ថ្ងៃទី១ ខែមករា ឆ្នាំ២០១២ ជាថ្ងៃដំបូងសំរាប់ស្ថានីយទូរទស្សន៍ ហង្សមាស បានចាប់ផ្ដើមផ្សាយសាកល្បងកម្មវិធីរបស់ខ្លួនហើយ ដើម្បីធ្វើការប្រកួតប្រជែងជាមួយទូរទស្សន៍ដទៃទៀត ដែលកំពុងមានសកម្មភាពនៅកម្ពុជា។
ទន្ទឹមនឹងនេះដែរ ស្ថានីយទូរទស្សន៍ជាតិ ដែលជាទូរទស្សន៍រដ្ឋ ក៏បានបន្ថែមម៉ោងផ្សាយរបស់ខ្លួនដែរ ចាប់ពីថ្ងៃទី១ ខែមករា ឆ្នាំ២០១២ ដើម្បីប្រកួតប្រជែងជាមួយទូរទស្សន៍ឯកជន ដែលមានទាំងអស់ប្រហែលចំនួន ១០ស្ថានីយ។
អគ្គនាយកនៃស្ថានីយទូរទស្សន៍ហង្សមាស ដែលជាទូរទស្សន៍ឯកជន លោក អេង ឆាយងួន មានប្រសាសន៍នៅថ្ងៃទី២ មករា ថា ស្ថានីយទូរទស្សន៍របស់លោកនឹងផ្សាយជាផ្លូវការនៅដើមខែកុម្ភៈ ខាងមុខ ផ្សាយពីម៉ោង ៦ព្រឹក ដល់ម៉ោង ១១យប់ ដែលនឹងផ្សាយព័ត៌មានជាតិ ព័ត៌មានអន្តរជាតិ និងកម្មវិធីផ្សាយដទៃទៀត។
លោក អេង ឆាយងួន បានបញ្ជាក់អំពីគោលបំណងនៃការបើកស្ថានីយទូរទស្សន៍ហង្សមាស ដូច្នេះ៖ «ដើម្បីរួមចំណែកជាមួយរដ្ឋាភិបាល ក្នុងការលើកកម្ពស់ប្រព័ន្ធផ្សព្វផ្សាយនៅកម្ពុជា»។
ស្របពេលជាមួយគ្នានេះដែរ ចាប់ពីថ្ងៃទី១ មករា ដែលជាថ្ងៃដំបូងនៃថ្ងៃចូលឆ្នាំសាកល ឆ្នាំ២០១២ ស្ថានីយទូរទស្សន៍ជាតិកម្ពុជា (ទ.ទ.ក.) ក៏បានបន្ថែមម៉ោងផ្សាយរបស់ខ្លួនដែរ ដែលកាលពីមុនគេសម្រាកការផ្សាយចាប់ពីព្រឹកថ្ងៃពុធ ដល់ព្រឹកថ្ងៃសុក្រ។
អគ្គនាយកនៃទូរទស្សន៍ជាតិកម្ពុជា លោក គឹម គុណវឌ្ឍន៍ មានប្រសាសន៍ថា ទូរទស្សន៍ជាតិកម្ពុជា បានបន្ថែមម៉ោងផ្សាយរបស់ខ្លួន ផ្សាយជារៀងរាល់ថ្ងៃក្នុងមួយថ្ងៃពី១៧ ទៅ ១៨ម៉ោង ផ្សាយ ៧ថ្ងៃក្នុងមួយសប្ដាហ៍។ លោកបញ្ជាក់ថា ការបន្ថែមម៉ោងផ្សាយនេះ នឹងបង្កើតកម្មវិធីសំខាន់ៗចំនួន ៤ រួមមានព័ត៌មានពេលព្រឹក ដែលនឹងចាប់ផ្ដើមផ្សាយនៅដើមខែកុម្ភៈ ខាងមុខ។
កម្មវិធីបណ្ដុះបណ្ដាលអំពីជំនាញ មានដូចជាកម្មវិធីកសិកម្ម កម្មវិធីបណ្ដុះវិជ្ជាជីវៈ ដូចជាបង្រៀនជំនាញខ្លី និងមធ្យម ជួសជុលបរិក្ខារសង្ហារិម ជួសជុលម៉ូតូ និងកម្មវិធីធ្វើជាមួយដៃគូមួយចំនួនទៀត។
លោក គឹម គុណវឌ្ឍន៍ បានអះអាងថា កម្មវិធីទាំងនេះនឹងចាប់ផ្ដើមផ្សាយនៅដើមខែមីនា ខាងមុខនេះ វាអាស្រ័យទៅលើពេលវេលាដែលអាចទៅបាន។ លោកបន្ថែមថា លទ្ធភាពដែលអាចបង្កើនម៉ោងផ្សាយបាននេះ ដោយសារមានការគាំទ្រពីក្រសួងព័ត៌មាន និងរដ្ឋាភិបាល ដែលបានផ្ដល់ម៉ាស៊ីនផ្សាយកាលពីខែវិច្ឆិកា ឆ្នាំ២០១១ កន្លងទៅ។
មន្ត្រីគណបក្សប្រឆាំងបានរិះគន់ថា ទោះបីជាទូរទស្សន៍ជាតិកម្ពុជា ដែលជាទូរទស្សន៍រដ្ឋ បង្កើតឡើងរាប់សិបឆ្នាំមក មានការបន្ថែមម៉ោងផ្សាយ និងបង្កើនកម្មវិធីថ្មីៗទៀតក៏ដោយ ក៏វាមិនផ្ដល់ប្រយោជន៍ដល់ប្រជាពលរដ្ឋទាំងស្រុងនោះឡើយ។
លោក យឹម សុវណ្ណ ជាមន្ត្រីនាំពាក្យនៃគណបក្ស សម រង្ស៊ី។ លោកមានប្រសាសន៍ថា ទូរទស្សន៍ជាតិ ផ្សាយតែសកម្មភាពរបស់គណបក្សប្រជាជនកម្ពុជា គឺមិនបានផ្សាយអំពីរឿងអយុត្តិធម៌ដែលកំពុងកើតមាននៅក្នុងសង្គមនោះឡើយ ដូចជាករណីបណ្ដេញអ្នកភូមិចេញពីដីធ្លីជាដើម។
លោក គឹម គុណវឌ្ឍន៍ បានបដិសេធចំពោះការចោទប្រកាន់នេះ ដោយលោកបានលើកហេតុផលថា ការផ្សាយព័ត៌មានកន្លងមកនោះផ្សាយទូទៅ ពិសេសគឺសកម្មភាពរបស់រដ្ឋាភិបាលដែលមន្ត្រីរដ្ឋាភិបាលទាំងនោះ មកពីគណបក្សប្រជាជនកម្ពុជា ដូច្នេះហើយបានជាគេមើលឃើញថា ការផ្សាយវាលំអៀងនោះ។
ទូរទស្សន៍ជាតិកម្ពុជា ចំណាយថវិកាអស់ជាង ១០០លានរៀលក្នុងមួយឆ្នាំ។ បច្ចុប្បន្នមានបុគ្គលិកសរុបជាង ៣០០នាក់ ហើយស្ថានីយទូរទស្សន៍នេះនឹងជ្រើសរើសយកបុគ្គលិកប្រមាណ ៧០នាក់បន្ថែមទៀតនៅពេលខាងមុខ ក្នុងពេលមានការងារផ្សាយបន្ថែមម៉ោង៕