ប្រធានសហគមន៍នេសាទភូមិព្រែក ដែលជាភូមិមួយមានព្រំប្រទល់ជាប់នឹងភូមិរាំងទិល គឺលោក ព្រហ្ម សេន មានប្រសាសន៍ប្រាប់វិទ្យុអាស៊ីសេរីនៅល្ងាចថ្ងៃទី២២ ឧសភា ថា កាលពីប៉ុន្មានថ្ងៃមុននេះមានភ្លើងឆេះព្រៃមួយបានបំផ្លាញព្រៃលិចទឹកប្រមាណ ២០០ហិកតារនៅក្នុងភូមិរាំងទិល។
លោក ព្រហ្ម សេន បានបញ្ជាក់ថា ៖ «នៅភូមិខ្ញុំមានភ្លើងឆេះព្រៃ ឆេះប្រហែល ២០០ហិកតារ ប្រភេទព្រៃលិចទឹក មានដើមរាំង ដើមផ្ទោល ត្អួអីហ្នឹង! គ្រប់ប្រភេទព្រៃៗលិចទឹក។ ភ្លើងដែលឆេះហ្នឹង ឆេះដោយមានគេដុត ប៉ុន្តែគ្រាន់តែយើងមិនដឹងនរណាដុត! មានខាងជលផលអីគាត់មកត្រួតពិនិត្យមើលដែរ តែមិនអាចពន្លត់បាន រហូតដល់ភ្លៀងមករលត់ខ្លួនឯងតែម្ដង!»។
ភូមិរាំងទិលគឺជាភូមិនេសាទមួយមានភូមិសាស្ត្រប្របនឹងមាត់បឹងទន្លេសាប គឺជាភូមិដែលសំបូរដោយព្រៃរនាម ដែលជាប្រភេទព្រៃសម្រាប់ឲ្យមច្ឆាជាតិធ្វើសំបុកពងកូន នារដូវបិទនេសាទជារៀងរាល់ឆ្នាំ។
អធិការនគរបាលស្រុកកណ្ដៀង គឺលោក ឈន រិទ្ធិ មានប្រសាសន៍ថា តាមការស្រាវជ្រាវបឋមរបស់សមត្ថកិច្ចនគរបាលប៉ុស្តិ៍បង្ហាញថា ការឆេះនេះគឺបណ្ដាលមកពីការដុតរបស់ជនមិនស្គាល់មុខ ដែលប្រកបរបររកស៊ីតាមមាត់បឹងទន្លេសាប ដូចជានេសាទត្រី ចាប់សត្វ និងរកឃ្មុំជាដើម មិនមែនជាការដុតដើម្បីទន្ទ្រានយកដីធ្វើស្រែនោះទេ។
លោក ឈន រិទ្ធិ បានឲ្យដឹងថា ៖ «ប្រជាជនហ្នឹងខ្លះទៅរកអីៗនៅព្រៃហ្នឹង គាត់ដុតទៅ! ជួនកាលគេដុតទៅ ក៏វារាលអ៊ីចឹងទៅ! ប៉ុន្តែយើងរកមុខសញ្ញាវាអត់ឃើញទេ ព្រោះពេលទៅធ្វើហ្នឹងវានៅក្នុងព្រៃអ៊ីចឹងណា៎!»។
លោក ឯក ចំរើន មន្ត្រីសម្របសម្រួលនៃសម្ព័ន្ធភាពដើម្បីអភិរក្សធនធានជលផល (FACT) ដែលជាសម្ព័ន្ធភាពនៃអង្គការជាតិ និងអន្តរជាតិមួយ កំពុងធ្វើការផ្ដោតទៅលើបញ្ហាធនធានធម្មជាតិ បរិស្ថាន និងជលផលជុំវិញបឹងទន្លេសាប សម្ដែងការសោកស្ដាយព្រៃឈើដែលឆេះនេះយ៉ាងខ្លាំង។ លោកសំណូមពរឲ្យរដ្ឋាភិបាលបង្កើនការការពារភ្លើងឆេះព្រៃបន្ថែមទៀត និងចាប់ជនល្មើសមកផ្តន្ទាទោស។
លោក ឯក ចំរើន បានអះអាងថា ៖ «ខ្ញុំគិតថា បើសិនជាគេស្រាវជ្រាវប្រហែលឃើញ ព្រោះទាក់ទងមកអ្នកដែលកាប់ព្រៃ... បើសិនជាសមត្ថកិច្ចស្រាវជ្រាវរក»។
ឯកសាររបស់មន្ទីរបរិស្ថានខេត្តពោធិ៍សាត់បានឲ្យដឹងថា ក្នុងខេត្តនេះមានព្រៃលិចទឹកប្រមាណ ៥០.៣៨៥ហិកតារ ស្ថិតក្នុងភូមិចំនួន ១៥ នៃស្រុកចំនួន ៣ គឺស្រុកកណ្ដៀង ស្រុកបាកាន និងស្រុកក្រគរ ដែលមានប្រជាពលរដ្ឋរស់នៅចំនួន ២.៧៨៩គ្រួសារ គិតជាចំនួនមនុស្សមាន ១៥.៣០២នាក់។តំបន់នេះគឺជាជម្រកនៃជីវចម្រុះ សត្វ និងរុក្ខជាតិយ៉ាងសំខាន់។ ជាងនេះទៅទៀត វាជាទីជម្រកពងកូនសម្រាប់មច្ឆាជាតិ។
ប្រធានគ្រប់គ្រងតំបន់ដីសើមនៃមន្ទីរបរិស្ថានខេត្តពោធិ៍សាត់ លោក រស់ ម៉ារ៉ាឌី បានចាត់ទុកភ្លើងឆេះព្រៃនៅភូមិរាំងទិលនេះ ថាជាការខូចខាតផ្នែកបរិស្ថានដ៏ធំធេងមួយ ដែលពុំធ្លាប់មានកន្លងមកនៅក្នុងខេត្តនេះ៕
