ក្រសួងការបរទេសកម្ពុជា បានជូនដំណឹងជាផ្លូវការហើយ នៅថ្ងៃទី៥ កុម្ភៈនេះ ទៅក្រុមប្រឹក្សាសន្តិសុខនៃអង្គការសហប្រជាជាតិ (United Nations Security Council) អំពីទាហានថៃចំនួន ៣០០នាក់ បានចូលឈ្លានពានទឹកដីកម្ពុជា ដោយប្រើពាក្យថា ថៃបានឈ្លានពានកម្ពុជា ទាំងកម្រោល ដោយថៃ បានលើកទ័ពចូលតំបន់ក្បែរប្រាសាទព្រះវិហារច្រើនមុខព្រួញ កាលពីថ្ងៃទី៤ និង ៥ កុម្ភៈនេះ។
លិខិតដែលចុះហត្ថលេខាដោយលោក ហោ ណាំហុង រដ្ឋមន្ត្រីក្រសួងការបរទេសកម្ពុជា ដែលផ្ញើជូនលោក ម៉ារៀ លូហ្សា រីប៊ែរ៉ូ វីយូទី (Maria Luiza Riberio Viotti) ប្រធានក្រុមប្រឹក្សាអង្គការសហប្រជាជាតិបង្ហាញថា តំបន់ដែលទាហានថៃ បានឈ្លានពាននោះ មានដូចជា ចំណុចតំបន់សម្បុកឃ្មុំ ចម្ងាយពីកាំជណ្ដើរប្រាសាទព្រះវិហារ ៥០០ម៉ែត្រ និងចំណុចវាលឥន្ទ្រី និងភ្នំទ្រព្យ ដែលមានចម្ងាយប្រហែលពី ១.១២០ ទៅ ១.៦០០ម៉ែត្រ ពីបន្ទាត់ព្រំដែន ហើយទាហានថៃ បានបាញ់ផ្តក់កាំភ្លើងធំទំហំ ១៣០ និង ១៥៥មិល្លីម៉ែត្រ ចូលក្នុងទឹកដីកម្ពុជា ចម្ងាយប្រហែល ២០គីឡូម៉ែត្រ ដែលបណ្ដាលឲ្យបែកបាក់ខូចខាតប្រាង្គប្រាសាទព្រះវិហារ ដែលជាកេរមរតករបស់បេតិកភណ្ឌពិភពលោកយ៉ាងធ្ងន់ធ្ងរ និងបណ្ដាលឲ្យទាហានខ្មែរ រួមទាំងជនស៊ីវិលរបួស និងស្លាប់ ១០នាក់ថែមទៀត។
លិខិតដដែលបាលរំឭកថ្ងៃខែដែលថៃ បានឈ្លានពានកម្ពុជា ចាប់តាំងពីថ្ងៃទី១៥ ខែកក្កដា ឆ្នាំ២០០៨ មក ហើយបានចោទភាគីថៃថា បានរំលោភលើសេចក្ដីសម្រេចរបស់តុលាការអន្តរជាតិ អង្គការសហប្រជាជាតិ រំលោភលើកតិកាមិត្តភាពតំបន់អាស៊ីអាគ្នេយ៍ និងបំពានអនុស្សរណៈយោគយល់គ្នារវាងភាគីទាំងពីរ កម្ពុជា-ថៃ ស្ដីពីបញ្ហាព្រំដែននៃប្រទេសទាំងពីរ។
លិខិតដដែលនោះបានស្រង់ប្រសាសន៍របស់លោកឧបនាយករដ្ឋមន្ត្រី ហោ ណាំហុង ថា ៖ "ដោយហេតុផលនៃការឈ្លានពានយ៉ាងកម្រោលម្ដងហើយម្ដងទៀតរបស់ប្រទេសថៃដូច្នេះ ខ្ញុំសូមអបអរ និងដឹងគុណបំផុត បើសិនជាឯកឧត្ដមអាចចែកចាយលិខិតនេះទៅដល់សមាជិករបស់ក្រុមប្រឹក្សាសន្តិសុខសហប្រជាជាតិទាំងអស់ ដើម្បីទុកជាឯកសារផ្លូវការ"។
អំឡុងពេលជម្លោះមិនឈ្នះមិនចាញ់ជាងពីរឆ្នាំនេះ ភាគីកម្ពុជាមានគម្រោងប្ដឹងទៅក្រុមប្រឹក្សាសន្តិសុខអង្គការសហប្រជាជាតិច្រើនដងមកហើយ តែភាគីថៃ បានទទូចសុំឲ្យភាគីកម្ពុជា កុំប្ដឹងទៅអង្គការសហប្រជាជាតិ ដោយសុំឲ្យដោះស្រាយជម្លោះជាទ្វេភាគីវិញ ចំណែកភាគីកម្ពុជា ក៏បានយល់ព្រមតាម ប៉ុន្តែលើកនេះភាគីកម្ពុជា បានប្ដូរចិត្ត។
លោក កុយ គួង រដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជាបន្ថែម ៖ «ក្នុងលិខិតបានបញ្ជាក់ថា កម្ពុជាគ្មានការជ្រើសរើសក្រៅពីការតបតវិញ ក្នុងន័យការពារខ្លួន ការពារបូរណភាពទឹកដី។ សំខាន់គឺឲ្យក្រុមប្រឹក្សានេះដឹងថា អ្នកណាជាអ្នកឈ្លានពាន បំពានច្បាប់អន្តរជាតិ អ្នកណាឈ្លានពានមកលើអ្នកណា។ សំខាន់គឺកម្ពុជា ជាអ្នករងគ្រោះ។ គឺលើកមុនយើងបានធ្វើលិខិតម្ដងរួចមកហើយ ឥឡូវនេះជាលិខិតទី២ របស់យើងអំពីការរំលោភឈ្លានពានយ៉ាងកម្រោលពីសំណាក់កងទ័ពថៃ»។
ទោះយ៉ាងណាក្ដី ភាគីថៃនៅតែទទូចដដែល ហើយជាថ្មីម្ដងទៀត នៅថ្ងៃទី៤ កុម្ភៈនេះ លោក កាស៊ីត ភិរម្យ (Kasit Phiromya) រដ្ឋមន្ត្រីក្រសួងការបរទេសថៃ ដែលបានមកប្រជុំជាមួយសមភាគីកម្ពុជា លោក ហោ ណាំហុង នៅសប្ដាហ៍នេះ បានថ្លែងប្រាប់អ្នកកាសែតនៅអាកាសយានដ្ឋានអន្តរជាតិភ្នំពេញ មុនត្រឡប់ទៅប្រទេសថៃវិញថា លោកបានសុំឲ្យភាគីកម្ពុជា ដោះស្រាយជម្លោះនេះជាទ្វេភាគី គឺជាមួយថៃ បន្តទៅទៀត។
ជម្លោះព្រំដែននៅក្បែរប្រាសាទព្រះវិហារ រវាងកម្ពុជា-ថៃ បានចាប់ផ្ដើមប្រឈមមុខផ្នែកយោធាដាក់គ្នាចាប់តាំងពីថ្ងៃទី១៥ កក្កដា ឆ្នាំ២០០៨ មកម្ល៉េះ ដែលបណ្ដាលឲ្យភាគីទាំងពីរស្លាប់ និងរបួសរៀងខ្លួន។
នៅថ្ងៃទី៤ និងទី៥ ខែកុម្ភៈនេះ កងទាហានទាំងពីរបានពើបប្រយុទ្ធផ្ទួនៗគ្នាពីរលើកទៀត ដែលក្រសួងការបរទេសកម្ពុជា ប្រកាសថា បណ្ដាលឲ្យទាហានខ្មែរ និងជនស៊ីវិលស្លាប់ និងរបួសជាង ១០នាក់។
ចំណែកកាសែតថៃ ឌឹ ណេហ្សិន (The Nation) ចុះផ្សាយនៅថ្ងៃទី៥ ខែកុម្ភៈនេះថា អ្នកភូមិថៃម្នាក់បានស្លាប់ និងទាហានថៃ ៤នាក់របួស និងទាហានថៃ ៤នាក់ផ្សេងទៀតត្រូវបានភាគីកម្ពុជាចាប់ខ្លួន ក្នុងការវាយប្រយុទ្ធគ្នាកាលពីថ្ងៃសុក្រ ទី៤ ខែកុម្ភៈ ប៉ុន្តែត្រូវបានដោះលែងទៅវិញក្រោយពេលប្រយុទ្ធ ហើយនៅក្នុងការប្រយុទ្ធគ្នាមួយប្រាវទៀតនៅព្រឹកថ្ងៃសៅរ៍ ទី៥ ខែកុម្ភៈ ព្រឹកឡើង បណ្ដាលឲ្យទាហានថៃម្នាក់ស្លាប់ និង ៤នាក់ទៀតរបួស។ ក៏ប៉ុន្តែទីភ្នាក់ងារសារព័ត៌មានកម្ពុជា (AKP) ចុះផ្សាយនៅថ្ងៃទី៥ ខែកុម្ភៈថា ទាហានថៃ រួមទាំងជនស៊ីវិល ១៦នាក់បានស្លាប់ ហើយកម្ពុជា ចាប់ខ្លួនទាហានថៃ ៥នាក់។
ទាក់ទងទៅនឹងជម្លោះប្រដាប់អាវុធនេះដែរ សហរដ្ឋអាមេរិក បានចេញសេចក្ដីប្រកាសព័ត៌មានមួយថា សហរដ្ឋអាមេរិកបានតាមដានព្រឹត្តិការណ៍ទំនាស់ព្រំដែននៃប្រទេសទាំងពីរយ៉ាងដិតដល់ អំពាវនាវដល់ភាគីទាំងពីរ កម្ពុជា-ថៃ ឲ្យចេះអត់ធ្មត់ដាក់គ្នាដែលជាប្រទេសភូមិផងរបងជាមួយនៅក្នុងតំបន់អាស៊ីដូចគ្នា។
សេចក្ដីប្រកាសព័ត៌មានបានស្រង់សម្ដី អ្នកនាំពាក្យក្រសួងការបរទេសអាមេរិក លោក ហ្វីលីព ក្រៅដ៍ឡី (Philip Crowley) ដោយបានអំពាវនាវថា ៖ "សហរដ្ឋអាមេរិកសុំជំរុញភាគីទាំងពីរឲ្យអត់ធ្មត់ខ្លាំងបំផុត ហើយប្រកាន់យករាល់ជំហានណាដែលអាចកាប់បន្ថយភាពតានតឹង ដើម្បីចៀសវាងការប៉ះទង្គិចគ្នាទៅថ្ងៃក្រោយទៀត"។
ការប្រយុទ្ធគ្នារវាងកងទ័ពថៃ-កម្ពុជា លើកនេះ បានធ្វើឲ្យអង្គការសមាគមប្រជាជាតិអាស៊ាន (ASEAN) ព្រួយបារម្ភផងដែរ។
អគ្គលេខាធិការសមាគមអាស៊ាន លោកបណ្ឌិត ស៊ូរិន ពិតសុវណ្ណ (Surin Pitsuwan) មានប្រសាសន៍ថា លោកបានទាក់ទងរដ្ឋមន្ត្រីការបរទេសនៃប្រទេសទាំងពីរ គឺលោក ហោ ណាំហុង និងលោក កាស៊ីត ភិរម្យ (Kasit Piromya) ហើយក៏បានអំពាវនាវឲ្យភាគីទាំងពីរកុំឲ្យក្ដៅក្រហាយដាក់គ្នាផងដែរ ហើយសុំឲ្យភាគីទាំងពីរចូលតុចរចាគ្នាជាបន្ទាន់។
លោក ស៊ូរិន ពិតសិវណ្ណ ដែលជាជនជាតិថៃ ហើយត្រូវបានកាសែតថៃ ឌឹ ណេហ្សិន ស្រង់សម្ដីដែរនោះ បានបញ្ជាក់ថា ការប្រយុទ្ធគ្នារវាងទាហានថៃ និងទាហានខ្មែរ ធ្វើឲ្យប៉ះពាល់ដល់ស្ថិរភាពសន្តិសុខ និងសេចក្ដីទុកចិត្តក្នុងតំបន់ ប៉ះពាល់ដល់វិស័យទេសចរណ៍ សេដ្ឋកិច្ច ដែលកំពុងតែអភិវឌ្ឍន៍នៅក្នុងតំបន់៕