះពុម្ពក្រដាសប្រាក់ថ្មីក្នុងតម្លៃប្រមាណ ១ពាន់លានដុល្លារសហរដ្ឋអាមេរិក ដាក់ឱ្យចរាចរពេលនេះ គឺជាសញ្ញាមួយថា សេដ្ឋកិច្ចកម្ពុជាកំពុងតែមានវិបត្តិធ្ងន់ធ្ងរ ដែលអាចធ្វើឱ្យសេដ្ឋកិច្ចជាតិដួលរលំថែមទៀតផង។
កាលពីថ្ងៃទី១៦ ខែតុលា រដ្ឋាភិបាលនៃក្រុមគ្រួសារត្រកូល ហ៊ុន បោះពុម្ព និងឲ្យធ្វើចរាចរក្រដាសប្រាក់ប្រភេទថ្មី ២សែនរៀល ឬស្មើនឹង ៥០ដុល្លា ចំនួន ២០លានសន្លឹក។ រដ្ឋាភិបាលថា ការបោះក្រដាសប្រាក់បន្ថែមនេះ គ្រាន់តែដើម្បីជំនួសក្រដាសប្រាក់ចាស់ខូចដាច់ដោចតែប៉ុណ្ណោះ តែមេគណបក្សប្រឆាំង និងជាអ្នកសេដ្ឋកិច្ចផងថា នេះគ្រាន់តែជាលេសបិទបាំងតម្រូវការសាច់ប្រាក់ខ្លាំងរបស់រដ្ឋាភិបាលតែប៉ុណ្ណោះ។
សូមលោកអ្នកនាងចុចស្ដាប់សំឡេង នៃកិច្ចពិភាក្សារវាងលោក ជុន ច័ន្ទបុត្រ ជាមួយលោក សម រង្ស៊ី ប្រធានស្ដីទីគណបក្សសង្គ្រោះជាតិ ដែលបានជជែកពិភាក្សាអំពីរឿងនេះ នៅក្នុងនាទីវេទិកាអ្នកស្ដាប់វិទ្យុអាស៊ីសេរី នារាត្រីថ្ងៃអង្គារ ទី២២ ខែតុលា ឆ្នាំ២០២៤៕