រដ្ឋមន្ត្រីក្រសួងការពារជាតិកម្ពុជា លោកនាយឧត្ដមសេនីយ៍ ទៀ បាញ់ និងជាឧបនាយករដ្ឋមន្ត្រី បានបញ្ជាក់នៅថ្ងៃទី១៤ ខែមីនា ឆ្នាំ២០១២ ថា កងទ័ពកម្ពុជា និងកងទ័ពថៃ នៅមិនទាន់អាចដកចេញពីតំបន់គ្មានកងទ័ពបណ្ដោះអាសន្ននោះនៅឡើយទេ ដោយសារតែក្រុមការងាររបស់គណៈកម្មាធិការព្រំដែនទូទៅ កម្ពុជា-ថៃ (GBC) នៅមិនទាន់បានចុះសម្រុងជាមួយគ្នាលើការកំណត់ពេលវេលា និងចំនួនកងទ័ព។
លោកនាយឧត្ដមសេនីយ៍ ទៀ បាញ់ បានមានប្រសាសន៍ប្រាប់អ្នកកាសែតនៅក្រសួងការពារជាតិថា ក្រុមការងារចម្រុះកម្ពុជា និងថៃ នៅតែបន្តដោះស្រាយ៖ «តែរឿងជាក់ស្ដែងមួយចំនួន គឺហាក់ដូចជាមិនទាន់មានស្អីដែលធ្ងន់ធ្ងរដូចមុនទៀតទេ។ ...ឥឡូវហ្នឹងវាធូរស្រាលបានមួយចំណែក ...អារឿងហ្នឹងគឺមានបញ្ហាខ្លះ គឺវាត្រូវតែឯកភាពគ្នាទាំងពីរដែរ បើមិនអ៊ីចឹងវាធ្វើអីកើត វាត្រូវតែឯកភាពទាំងសងខាង ធ្វើយ៉ាងណា ថ្ងៃណា ពេលណា?»។
ទាក់ទងនឹងបញ្ហានៃការពន្យារពេលការដកកងទ័ពនេះ អ្នកវិភាគនយោបាយ និងជម្លោះព្រំដែនកម្ពុជា និងថៃ លោកបណ្ឌិត សុខ ទូច បានមានប្រសាសន៍ថា ការបង្កើតក្រុមការងារនេះ គឺជាបន្ទុកថ្មីមួយទៀត ធ្វើឲ្យការដោះស្រាយប្រឈមមុខនឹងភាពស្មុគស្មាញ។
លោក សុខ ទូច៖ «អ៊ីចឹងបើគេចង់ដោះស្រាយ មិនចាំបាច់បង្កើតអីទេ។ យើងយកអ្វីដែលជាតួនាទីរបស់អាស៊ានមកប្រើប្រាស់ទៅវាចប់ហើយ ក្រោមការសង្កេតការណ៍របស់ឥណ្ឌូនេស៊ីហ្នឹង ពីព្រោះពេលដែលថៃ មកឈ្លានពាន ខ្មែរមានបានបង្កើតគណៈកម្មការដែរឬទេ? អ៊ីចឹងវាគ្រាន់តែជាជំងឺពន្យារកំណើតនៃជំងឺលាប់របស់ប្រទេសថៃ តែប៉ុណ្ណឹងទេ»។
អស់រយៈពេល ៨ខែមកហើយ តាំងពីដីកាបង្គាប់របស់តុលាការយុត្តិធម៌អន្តរជាតិនៅថ្ងៃទី១៨ ខែកក្កដា ឆ្នាំ២០១១ កន្លងទៅនេះ គឺកងទ័ពកម្ពុជា និងកងទ័ពថៃ នៅមិនទាន់បានដកចេញពីតំបន់គ្មានកងទ័ពបណ្ដោះអាសន្ន នៅក្បែរប្រាសាទព្រះវិហារនោះនៅឡើយទេ។
រដ្ឋមន្ត្រីក្រសួងការបរទេសឥណ្ឌូនេស៊ី លោក ម៉ាទី ណាតាឡេហ្គាវ៉ា Marty Natalegawa) ដែលបានមកទស្សនកិច្ចនៅកម្ពុជា នៅថ្ងៃទី៥ ខែមីនា ឆ្នាំ២០១២ កន្លងទៅនេះ បានបញ្ជាក់ថា ប្រទេសឥណ្ឌូនេស៊ី បានត្រៀមខ្លួនរួចហើយ ដើម្បីបញ្ជូនក្រុមអ្នកសង្កេតការណ៍មកឈរជើង និងត្រួតពិនិត្យលើបទឈប់បាញ់រវាងកងទ័ពកម្ពុជា និងកងទ័ពថៃ នៅតំបន់ក្បែរប្រាសាទព្រះវិហារនោះ។
កន្លងមកប្រទេសឥណ្ឌូនេស៊ី មានគំរោងការបញ្ជូនអ្នកសង្កេតការណ៍សរុបចំនួន ៣០នាក់ គឺឈរជើងនៅភាគីកម្ពុជា ១៥នាក់ និងភាគីថៃ ចំនួន ១៥នាក់។ ប៉ុន្តែផែនការនោះត្រូវបានពន្យាររហូតដល់ពេលនេះ ដោយសារត្រូវរង់ចាំការសំរេចពីគណៈកម្មាធិការព្រំដែនទូទៅ កម្ពុជា-ថៃ ជាមុនសិន។
រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ និងរដ្ឋមន្ត្រីក្រសួងការពារជាតិថៃ លោក យុទ្ធសក្ដិ សាស៊ីប្រាផា (Yuthasak Sasiprapha) ដែលជាសហប្រធាននៃគណៈកម្មាធិការព្រំដែនទូទៅ កម្ពុជា-ថៃនោះ បានឯកភាពគ្នាបង្កើតឲ្យមានក្រុមការងារចម្រុះកម្ពុជា-ថៃ មួយនៅថ្ងៃទី២២ ខែធ្នូ ឆ្នាំ២០១១ កន្លងទៅនេះ ដើម្បីដោះស្រាយឲ្យមានការដកកងទ័ពតាមសាលដីការបស់តុលាការយុត្តិធម៌អន្តរជាតិនោះ ប៉ុន្តែការដកកងទ័ពមិនទាន់បានធ្វើនៅឡើយ។
ទាក់ទងនឹងវិស័យកងទ័ពនេះដែរ រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ នៅថ្ងៃទី១៤ ខែមីនា ឆ្នាំ២០១២ បានមានប្រសាសន៍ថា ការធ្វើលំហាត់យោធារួមគ្នារវាងកងទ័ពកម្ពុជា និងកងទ័ពសហរដ្ឋអាមេរិក គឺជាការផ្លាស់ប្ដូរបទពិសោធន៍គ្នាឲ្យមានជំនាញកាន់តែប្រសើរឡើងថែមទៀត។
សេចក្ដីប្រកាសព័ត៌មានដោយស្ថានទូតសហរដ្ឋអាមេរិកនៅកម្ពុជា បានឲ្យដឹងថា លំហាត់យោធារួមគ្នានោះ ឬហៅថា ឆ្មាំអង្គរ ឆ្នាំ២០១២ កំពុងតែប្រព្រឹត្តទៅនៅខេត្តកំពត និងខេត្តកំពង់ស្ពឺ ចាប់ពីថ្ងៃទី១៣ ខែមីនា ដល់ថ្ងៃទី២២ ខែមីនា ឆ្នាំ២០១២ ដែលមានកងទ័ពសរុបជាង ៥០០នាក់៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។