ពាក្យស្លោកដើម្បីរំឭកអំពីរបបខ្មែរក្រហមចំនួន ២ឃ្លា ត្រូវបានគេដាក់តាមសាលារៀនហើយ នៅថ្ងៃសៅរ៍ ទី២ ខែតុលា ដោយចាប់ផ្ដើមពីវិទ្យាល័យពីរ នៅក្នុងក្រុងភ្នំពេញ គឺវិទ្យាល័យឫស្សីកែវ និងវិទ្យាល័យឥន្ទ្រៈទេវី។
ប្រធានគម្រោងប្រវត្តិសាស្ត្រខ្មែរក្រហម លោកស្រី សូ ហ្វារីណា នៃមជ្ឈមណ្ឌលស្រាវជ្រាវឯកសារបានឲ្យដឹងថា ការរៀបចំដាក់ពាក្យស្លោកនេះឡើងនៅតាមសាលារៀន ធ្វើឡើងដើម្បីឲ្យយុវជនខ្មែរចងចាំពីរបបខ្មែរក្រហម ដោយរក្សានូវការអត់ឱនឲ្យគ្នា យល់អធ្យាស្រ័យគ្នា និងដើម្បីកុំឲ្យមានខ្មែរក្រហមម្ដងទៀត។
លោកស្រី សូ ហ្វារីណា បានបន្ថែមថា ៖ «គោលបំណងមួយទៀតចង់បង្ហាញថា ត្រូវមានអីដើម្បីរំឭកអំពីរបបហ្នឹង ដូច្នេះការដែលយើងរំឭក អាចមានវិធីច្រើន ហើយវិធីក្នុងការដាក់ពាក្យស្លោក ឬហៅថា បូជនីយដ្ឋាន មិនចាំបាច់ថា ដាក់នៅក្នុងបូជនីយដ្ឋានធំៗទេ។ ការដាក់តាមសាលារៀន ក៏ជាវិធីមួយដែរ ដើម្បីរំឭក និងដើម្បីគោរពដល់ជនរងគ្រោះ»។
ពាក្យស្លោកទាំងពីរឃ្លានោះ មានការនិយាយពីសម័យខ្មែរក្រហម គឺដើម្បីអត់ឱន និងអធ្យាស្រ័យឲ្យគ្នា ហើយមួយឃ្លាទៀតដាក់ថា ការរៀនពីប្រវត្តិសាស្ត្រកម្ពុជាប្រជាធិបតេយ្យ គឺដើម្បីទប់ស្កាត់អំពើប្រល័យពូជសាសន៍។
ពាក្យស្លោកទាំងពីរនេះ រៀបចំឡើងដោយមជ្ឈមណ្ឌលឯកសារកម្ពុជា ហើយត្រូវគេគ្រោងនឹងដាក់នៅក្នុងសាលារៀនជាផ្ទាំងធំៗ ដោយឆ្លាក់នៅលើឈើ និងឆ្លាក់លើដែកអីណុក ដើម្បីដាក់ក្នុងសាលារៀនចំនួន ១.៧០០សាលារៀន នៅក្នុងប្រទេសកម្ពុជា។
កសិករនៅខេត្តតាកែវ អ្នកស្រី សេង ស៊ុនទី ថ្លែងថា ពាក្យស្លោកនោះមិនសូវមានប្រយោជន៍ប៉ុន្មានទេសម្រាប់យុវជន ដោយសារតែអ្នកទាំងនោះមិនបានឆ្លងកាត់របបនោះ ដូច្នេះអ្នកស្រីជឿថា មិនសូវមានយុវជនចាប់អារម្មណ៍ឡើយ ៖ «ប៉ុន្តែសម្រាប់មនុស្សចាស់ លោកគ្រូអ្នកគ្រូដែលគាត់បានឆ្លងកាត់ គាត់ច្បាស់ជាគិតហើយ»។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បញ្ជាក់បន្ថែមថា ៖ «ខ្លឹមសារវាប្រសើរហើយ សម្រាប់ឲ្យយុវជនយើងចងចាំនូវការឈឺចាប់ដែលកើតមាននៅក្នុងសម័យខ្មែរក្រហម។ ជាការពិត ប្រវត្តិសាស្ត្រត្រូវផ្ដោតការយកចិត្តទុកដាក់ដើម្បីបណ្ដុះឆន្ទៈ»។
របបខ្មែរក្រហមបានចាប់ផ្ដើមឡើងតាំងពីឆ្នាំ១៩៧៥ ហើយត្រូវដួលរលំនៅឆ្នាំ១៩៧៩ ដែលនាំឲ្យពលរដ្ឋខ្មែរប្រហែល ១លាន ៧សែននាក់បាត់បង់ជីវិតដោយការកាប់សម្លាប់ បង្អត់អាហារ ការបង្ខំឲ្យធ្វើពលកម្ម និងការធ្វើទារុណកម្ម។
កាលពីឆ្នាំ២០០៨ កន្លងទៅ ប្រវត្តិសាស្ត្រខ្មែរក្រហម ការចាប់ផ្ដើមកាន់អំណាច ការគ្រប់គ្រង និងការកាប់សម្លាប់ ក៏ត្រូវបានគេដាក់បញ្ចូលនៅក្នុងកម្មវិធីសិក្សារបស់សិស្សនៅថ្នាក់វិទ្យាល័យ ដោយគិតពីថ្នាក់ទី៩ រហូតដល់ថ្នាក់ទី១២ផងដែរ៕