លោកនាយករដ្ឋមន្ត្រី ហ៊ុន សែន បានថ្លែងទៅកាន់ប្រជាពលរដ្ឋនៅក្នុងពិធីសម្ពោធផ្លូវមួយខ្សែ នៅក្នុងឃុំជីក្រែង ស្រុកជីក្រែង ខេត្តសៀមរាប បដិសេធការនិយាយថា កូនប្រុសរបស់លោកឈ្មោះ ហ៊ុន ម៉ាណែត ឈរឈ្មោះជាបេក្ខភាពតំណាងរាស្ត្រនៅមណ្ឌលសៀមរាប ។
លោកនាយករដ្ឋមន្ត្រី បានមានប្រសាសន៍ថា ៖ «មិនមែនឲ្យធ្វើនាយករដ្ឋមន្ត្រីជំនួសឱពុកទេ ឲ្យធ្វើមនុស្សបន្តជំនួសឱពុកម្ដាយ ។ ពាក្យចចាមអារ៉ាមពីមុនថា ហ៊ុន ម៉ាណែត នឹងឈរឈ្មោះតំណាងរាស្ត្រខេត្តសៀមរាប បានបញ្ចប់ទៅហើយ ព្រោះគេចុះឈ្មោះអស់ទៅហើយ ។ ខ្ញុំព្រះករុណាខ្ញុំមិនអនុញ្ញាតឲ្យកូននេះឈរឈ្មោះក្នុងពេលដែលឱពុកនៅជ្រងោនៅនេះទេ ។ ឲ្យធ្វើទាហានធ្វើចុះ ព្រោះអាហ្នឹងកាតព្វកិច្ចខ្លួនត្រូវការពារជាតិ ។ ដល់ពេលខ្ញុំព្រះករុណាខ្ញុំប្រកាសថា មិនឲ្យធ្វើនយោបាយ ស្រាប់តែអាមួយនោះវាមកប្រដៅខ្ញុំព្រះករុណាខ្ញុំថា "លោក ហ៊ុន សែន មិនគួររារាំងសិទ្ធិនយោបាយរបស់កូន" នែ៎! វាទៅជាអ៊ីចេះ» ។
លោកនាយករដ្ឋមន្ត្រីមានប្រសាសន៍ឲ្យដឹងទៀតថា លោក ហ៊ុន ម៉ាណែត ក្រៅពីធ្វើកិច្ចការយោធានឹងអាចប្រឡូកក្នុងសកម្មភាពមនុស្សធម៌ និងការធ្វើបុណ្យទាន ៕