ពិធីការនីនៅទូរទស្សន៍ប៉ុស្តិ៍លេខ៣ ដែលជាមិត្តរបស់កញ្ញា សួន ភក្តី ហៅ អាណូ បានឲ្យដឹងថា តាំងពីលេចឮពាក្យចចាមអារ៉ាមថា DJ អាណូ ត្រូវគេឆូតនឹងផ្លែឡាមមក នាងទើបតែបានឃើញមួយភ្លែតនៅពេលបង្ហាញមុខតាមកញ្ចក់ទូរទស្សន៍តែប៉ុណ្ណោះ បន្ទាប់មកក៏មិនអាចទាក់ទងនាងបានហើយក៏មិនដឹងថានាងនៅទីណាដែរ។
កញ្ញា សួន ភក្តី ហៅ អាណូ ត្រូវបានស្ថានីយទូរទស្សន៍ប៉ុស្តិ៍លេខ៣រៀបចំបង្ហាញមុខឆ្លើយបំភ្លឺនឹងពាក្យចចាមអារ៉ាមនិងអ្នកកាសែតដែលលេចឮថា នាងត្រូវប្រពន្ធមន្ត្រីជាន់ខ្ពស់ម្នាក់បានចាប់យកទៅឆូតនឹងផ្លែឡាមនៅថ្ងៃទី១៩ វិច្ឆិកា។ DJ អាណូ បានបដិសេធថានោះមិនមែនជាការពិតទេ។ នាងថែមទាំងគំរាមថានឹងប្តឹងអ្នកសារព័ត៌មានទៀតផង។
DJ អាណូ បានបញ្ជាក់ថា ៖ «ទី១ គឺមានអារម្មណ៍ស្រងាកចិត្ត ថាហេតុអីបានជាអ្នកកាសែតទូទៅគួរណាស់តែសរសេរលើកទឹកចិត្តសិល្បករ សិល្បការិនី បើសិនជាសរសេរអ៊ីចឹងដដែលចាំឃើញពិត ឃើញនឹងភ្នែក មានរូបភាពដែលមានឡាម មានឈាម ឬក៏រូបភាពអបលក្ខណ៍ផ្សេងៗ ចាំយកមកចុះថានេះគឺជារឿងពិត។ នាងខ្ញុំគ្រាន់តែនិយាយថា នាងខ្ញុំនឹងដាក់ពាក្យបណ្ដឹង»។
ប្រធានស្ថានីយទូរទស្សន៍ប៉ុស្តិ៍លេខ៣ លោក ខាំពូន កែវមុន្នី ក៏បានលើកឡើងក្នុងការបង្ហាញមុខរបស់អាណូនោះដែរថា នាងបានសុំច្បាប់ពីការងារដើម្បីទៅសួរសុខទុក្ខបងប្អូននៅក្រៅប្រទេសដោយនាងសុំឲ្យលាក់ជាសម្ងាត់ទើបលោកមិនដែលប្រាប់អ្នកសារព័ត៌មាននៅក្នុងអំឡុងពេលនាងបាត់មុខពីកញ្ចក់ទូរទស្សន៍នោះ។
បងប្រុសរបស់អាណូ ឈ្មោះ សួន យុទ្ធធ្យា ប្រាប់ថាបច្ចុប្បន្ននាងទៅធ្វើការនៅទូរទស្សន៍ប៉ុស្តិ៍លេខ៣ជាធម្មតា។
ទោះជាយ៉ាងណាអ្នកសារព័ត៌មានបានអះអាងថា ពួកគាត់នៅតែបន្តតាមដានករណី DJ អាណូ បន្ទាប់ពីអាណូបានចេញមុខបដិសេធតាមកញ្ចក់ទូរទស្សន៍ប៉ុស្តិ៍លេខ៣ និងបានគំរាមថាប្តឹងអ្នកសារព័ត៌មានមកនោះ។
ចាងហ្វាងកាសែតរស្មីកម្ពុជា លោក ប៉ែន សុមិទ្ធិ បានអះអាងថា ករណីរឿងអាណូមិនទាន់ចប់នៅឡើយទេ។ លោកបញ្ជាក់ថា ការផ្សព្វផ្សាយរបស់កាសែតលោកកន្លងមកគឺផ្នែកលើប្រភពត្រឹមត្រូវអាចជឿជាក់បាន ចំណែកឯការបកស្រាយរបស់កញ្ញា អាណូ តាមកញ្ចក់ទូរស្សន៍នោះហាក់ដូចជាការរៀបឆុតឆាកមកសម្ដែងតែប៉ុណ្ណោះ។
ចំណែកឯប្រភពដែលអាចជឿបាននោះគឺការចេញផ្សាយរបស់វឹបសាយថ៍វៀតណាម ហើយអ្វីដែលគួរឲ្យសង្ស័យនោះគឹហេតុអ្វីបានជា DJ អាណូ ទៅជួបសម្ភាសជាមួយនឹងទស្សនាវដ្ដីអង្គរធំមុនទូរទស្សន៍ដែលខ្លួនធ្វើការជាមួយនោះ។
លោក ប៉ែន សុមិទ្ធិ បានឲ្យដឹងថា ៖ «នៅក្នុងបទសម្ភាសន៍ហ្នឹងទៀតក៏មានរឿងច្រើនដែលមិនអាចនឹងជឿបាន ដូចជាករណីថាសុំច្បាប់ ទោះបីជាមានការអះអាងពីអគ្គនាយករបស់ទូរទស្សន៍ក៏ដោយ។ ករណីខាងដើមនាងហ្នឹងទៅណា? នាងហ្នឹងគឺគាត់អត់បញ្ជាក់អីទាំងអស់។ យើងចាំបាច់ត្រូវតែមាន Investigated report»។
លោក ប៉ែន សុមិទ្ធិ ក៏បានបន្ថែមប្រភពដែលលោកអាចជឿទុកចិត្តបានថា ៖ «ប្រភពភាគច្រើនបំផុតគឺថាយើងបានពីអ្នកដែលធ្វើការ... ដែលគួរឲ្យជឿបាន។ គឺយើងជឿទៅលើការសរុបនៃប្រភពផ្សេងៗគ្នាទាំងអស់ចូលគ្នាទៅ យើងអាចជឿបានថាវាអ៊ីចឹង»។
លោកបន្តថា គ្រប់អ្នកសារព័ត៌មានទាំងអស់បានសរសេររឿងរបស់នាងមានបំណងអាណិតជួយការពារនាងប្រសិនបើរឿងនោះកើតឡើងចំពោះនាងពិតប្រាកដនោះ។
និពន្ធនាយករបស់កាសែតកោះសន្តិភាព លោក សែម ផលគុណ បានអះអាងប្រហាក់ប្រហែលគ្នាថា លោកបានទទួលព័ត៌មានថា អាណូត្រូវគេឆូតនឹងផ្លែមឡាមនោះតាមប្រភពដែលស្និទ្ធនឹងលោកម្នាក់មុននឹងពាក្យចចាមអារ៉ាមទៀត ប៉ុន្តែលោកមិនទាន់ចុះផ្សាយ បន្ទាប់ពីលោកធ្វើការស៊ើបអង្កេតជាមួយនឹងក្រុមគ្រួសារដោយគ្មានការសហការនិងនៅកន្លែងធ្វើការរបស់នាង ទើបលោកសម្រេចថាចុះផ្សាយ។
លោក សែម ផលគុណ បានមានប្រសាសន៍ថា ៖ «ខ្ញុំដឹងគេប្រាប់មកតាមអ្នកជិតស្និទ្ធអីខ្លះគេខ្សឹបប្រាប់អ៊ីចឹង ប៉ុន្តែខ្ញុំធ្វើមិនដឹងមិនឮព្រោះវាអត់មានហេតុផលអីសោះ ស្រាប់តែទស្សនាវដ្ដីមួយចេញផ្សាយ។ ទស្សនាវដ្ដីមួយចេញផ្សាយខ្ញុំក៏ឲ្យគេជាវយកមកមើលទៅ ខ្ញុំមើលហេតុផលអស់ហ្នឹងទៅ គេអះអាងថាប្រភពច្បាស់ការណ៍ណាស់ ហើយវាស៊ីសងទៅនឹងពាក្យចចាអារ៉ាមដែលខ្ញុំឮមុនហ្នឹងទៀត ខ្ញុំដឹងមុនហ្នឹងទៀត វាដូចប្រហាក់ប្រហែលគ្នាក៏ខ្ញុំចាប់អារម្មណ៍ពីបញ្ហាហ្នឹង។ ខ្ញុំបានមកខ្ញុំទុកទៀត ខ្ញុំមិនទាន់ផ្សាយម៉េចទេ ខ្ញុំមើលសិន ព័ត៌មានយើងមិនមែនចេះតែយើងអង្គុយស្រមៃនឹកឃើញទេ ហើយយើងបានទៅតាមសួរដល់ប្រភពដើមរបស់នាងទៀតគឺទូរទស្សន៍ហ្នឹងហើយ ផ្សាយដំណើររបស់ខ្ញុំអ៊ីចឹង សួរទៅខាងហ្នឹងគេបដិសេធគេថាគេអត់ដឹងអត់ឮអីទេ ការងារហ្នឹងគឺតាមលំដាប់អ៊ីចឹងទេ មិនបានប្រឌិតអីមួយទេ»។
ចាងហ្វាងការផ្សាយទស្សនាវដ្ដីខ្មែរអប្សរា លោក អ៊ិន សុផាណ្ណា មានប្រសាសន៍ថា ក្រុមការងាររបស់លោកកំពុងព្យាយាមជួប DJ អាណូ ដោយផ្ទាល់ បើសិនជានាងជាមនុស្សស្អាតស្អំ នាងមិនគួរគេចមុខពីអ្នកសារព័ត៌មាននោះទេ។
លោក អ៊ិន សុផាណ្ណា បានឲ្យដឹងថា ៖ «រឿងហ្នឹងគេអាចចាត់ទុកជារឿងប្រឌិតហើយ ព្រោះគ្រួសារមិនអាចចេញមុខ ហើយរឿងវាធ្វើឲ្យចលាចល ហើយក្នុងហ្នឹងមានទាំងខាងអ្នកគ្រប់គ្រងបុគ្គលិករបស់គាត់អត់ចេញមុខ។ អាហ្នឹងធ្វើឲ្យរឿងវាច្របូកច្របល់ ហើយអាហ្នឹងមិនមែនសារព័ត៌មានអ្នកបង្កើតឯណា អាហ្នឹងខាងមហាជនដែលគាំទ្រអ្នកបង្កើត អ៊ីចឹងអ្នកដែលទទួលខុសត្រូវលើព័ត៌មានហ្នឹង វាទាល់ខាងប្រធានរបស់គាត់អ៊ីចឹង ទទួលដឹងខុសត្រូវ ហើយយើងទប់ទល់សភាពការណ៍អ៊ីចឹងហើយបានជាយើងឡើងចេញមកបដិសេធ បន្ទោសទេ ហើយនៅបន្តស៊ើបអង្កេតរឿងហ្នឹង ពិសេសចង់ជួបសាមីខ្លួនតែម្ដង»។
បើតាមវឹបសាយថ៍ VietNamNet Bridge បានសរសេរកាលពីពេលថ្មីៗនេះថា មុនពេល DJ អាណូ ចូលទៅព្យាបាលនៅប្រទេសវៀតណាម អាណូបានទៅព្យាបាលរបួសនៅមន្ទីរពេទ្យកាល់ម៉ែត្រ ក្នុងទីក្រុងភ្នំពេញ។ វឹបសាយថ៍នោះក៏បានសរសេរទៀតថា អាណូបានទៅព្យាបាលនៅមន្ទីរពេទ្យមួយឈ្មោះ The French-Vietnamese នៅក្រុងហូជីមិញ នាងបានជាពីស្នាមរបួសក្នុងរយៈពេលមួយសប្តាហ៍។ វឹបសាយថ៍នោះបន្តថា យោងតាមស្នាមរបួសនៅលើដងខ្លួនរបស់នាងគឺនាងមិនអាចបន្តអាជីពជាពិធីការិនីនៅតាមកញ្ចក់ទូរស្សន៍ទៀតបាននោះទេ។
វិទ្យុអាស៊ីសេរីបានព្យាយាមទូរស័ព្ទទៅមន្ទីរពេទ្យ The French-Vietnamese នៅក្រុងហូជីមិញ សួរថាតើ DJ អាណូ បានទៅព្យាបាលរបួសនៅមន្ទីរពេទ្យនោះដែរទេ? អ្នកទទួលទូរស័ព្ទឆ្លើយថា គេមិនអាចជម្រាបព័ត៌មាននេះបានទេសូមឲ្យសួរទៅក្រុមគ្រួសាររបស់នាងទៅ។
ចំណែកឯវេជ្ជបណ្ឌិតនៅមន្ទីរពេទ្យកាល់ម៉ែត្របានបដិសេធថា លោកមិនបានដឹងរឿងថាអាណូទៅព្យាបាលនៅមន្ទីរពេទ្យកាល់ម៉ែត្រនោះទេ។
បើតាមរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មានប្រសាសន៍ពាក់ព័ន្ធនឹងការចោទប្រកាន់របស់ DJ អាណូ ថា នៅប្រទេសកម្ពុជាប្រព័ន្ធផ្សព្វផ្សាយខ្លះមិនបានគោរពក្រមសីលធម៌ពិតមែន ប៉ុន្តែក៏មានប្រព័ន្ធផ្សព្វផ្សាយជាច្រើនគោរពតាមវិជ្ជាជីវៈរបស់ពួកគេត្រឹមត្រូវហើយការផ្សាយរបស់ពួកគេអាចទទួលយកបាន៕