ពលរដ្ឋខ្មែរម្នាក់នៅសង្កាត់អូរស្មាច់ ក្រុងសំរោង ខេត្តឧត្តរមានជ័យ ជាប់ព្រំដែនខ្មែរ-ថៃ ត្រូវទាហានឈុតខ្មៅថៃនៃស្រុកកាប់ជើង ខេត្តសុរិន្ទ ចាប់ខ្លួនបញ្ជូនទៅកាត់ទោស ខណៈដែលបុរសខ្មែរម្នាក់នោះនិងអ្នកភូមិមួយចំនួនទៀតបាននាំគ្នាស៊ីឈ្នួលលីឈើកែច្នៃជាកូនឈើក្រឡឹង លួចឆ្លងដែនពេលយប់យកទៅលក់ក្នុងទឹកដីថៃកាលពីពេលថ្មីៗ។
ស្ត្រីឈ្មោះ ចាយ ហូយ រស់នៅភូមិអភិវឌ្ឍន៍ ក្នុងសង្កាត់អូរស្មាច់ បានមានប្រសាសន៍កាលពីព្រឹកថ្ងៃអាទិត្យ ទី១៣ ខែធ្នូ ថា ប្តីរបស់គាត់ឈ្មោះ អៀង ធា អាយុ ៤៩ឆ្នាំ ត្រូវទាហានថៃចាប់ខ្លួនកាលពីរំលងអធ្រាត្រថ្ងៃទី១២ ខណៈដែលគាត់និងអ្នកភូមិ ៩នាក់ផ្សេងទៀត បានស៊ីឈ្នួលលីឈើក្រឡឹងលួចចូលទៅក្នុងលក់ក្នុងទឹកដីថៃ ហើយបានពើបប្រទះនឹងកងទាហានឈុតខ្មៅថៃមួយក្រុមរបស់ស្រុកកាប់ជើងដែលពួនស្ទាក់នោះ។
អ្នកស្រី ចាយ ហូយ បានឲ្យដឹងថា ៖ «អាឈើក្រឡឹងតូចៗនោះ ឈើសុក្រមនិងឈើធ្នង់ ១០ដើម ស៊ីឈ្នួលលីឲ្យគេ គេឲ្យ ៣០០(បាត) ក៏លីទៅ! ឃើញគេទៅ ក៏ទៅនឹងគេទៅ! អត់លុយទិញអង្ករទិញអីហូប ក៏មានរឿងបណ្តោយ។ ខ្ញុំទៅជួបកន្លែងហ្នឹង កាប់ជើង ម្សិលមិញ គេថា គេបញ្ជូនទៅសុរិន្ទ»។
ទោះយ៉ាងណាមន្ត្រីសាលាខេត្តឧត្តរមានជ័យបានឆ្លើយតបថា គេពុំទាន់បានទទួលព័ត៌មានស្តីពីប្រជាពលរដ្ឋខ្មែរត្រូវបានទាហានថៃចាប់ខ្លួននោះទេ។
ជំនួយការអភិបាលខេត្តឧត្តរមានជ័យ លោក ឈឹម ស៊ីវុធ បានមានប្រសាសន៍ថា ការចាប់ខ្លួនប្រជាពលរដ្ឋខ្មែរនោះគឺអាជ្ញាធរនឹងធ្វើការទាក់ទងមន្ត្រីថៃដើម្បីសុំឲ្យដោះលែងត្រឡប់មកវិញ ក៏ប៉ុន្តែអាជ្ញាធរខេត្តមិនទាន់បានទទួលព័ត៌មានអំពីការចាប់ខ្លួននោះនៅឡើយទេ ពីព្រោះអាជ្ញាធរមូលដ្ឋានមិនទាន់រាយការណ៍មកទេ។
លោក ឈឹម ស៊ីវុធ បានបញ្ជាក់ថា ៖ «បើចាប់ អាហ្នឹងត្រូវតែធ្វើការសុំមកវិញហើយ ប៉ុន្តែខ្ញុំអត់ទាន់បានព័ត៌មានខាងហ្នឹងទេ!»។
ប្រធានប៉ុស្តិ៏នគរបាលសង្កាត់អូរស្មាច់ លោក ម៉ាក បូរិន បានមានប្រសាសន៍ថា ទាហានថៃស្រុកកាប់ជើងពិតជាមានការចាប់ខ្លួនប្រជាពលរដ្ឋខ្មែរម្នាក់កាលពីរំលងអធ្រាត្រថ្ងៃទី១២ ខែធ្នូ បន្ទាប់ពីប្រជាពលរដ្ឋខ្មែរចំនួន ១០នាក់បានស៊ីឈ្នួលលីឈើកែច្នៃក្រឡឹងលួចចូលទៅលក់ក្នុងទឹកដីថៃ។
មន្ត្រីប៉ូលិសដដែលបានឲ្យដឹងទៀតថា មន្ត្រីច្រកព្រំដែនខ្មែរ អូរស្មាច់ បានព្យាយាមទាក់ទងថៃឲ្យដោះលែងដែរ ប៉ុន្តែភាគីថៃបានឆ្លើយតបថា ត្រូវយកទៅកាត់ទោសសិន។
លោក ម៉ាក បូរិន បានមានប្រសាសន៍ថា ៖ «ថាចាប់ ២នាក់ ប៉ុន្តែរត់រួចម្នាក់វិញហើយ។ លីអាឈើកូនក្រឡឹងយកទៅលក់នៅផ្សារថៃ ហើយច្បាប់ស្រុកគេហ្នឹងគឺថា ពាក់ព័ន្ធអនុផលព្រៃឈើហ្នឹងគេចាប់ហើយ កូនក្រឡឹងដូចជាតុ ទូ កូនក្រឡឹងដូចជាក្បាលជណ្តើរ ក្បាលអី!»។
មន្ត្រីនគរបាលអូរស្មាច់បានឲ្យដឹងថា ចាប់តាំងពីដើមឆ្នាំ២០០៩ រហូតមកដល់ពេលនេះមានប្រជាពលរដ្ឋខ្មែរចំនួនប្រមាណជាង ១០នាក់ហើយត្រូវទាហានថៃចាប់ខ្លួនបញ្ជូនទៅកាត់ទោសឯតុលាការ ពាក់ព័ន្ធនឹងការលីឈើក្រឡឹងលួចឆ្លងដែនចូលទៅលក់ក្នុងទឹកដីថៃ៕