អភិបាលស្រុកកៀនស្វាយ លោក ហេង ហៀម បានប្រាប់ឲ្យវិទ្យុអាស៊ីសេរីដឹងថា បន្ទាប់ពីបានទទួលព័ត៌មានពីប្រជាពលរដ្ឋនៅថ្ងៃទី១ សីហា ក្រុមកម្លាំងសមត្ថកិច្ចបានចាប់ផ្ដើមធ្វើការចុះឆែកឆេរលំនៅមួយរបស់ឈ្មោះ ស៊ូ ឈុំ ស្ថិតក្នុងភូមិរបោះអង្កាញ់ ឃុំព្រែកឯង ស្រុកកៀនស្វាយ ខេត្តកណ្ដាល ដែលបានចិញ្ចឹមក្មេងស្រីៗទុករយៈពេល ២សប្តាហ៍។
លោកបញ្ជាក់ថា តាមការសម្ភាសជាបឋមរបស់សមត្ថកិច្ច ជនសង្ស័យបានឆ្លើយថា ផ្ទះនេះជាសាខាមួយរបស់ក្រុមហ៊ុន អេភី ធូសាន (AP TOSAN) នាំពលករទៅប្រទេសម៉ាឡេស៊ី ដែលមានទីតាំងនៅសង្កាត់បឹងទំពុន ខណ្ឌមានជ័យ ហើយក្មេងស្រីទាំងនេះត្រៀមលក្ខណៈទៅបម្រើការងារនៅប្រទេសម៉ាឡេស៊ី។
លោក ហេង ហៀម បានបញ្ជាក់ថា ៖ «ក្នុងការពិនិត្យរដ្ឋបាលនេះ យើងមានកម្លាំងចម្រុះរបស់គណៈបញ្ជាការឯកភាពខេត្តស្រុក ដោយមាននគរបាល និងកងរាជអាវុធហត្ថចុះទៅត្រួតពិនិត្យផ្ទះ និងទៅយើងឃើញមានការប្រមូលផ្តុំទុកនូវយុវតីចំនួន ៣៦នាក់។ ប៉ុន្តែយើង តាមការឆ្លើយបំភ្លឺរបស់សាមីខ្លួនដែលគ្មានឯកសារអីទាំងអស់ ក្នុង ៣៦នោះ មានលើសអាយុ ១៨ឆ្នាំ ៣៤នាក់ ក្រោម ១៨ មាន ២នាក់។ ប៉ុន្តែធាតុពិត យើងពិនិត្យឃើញថា មិនដូចមានការឆ្លើយហ្នឹងទេ! បានធ្វើកំណត់ហេតុ ហើយនាំសាមីខ្លួនទាំងអស់ទៅខេត្ត ដើម្បីសួរព័ត៌មានឲ្យបានច្បាស់លាស់»។
វិទ្យុអាស៊ីសេរីបានព្យាយាមទាក់ទងស្នងការ និងស្នងការរងខេត្តកណ្ដាល ដើម្បីបំភ្លឺជុំវិញលទ្ធផលនៃការសួរចម្លើយជនសង្ស័យ និងក្មេងៗស្រីទាំងនេះ ក៏ប៉ុន្តែមន្ត្រីទាំងនោះបានរុញដាក់គ្នាមិនផ្ដល់សម្ភាសន៍ឡើយ។
ទាក់ទងនឹងបញ្ហានេះ ព្រះរាជអាជ្ញារងអមសាលាដំបូងខេត្តកណ្ដាល លោក កែវ សុជាតិ មានប្រសាសន៍ដោយខ្លីថា លោកទើបតែទទួលបានសំណុំរឿងពីស្នងការនគរបាលខេត្ត ក៏ប៉ុន្តែការសម្រេចយ៉ាងណាទៀតនោះ នៅមិនទាន់ដឹងច្បាស់នៅឡើយ ៖ «កំពុងសួរចម្លើយ សួរអីសិន! បើមិនទាន់ធ្វើការងារអីផង ម៉េចដឹងចំណាត់ការបន្តទៀត!»។
ប្រភពពីមន្ត្រីអាជ្ញាធរមូលដ្ឋានបានឲ្យដឹងថា ក្មេងស្រីចំនួន ៣៦នាក់ និងម្ចាស់ផ្ទះឈ្មោះ ស៊ូ ឈុំ ត្រូវបានឃាត់ខ្លួនដោយស្នងការនគរបាលខេត្តកណ្ដាល តាំងពីថ្ងៃអាទិត្យ ទី១ សីហានេះ៕