ការសម្រេចដូច្នេះ ធ្វើឡើងក្រោយពីការខ្វែងគំនិតគ្នារវាងសហព្រះរាជអាជ្ញាជាតិនិងអន្តរជាតិអំពីការស្នើសុំឲ្យមានការស៊ើបសួរជនសង្ស័យអតីតមេដឹកនាំខ្មែរក្រហមបន្ថែមទៀត ហើយក៏ត្រូវបានដោះស្រាយកាលពីថ្ងៃទី២ ខែកញ្ញា ឆ្នាំ២០០៩ ដែលឲ្យអនុវត្តតាមសំណើរបស់សហព្រះរាជអាជ្ញាអន្តរជាតិ។
យ៉ាងដូច្នេះក្តី លោក រាជ សម្បត្តិ ប្រធានផ្នែកកិច្ចការសាធារណៈថ្លែងថា ៖ «តែនេះមិនមែនបានន័យថា នឹងត្រូវមានមនុស្សចាប់មកឃុំខ្លួនថ្មីកើតឡើងនោះទេ។ មានន័យថា គ្រាន់តែជាដីកាបញ្ជូនឲ្យស៊ើប»។
បន្ទាប់ពីសេចក្តីសម្រេចកាលពីសប្តាហ៍មុន លោកស្រី ជា លាង បានថ្លែងថា លោកស្រីត្រូវតែគោរពតាមច្បាប់ ៖ «យើងត្រូវមើលទៅតាមច្បាប់កំណត់និងនៅក្នុងសេចក្ដីសម្រេច។ យើងអត់អាចធ្វើអ្វីហួសពីច្បាប់ដែលមាននោះទេ»។
នៅក្នុងសេចក្តីប្រកាសព័ត៌មាន ក៏ដូចជាការថ្លែងរបស់លោកកាលពីសប្តាហ៍មុនដែរ លោកសហព្រះរាជអាជ្ញាអន្តរជាតិស្តីទី William Smith បានថ្លែងថា តាមច្បាប់ ដីកាសន្និដ្ឋានបញ្ជូនរឿងឲ្យស៊ើបសួរគឺជាឯកសារសម្ងាត់ ៖ «នៅពេលដែលយើងបញ្ជូនរឿងទៅសហចៅក្រមស៊ើបអង្កេត យើងនឹងផ្តល់ព័ត៌មានបន្ថែម ហើយយើងសម្រេចមិនបញ្ចេញឲ្យដឹងជាសាធារណៈទេ ហើយនៅដំណាក់កាលនេះ ស្ថិតនៅជាការសម្ងាត់នៅឡើយ»។
ក៏ប៉ុន្តែ នៅក្នុងសេចក្តីប្រកាសព័ត៌មានបានសរសេរថា ដោយសារជាការចាំបាច់សម្រាប់សាធារណជនទទួលព័ត៌មានអំពីភាពជឿនលឿននៃដំណើការនីតិវិធី វិធានផ្ទៃក្នុងបានអនុញ្ញាតឲ្យសហព្រះរាជអាជ្ញាផ្តល់ជូនសាធារណជននូវព័ត៌មានសង្ខេបខ្លះនៅក្នុងដីកាបញ្ជូនរឿងឲ្យស៊ើបសួរ ដែលក្នុងនោះ មានការស្នើសុំឲ្យបំពេញកិច្ចស៊ើបសួរទៅលើអង្គហេតុផ្សេងៗគ្នាចំនួន៨ ស្តីពីការធ្វើឃាតមនុស្ស ការធ្វើទារុណកម្ម ការឃុំខ្លួនដោយខុសច្បាប់ ការធ្វើពលកម្មដោយបង្ខំ និងការធ្វើទុក្ខបុកម្នេញផ្សេងៗទៀត។
ដីកាបញ្ជូនរឿងឲ្យស៊ើបសួរចំនួន២ របស់សហព្រះរាជអាជ្ញាអន្តរជាតិ ដែលបានបញ្ជូនទៅសហចៅក្រមស៊ើបអង្កេត កាលពីថ្ងៃច័ន្ទ ទី៧ ខែញ្ញា ឆ្នាំ២០០៩ គឺជាការស៊ើបសួរចំពោះឧក្រិដ្ឋកម្មនានា ដែលកំណត់ទៅលើជនសង្ស័យចំនួន៥រូប។
លោក រាជ សម្បត្តិ ប្រធានកិច្ចការសាធារណៈនៃសាលាក្តីខ្មែរក្រហម ថ្លែងថា ដីកាបញ្ជូនរឿងឲ្យស៊ើបសួររបស់សហព្រះរាជអាជ្ញាអន្តរជាតិ គ្រាន់តែជាការធ្វើទៅតាមនីតិវិធីសម្រាប់ស៊ើបសួរប៉ុណ្ណោះ ហើយមិនមានជនសង្ស័យណាម្នាក់ត្រូវកំណត់ចាប់ខ្លួនទេ។ លោកបន្ថែមថា សហចៅក្រមស៊ើបអង្កេតក៏មិនបានអនុវត្តការស៊ើបសួរដែរ៕