ហោណាំហុង​ថ្លែង​ពី​ជំហរ​កម្ពុជា​ចំពោះ​វិបត្តិ​ពិភពលោក

អង្គការ​សហប្រជាជាតិ (អ.ស.ប.) កំពុង​បន្ត​កិច្ច​ប្រជុំ​មហា​សន្និបាត​ប្រចាំ​ឆ្នាំ​របស់​ខ្លួន ដោយ​មាន​មេ​ដឹក​នាំ​ពី ១២០​ប្រទេស បន្ត​គ្នា​ថ្លែង​សុន្ទរកថា។
ដោយ សំ បូរិន្ទ
2009-09-27
Share
ហោ​ណាំហុង ឧបនាយក​រដ្ឋមន្ត្រី​និង​ជា​រដ្ឋមន្ត្រី​ការបរទេស​ខ្មែរ លោក ហោ ណាំហុង ថ្លែង​ទៅ​កាន់​អ្នក​កាសែត​នៅ​ក្រោយ​ជំនួប​ជាមួយ​សមភាគី​ថៃ​នៅ​ឯ​ក្រសួង​ការបរទេស​កម្ពុជា ក្នុង​ក្រុង​ភ្នំពេញ នា​ថ្ងៃ​ទី​១៣ តុលា ២០០៨។
AFP Photo

កាលពី​រសៀល​ថ្ងៃ​សៅរ៍ ទី ២៦ កញ្ញា ត្រូវ​នឹង​ព្រឹក​ថ្ងៃ​អាទិត្យ ម៉ោង​នៅ​កម្ពុជា លោក​ឧបនាយក​រដ្ឋ​មន្ត្រី ហោ ណាំហុង ដែល​ជា​រដ្ឋ​មន្ត្រី​ក្រសួង​ការ​បរទេស និង​សហ​ប្រតិបត្តិការ​អន្តរជាតិ​ផង​នោះ ក៏​បាន​ថ្លែង​ក្នុង​លំដាប់​លំដោយ ក្រោយ​លោក​នាយក​រដ្ឋ​មន្ត្រី​ប្រទេស​ស្រីលង្កា និង​មុន​លោក​ឧបនាយក​រដ្ឋ​មន្ត្រី​ប្រទេស​ចាម៉ៃកា បង្ហាញ​អំពី​ជំហរ​របស់​កម្ពុជា​ជុំវិញ​វិបត្តិ​ពិភព​លោក ជូន​មហា​សន្និបាត អ.ស.ប. លើក​ទី​៦៤ ដែល​ប្រព្រឹត្ត​ទៅ​នា​បូរី​ញូវយ៉ក​នេះ។

លោក​​ឧបនាយក​រដ្ឋ​មន្រ្តី ហោ ណាំហុង និង​ជា​រដ្ឋ​មន្រ្តី​ការបរទេស សហ​ប្រតិបត្តិការ​អន្តរជាតិ នៃ​រាជាណាចក្រ​កម្ពុជា បាន​ជម្រាប​មហា​សន្និបាត​អង្គការ​សហ​ប្រជាជាតិ​អំពី​ការ​ចូល​រួម​យក​ចិត្ត​ទុក​ដាក់​នៃ​ប្រទេស​កម្ពុជា ចំពោះ​វិបត្តិ​ទាំងឡាយ​ដែល​ពិភព​លោក​កំពុង​ប្រឈម​មុខ។

លោក​បាន​លើក​ឡើង​បញ្ហា​ធំៗ​មួយ​ចំនួន​ដែល​ពិភព​លោក​កំពុង​ជួប​ប្រទះ «គ្រប់ៗ​គ្នា​មាន​ក្ដី​កង្វល់​ចំពោះ​វិបត្តិ​មួយ​ចំនួន​ដែល​ពិភព​លោក​យើង​កំពុង​តែ​ប្រឈម​មុខ។ វិបត្តិ​ទាំង​នោះ​មាន​រួម​ទាំង​វិបត្តិ​សេដ្ឋកិច្ច​ហិរញ្ញវត្ថុ​សកល​លោក ការ​ប្រែប្រួល​អាកាសធាតុ ភាព​អសន្តិសុខ ម្ហូប​អាហារ និង​ថាមពល ព្រម​ទាំង​ការ​គំរាម​កំហែង​ពី​អំពើ​ភេរវកម្ម និង​អាវុធ​ប្រហល័យ​លោក​ជា​ដើម​ផង»

ទាក់​ទង​នឹង​វិបត្តិ​សេដ្ឋកិច្ច​សកល​លោក លោក​ឧបនាយក​រដ្ឋ​មន្រ្តី ហោ ណាំហុង បាន​ថ្លែង​អំណរ​គុណ​ចំពោះ​ប្រទេស​ឧស្សាហកម្ម​២០ ដែលបានប្រជុំគ្នានៅទីក្រុងភិតស៍ប៊ើក (Pittsburgh) កន្លង​ផុត​ទៅ ២​ថ្ងៃ​មុន​នេះ និង​ការ​ប្រជុំ​មួយ​ទៀត​នៅ​ទីក្រុង​ឡុងដ៍ កាល​ពី​ខែ​មេសា កន្លង​ទៅ ដើម្បី​ការពារ​សង្គម​ ដែល​ប៉ះពាល់​ដល់​វិបត្តិ​សេដ្ឋកិច្ច​នេះ។

រី​ឯ​វិបត្តិ​ដែល​បណ្ដាល​មក​ពី​ការ​ប្រែប្រួល​បរិយាកាស​វិញ លោក​ឧបនាយក​រដ្ឋ​មន្រ្តី ហោ ណាំហុង បាន​ជម្រាប​មហា​សន្និបាត​អង្គការ​សហ​ប្រជាជាតិ​លើក​ទី ៦៤ យោង​តាម​ការ​បង្ហាញ​ពី​ធនាគារ​អភិវឌ្ឍន៍​អាស៊ី ដែល​បាន​ឲ្យ​ដឹង​ថា ការ​ប្រែប្រួល​បរិយាកាស​នេះ​នឹង​ធ្វើ​ឲ្យ​ប្រទេស​ក្នុង​តំបន់​អាស៊ី​អាគ្នេយ៍ ដែល​ជា​ក្រុម​ប្រទេស​ផលិត​ស្រូវ​អង្ករ​ធំ​ជាង​គេ​ក្នុង​ពិភព​លោក​នោះ បាត់​បង់​ចំណូល​ក្នុង​ស្រុក​ប្រចាំ​ឆ្នាំ​រហូត​ដល់​ជិត ៧%។

ចំពោះ​ប្រទេស​កម្ពុជា ដែល​មាន​ពលរដ្ឋ​ជាង ៨០% ប្រកប​របរ​កសិកម្ម​នោះ លោក​ឧបនាយក​រដ្ឋ​មន្រ្តី ហោ ណាំហុង បាន​មាន​ប្រសាសន៍​ថា កម្ពុជា​បាន​ចូល​រួម​ទទួល​ខុស​ត្រូវ​ក្នុង​ការ​ទប់ស្កាត់​ការ​ប្រែ​ប្រួល​អាកាសធាតុ​នេះ តាំង​ពី​ឆ្នាំ ២០០៣ មក​ម្ល៉េះ។ ទាក់​ទង​នឹង​បញ្ហា​សន្តិភាព​ពិភពលោក​វិញ លោក​បាន​ថ្លែង​គាំទ្រ​លោក​ប្រធានាធិបតី អូបាម៉ា នៃ​សហរដ្ឋ​អាមេរិក ដែល​កាល​ពី​ថ្ងៃ​ពុធ កន្លង​ទៅ​នេះ អំពាវនាវ​ឲ្យ​បញ្ឈប់​ការ​រីកសាយ​នៃ​អាវុធ​នុយគ្លេអ៊ែរ ដើម្បី​ឲ្យ​ពិភពលោក​នេះ​មិន​បាច់​មាន​នុយគ្លេអ៊ែរ​ទៀត​ឡើយ។

លោក​អំពាវនាវ​ចំពោះ​ប្រទេស​កូរ៉េ​ខាង​ជើង ឲ្យ​ត្រឡប់​ចូល​មក​កាន់​តុ​ចរចា​ជាមួយ​ភាគី​ជា​ថ្មី​វិញ ហើយ​ថា​ការ​ចរចា​នេះ​គឺ​ជា​វេទិកា​សមរម្យ​បំផុត​សម្រាប់​កាលៈទេសៈ​នេះ។ លោក​ក៏​បាន​ជំរុញ​ឲ្យ​បក្ស​ពួក​ច្បាំង​គ្នា​ទាំង​ឡាយ​នៅ​តំបន់​មជ្ឈិមបូព៌ា ដែល​កំពុង​ប្រើ​អំពើ​ហិង្សា​នោះ​ឲ្យ​ឈប់​ប្រើប្រាស់​កម្លាំង​យោធា​ជា​បន្ទាន់ ដើម្បី​បើក​ផ្លូវ​ឲ្យ​មាន​ដំណោះ​ស្រាយ​សន្តិភាព ដោយ​ការ​កសាង​ឡើង​ដោយ​រដ្ឋ​ប៉ាឡេស្ទីន​មួយ ដែល​រស់នៅ​ជា​ប្រទេស​សន្ដាន​ព្រៀងលាន​ដ៏​ល្អ​ជាមួយ​ប្រទេស​អ៊ីស្រាអ៊ែល ប្រកប​ដោយ​សហប្រតិបត្តិការ​ជិតស្និទ្ធ​របស់​ប្រទេស​ទាំង​ពីរ​នេះ។

ទាក់​ទង​នឹង​កំណែ​ទម្រង់​នៃ​អង្គការ​សហ​ប្រជាជាតិ​វិញ លោក​ឧបនាយក​រដ្ឋ​មន្រ្តី ហោ ណាំហុង បាន​សុំ​ឲ្យ​ពិភពលោក​កែ​លម្អ​អង្គការ​កំពូល​ពិភពលោក​មួយ​នេះ ដោយ​ផ្អែក​ទៅ​លើ​ផល​ប្រយោជន៍​សន្តិភាព និង​សន្តិសុខ ព្រមទាំង​ការ​អភវិវឌ្ឍ​នៃ​សហគមន៍​អន្តរជាតិ ហើយ​មិន​គប្បី​កែ​ទម្រង់ ដើម្បី​បាន​ជា​ផល​ប្រយោជន៍​នៃ​ប្រទេស​ណា​មួយ​ឡើយ៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល