អនុប្រធានមន្ទីរអភិវឌ្ឍន៍ជនបទខេត្តកំពង់ឆ្នាំង ទទួលបន្ទុកផ្នែកអាសេនិក លោក សុខ ចំណាន បានមានប្រសាសន៍ប្រាប់វិទ្យុអាស៊ីសេរីនៅរសៀលថ្ងៃ២២ កញ្ញានេះថា តាមការចុះស្រាវជ្រាវកន្លងមក បានរកឃើញថា ទឹកដែលចេញពីអណ្ដូងស្នប់ចំនួន១០ ដែលលោកបានចុះទៅពិនិត្យនោះ សុទ្ធតែមានផ្ទុកជាតិអាសេនិកក្នុងកម្រិតគួរឲ្យព្រួយបារម្ភសម្រាប់សុខភាពប្រជាពលរដ្ឋអ្នកប្រើប្រាស់។
លោក សុខ ចំណាន មានប្រសាសន៍ដូច្នេះថា ៖ «យើងមិនទាន់ហ៊ានប្រកាសអាសន្នទេ ប៉ុន្តែគ្រាន់តែថា អណ្ដូងដែលយើងមើលឃើញក្នុងចំណោម១០ យើងឃើញថាមាន ក៏ប៉ុន្តែអណ្ដូង១០នេះ នៅក្នុងកម្រិតស្ទាក់សើ្ទរក្នុងការប៉ះពាល់ធ្ងន់ធ្ងរយ៉ាងណានោះ ដោយសារការធ្វើតេស្តទៅ ម្ដងវាប្រែប្រួលអ៊ីចេះ ម្ដងវាប្រែប្រួលអ៊ីចុះ វាអាចកើនខ្លះ ថយចុះខ្លះអ៊ីចឹងទៅ។ ប៉ុន្តែក្រោយពីមានសារព័ត៌មានបានចុះផ្សាយមក ខាងក្រុមការងារយើង បានចុះទៅពិនិត្យសាឡើងវិញ យើងឃើញថា នៅមានដដែល មានការប្រែប្រួលតិចតួច ដូចថា ១០០ ឥឡូវហ្នឹង ឃើញមានការប្រែប្រួលនៅសល់ ៧៥។ អ៊ីចឹងមានន័យថា វានៅកម្រិតខ្ពស់ដដែល»។
មេឃុំព្រៃមូល លោក ភោគ ឈួន មានប្រសាសន៍ថា ក្នុងទូទាំងឃុំមានអណ្ដូងប្រមាណជិត៣០០អណ្ដូង។ លោក ភោគ ឈួន បានសម្ដែងពីការព្រួយបារម្ភចំពោះការរកឃើញជាតិអាសេនិកក្នុងអណ្តូងទឹកនានាក្នុងឃុំនេះ។
លោកបន្តថា ក្រោយពីដឹងបញ្ហានេះ អាជ្ញាធរឃុំបានចុះទៅធ្វើការផ្សព្វផ្សាយទូលំទូលាយប្រាប់ប្រជាពលរដ្ឋឲ្យបានយល់ដឹងចំពោះផលវិបាក របៀបការពាររួចហើយ ៖ «យើងបានជួយពន្យល់ដែរ ប៉ុន្តែប្រជាពលរដ្ឋគាត់ថា ឥឡូវហ្នឹងគាត់ប្រើអណ្ដូងកន្លែងហ្នឹងវាញឹកញាប់អស់ហើយ អ៊ីចឹងគាត់ធ្លាប់ប្រើយូរណាស់ហើយ វាអត់អី»។
ទោះបីជាយ៉ាងនេះក្តី ប្រជាពលរដ្ឋជាច្រើនក្នុងឃុំព្រៃមូល ហាក់ពុំមានការព្រួយបារម្ភចំពោះបញ្ហានេះឡើយ។
ស្ត្រីវ័យចំណាស់ឈ្មោះ អ៊ុក សារ៉េន មានប្រសាសន៍ថា ៖ «ប្រើអណ្ដូងខ្លះ ដែលយើងយកទៅដាំទៅ មានជាតិកំបោរវាកកនៅបាតកំសៀវ ក្នុងអារម្មណ៍ហ្នឹងយើងគិត យើងភ័យដែរ ហើយក៏អត់ដឹងគិតថា ធ្វើម៉េចតទៅទៀត ចេះតែប្រើទៅ»។
អនុប្រធានមន្ទីរអភិវឌ្ឍន៍ជនបទខេត្តកំពង់ឆ្នាំង ទទួលបន្ទុកផ្នែកអាសេនិក លោក សុខ ចំណាន ក៏បានឲ្យដឹងផងដែរថា ខេត្តកំពង់ឆ្នាំងគឺជាខេត្តគោលដៅមួយក្នុងចំណោមខេត្តចំនួន៧ ក្នុងទូទាំងប្រទេសដែលកម្មវិធីស្រាវជ្រាវជាតិអាសេនិករបស់អង្គការយូនីសេហ្វកំពុងធ្វើប្រតិបត្តិការ។
លោកបន្តថា ជាតិអាសេនិកអាចបង្កជាជំងឺជាច្រើនយ៉ាងដល់សព៌ាង្គកាយមនុស្ស ហើយជំងឺដែលកើតឡើងដោយសារឥទ្ធិពលរបស់វាគឺពុំអាចព្យាបាលជាឡើយ៕