អ្នកនាំពាក្យរបស់រដ្ឋាភិបាលកម្ពុជា បានចេញផ្សាយសេចក្តីថ្លែងការណ៍មួយចុះថ្ងៃ២៣ វិច្ឆិកា បដិសេធព័ត៌មានរបស់ទីភ្នាក់ងារព័ត៌មានថៃដែលបានលើកឡើងថា បុត្រីរបស់លោកនាយករដ្ឋមន្រ្តី ហ៊ុន សែន កំពុងមានគម្រោងកាន់កាប់ភាគហ៊ុននៃក្រុមហ៊ុនត្រួតពិនិត្យសេវាកម្មចរាចរណ៍ផ្លូវអាកាសកម្ពុជា (CATS)នោះ។
សេចក្តីថ្លែងការណ៍បានលើកឡើងថា ការដែលរដ្ឋាភិបាលកម្ពុជាបាននិងកំពុងធ្វើបន្ទាប់ពីបានចាត់តាំងមន្រ្តីទៅត្រួតពិនិត្យនិងគ្រប់គ្រងក្រុមហ៊ុន CATS ជាបណ្តោះអាសន្ននោះ គឺជាវិធានការដើម្បីការពារសន្តិសុខជាតិនិងសុវត្ថិភាពជូនថ្នាក់ដឹកនាំតែប៉ុណ្ណោះ។
បន្ទាប់ពីមានការសម្រេចយ៉ាងច្បាស់លាស់របស់តុលាការកម្ពុជារួចហើយ រដ្ឋាភិបាលនឹងប្រកាន់យកជំហរមួយជាក់លាក់ អំពីកិច្ចដំណើរការនៃការគ្រប់គ្រងក្រុមហ៊ុន CATS នេះ។
សេចក្តីថ្លែងការណ៍បានលើកឡើងថា អ្នកនាំពាក្យរដ្ឋាភិបាលកម្ពុជា សូមសម្តែងការសោកស្តាយយ៉ាងខ្លាំងចំពោះការចោទប្រកាន់ដោយគ្មានមូលដ្ឋានច្បាស់លាស់នេះ ហើយសម្តែងការងឿងឆ្ងល់ថា ហេតុអ្វីបានជាមានការប្រឌិតឡើងនូវព័ត៌មានបែបនេះ។
សេចក្តីថ្លែងការណ៍របស់អ្នកនាំពាក្យរដ្ឋាភិបាលកម្ពុជា បានលើកឡើងថា កន្លងមកនេះរដ្ឋាភិបាល លោក អាភីស៊ិត វេឆាឈីវ៉ាក់ (Abhisit Vejjajiva) បានរំលោភលើច្បាប់អន្តរជាតិ ឬកិច្ចព្រមព្រៀងនានា ដូចជាសាលដីការបស់តុលាការយុត្តិធម៌អន្តរជាតិក្រុងឡាអេ ឆ្នាំ១៩៦២ ស្តីពីសំណុំរឿងក្តីប្រាសាទព្រះវិហារ។
ថ្មីៗនេះរដ្ឋាភិបាលលោក អាភីស៊ិត បានសម្រេចលុបចោលជាឯកតោភាគីនូវអនុស្សរណៈយោគយល់គ្នា ស្តីពីការរៀបចំចរចាដើម្បីឈានទៅដល់ការធ្វើអាជីវកម្មរួម ប្រេងនិងឧស្ម័ននៅក្នុងតំបន់ត្រួតស៊ីគ្នាខ្ពង់រាបបាតសមុទ្រ ដែលត្រូវដើរទន្ទឹមគ្នា និងការចរចាកំណត់ព្រំដែនសមុទ្រនៅតំបន់នោះ ហើយបានចុះហត្ថលេខាជាមួយរដ្ឋាភិបាលកម្ពុជានៅឆ្នាំ២០០១កន្លងមក។ ទង្វើទាំងអស់នេះបានគូសបញ្ជាក់យ៉ាងច្បាស់នូវការរំលោភទាំងកំរោលនូវគោលការណ៍ច្បាប់អន្តរជាតិទាក់ទងទៅនឹងកាតព្វកិច្ចនៃការអនុវត្តកិច្ចព្រមព្រៀងទ្វេភាគី ពហុភាគី ឬសន្ធិសញ្ញាដែលមានចែងនៅក្នុងអនុសញ្ញាទីក្រុងវីយែន ស្តីពីនីតិសន្ធិសញ្ញាឆ្នាំ១៩៦៩។
សេចក្តីថ្លែងការណ៍បានអះអាងថា មកទល់ពេលនេះរដ្ឋាភិបាលកម្ពុជា បាននិងកំពុងអនុវត្តយ៉ាងខ្ជាប់ខ្ជួននូវកាតព្វកិច្ចរបស់ខ្លួនជារដ្ឋហត្ថលេខីលើរាល់កិច្ចព្រមព្រៀង និងសន្ធិសញ្ញាអន្តរជាតិទាំងឡាយដែលមានជាធរមាន ហើយរដ្ឋាភិបាលកម្ពុជាពុំដែលបានរំលោភលើកិច្ចព្រមព្រៀងណាមួយដែលខ្លួនបានចុះហត្ថលេខាឡើយ៕