CCHR បារម្ភ​ពី​សុវត្ថិភាព​អ្នក​សារព័ត៌មាន

ការ​សម្លាប់ និង​ចាប់​អ្នក​សារព័ត៌មាន​ដាក់​គុក កើត​មាន​ឡើង​ជា​បន្តបន្ទាប់ ជា​ពិសេស​ក្នុង​រយៈ​ពេល​ប៉ុន្មាន​ខែ​ចុង​ក្រោយ​នេះ មាន​អ្នក​កាសែត​មួយ​ចំនួន​ដែល​បំពេញ​ការងារ​របស់​ខ្លួន​នៅ​ភាគ​ខាង​ជើង​នៃ​ប្រទេស ត្រូវ​បាន​គេ​លួច​សម្លាប់ និង​ខ្លះ​ទៀត​រង​គ្រោះ​ថ្នាក់ ឬ​ត្រូវ​អាជ្ញាធរ​ចាប់​ដាក់​គុក​ជាដើម។
ដោយ វោហារ ជាតិ
2012.12.19
Share on WhatsApp
Share on WhatsApp
អ្នក​កាសែត រតនគិរី ៣០៥ ពលរដ្ឋ​នាំ​គ្នា​មក​មើល​សាកសព​អ្នក​សារព័ត៌មាន "វីរជន​ខ្មែរ" លោក ហង្ស សិរីឧត្ដម ដែល​ត្រូវ​គេ​រក​ឃើញ​នៅ​ក្នុង​ឃ្លុប​ក្រោយ​រថយន្ត នា​ឃុំ​ចាអ៊ុង ស្រុក​អូរជុំ ខេត្ត​រតនគិរី នៅ​ថ្ងៃ​ទី​១១ ខែ​កញ្ញា ឆ្នាំ​២០១២។
Adhoc Photo

មន្ត្រី​មជ្ឈមណ្ឌល​សិទ្ធិ​មនុស្ស​កម្ពុជា (CCHR) នៅ​ថ្ងៃ​ទី​១៩ ខែ​ធ្នូ បាន​សម្ដែង​ក្ដី​បារម្ភ​អំពី​សេរីភាព​សារព័ត៌មាន និង​សុវត្ថិភាព​អ្នក​យក​ព័ត៌មាន ហើយ​បាន​អំពាវ​សុំ​ឲ្យ​រដ្ឋាភិបាល​ចាត់​វិធានការ​ការពារ​ជា​បន្ទាន់។

កញ្ញា សន រ៉ាមណា មន្ត្រី​មជ្ឈមណ្ឌល​សិទ្ធិ​មនុស្ស​កម្ពុជា បាន​ចាត់​ទុក​ថា ការ​ចាប់​អ្នកកាសែត​ដាក់គុក និង​ឃាតកម្ម​លើ​អ្នកកាសែត​នៅ​ពេល​ថ្មី​នេះ គឺ​ជា​ការ​រំលោភ​សិទ្ធិមនុស្ស រំលោភ​សេរីភាព​បញ្ចេញមតិ និង​សេរី​ភាព​សារព័ត៌មាន។

កញ្ញា​បន្ត​ដូច្នេះ៖ «ខ្ញុំ​គិត​ថា វា​ប៉ះ​ពាល់​សិទ្ធិ​សេរីភាព​សារព័ត៌មាន ព្រោះ​ថា អ្នក​សារព័ត៌មាន​ដើរ​តួ​សំខាន់​ណាស់ ព្រោះ​អ្នក​សារព័ត៌មាន​គាត់​ដើរ​តួ​សំខាន់​ណាស់​ក្នុង​សង្គម។ ព្រោះ​គាត់​ជា​ប្រភព​ព័ត៌មាន គាត់​ជា​អ្នក​ស្វែង​រក​ព័ត៌មាន ហើយ​ផ្ដល់​ទៅ​ប្រជាពលរដ្ឋ។ បើ​សិន​សុវត្ថិភាព​អត់​សូវ​បាន​ការពារ ឬ​ក៏​គាត់​រង​ការ​គាប​សង្កត់​ក្នុង​ការ​សរសេរ​ក្នុង​ការ​បញ្ចេញមតិ​របស់​ពួកគាត់ អ៊ីចឹង​សេរីភាព​សារព័ត៌មាន​យើង​នឹង​កាន់​តែ​ធ្ងន់ធ្ងរ​ទៅ​ហើយ»

រយៈ​ពេល​ប៉ុន្មាន​ខែ​ចុង​ក្រោយ​នេះ មាន​អ្នកកាសែត​ខ្លះ​ត្រូវ​គេ​លួច​សម្លាប់ ខ្លះ​ជាប់​គុក។ ជាអាទិ៍ អ្នក​យក​ព័ត៌មាន​ឲ្យ​កាសែត​វរជន​ខ្មែរ ឈ្មោះ ហង្ស សិរីឧត្តម ត្រូវ​បាន​គេ​សម្លាប់​ដាក់​ក្នុង​គូថ​ឡាន​របស់​ខ្លួន នៅ​ដើម​ខែ​កញ្ញា ឆ្នាំ​២០១២ នៅ​ខេត្ត​រតនគិរី ពាក់​ព័ន្ធ​រឿង​រាយការណ៍​អំពី​ការ​ជួញដូរ​ឈើ​មាន​តម្លៃ​ខុស​ច្បាប់។ បន្ទាប់​មក នៅ​ខេត្ត​ក្រចេះ ដែល​ជា​ខេត្ត​ក្បែរ​គ្នា​នោះ​ដែរ អ្នក​សារព័ត៌មាន​ឲ្យ​កាសែត​ទសវត្សរ៍​ថ្មី​ឈ្មោះ តាំង ទ្រី ត្រូវ​បាន​ចាប់​ខ្លួន​តាម​ដីកា​ព្រះ​រាជអាជ្ញា​សាលាដំបូង​ខេត្ត​ក្រចេះ ពី​បទ​ចាប់​ជំរិត​ទារ​ប្រាក់​​ពី​​អ្នក​ជួញ​ឈើ ​ក្រោយ​ពេល​អ្នក​កាសែត​រូប​នោះ រាយការណ៍​អំពី​​រឿង​ជួញ​ឈើ​ខុស​ច្បាប់​ដូច​គ្នា។

មួយ​ថ្ងៃ​ក្រោយ​មក អ្នក​យក​ព័ត៌មាន​វិទ្យុ​អាស៊ីសេរី លោក វិជ័យ អានន្ទ ដែល​បាន​រាយការណ៍​ពី​ការ​ចាប់​ខ្លួន​អ្នក​កាសែត​ឈ្មោះ តាំង ទ្រី នោះ ត្រូវ​បាន​គេ​ឃើញ​ដេក​ដួល​សន្លប់​នៅ​លើ​ដង​ផ្លូវ​ពី​ខេត្ត​ក្រចេះ ទៅ​ខេត្ត​ស្ទឹងត្រែង។ មន្ត្រី​ប៉ូលិស​ខេត្ត​ក្រចេះ បាន​អះអាង​ថា លោក វិជ័យ អានន្ទ រង​របួស​ធ្ងន់​សន្លប់​នោះ ដោយ​គ្រោះ​ថ្នាក់​ចរាចរណ៍។ មក​ទល់​ពេល​នេះ លោក វិជ័យ អានន្ទ ដែល​កំពុង​សម្រាក​ព្យាបាល​នៅ​មន្ទីរពេទ្យ នៅ​សន្លប់​មិន​ទាន់​ដឹង​ខ្លួន​នៅ​ឡើយ ដោយសារ​របួស​ធ្ងន់ធ្ងរ។

វិទ្យុ​អាស៊ី​សេរី មិន​អាច​ទាក់​ទង​លោក ប៉ែន សមិទ្ធិ ប្រធាន​សមាគម​ក្លឹប​អ្នក​កាសែត​កម្ពុជា បាន​ទេ នៅ​ថ្ងៃ​ទី​១៩ ធ្នូ ដើម្បី​សុំ​ការ​បញ្ជាក់​បន្ថែម​លើ​គ្រោះ​ថ្នាក់​របស់​អ្នក​កាសែត​ និង​ស្ថានភាព​សិទ្ធិ​សេរីភាព​សារព័ត៌មាន​បច្ចុប្បន្ន។

ក៏​ប៉ុន្តែ លោក ខៀវ កាញារីទ្ធ ​រដ្ឋមន្ត្រី​ក្រសួង​ព័ត៌មាន និង​ជា​អ្នកនាំ​ពាក្យ​រដ្ឋាភិបាល បាន​បញ្ជាក់​ប្រាប់​អ្នក​កាសែត​កាល​ពី​ថ្ងៃ​ទី​១ ធ្នូ ថា សេរីភាព​សារព័ត៌មាន​នៅ​ប្រទេស​កម្ពុជា ពេល​នេះ មាន​កម្រិត​ជិត​ដល់​កំពូល។ លោក​បាន​ប្រៀបធៀប​ទៅ​សេរីភាព​សារព័ត៌មាន​ប្រទេស​នានា​ក្នុង​តំបន់ ដោយ​​លើក​ជា​ឧទាហរណ៍​ថា បើ​សេរី​ភាព​សារព័ត៌មាន​ប្រទេស​ដែល​មាន​និយាម​ខ្ពស់​ផុត​លេខ​ដល់​លេខ ១០ គឺ​សេរីភាព​សារព័ត៌មាន​នៅ​ប្រទេស​កម្ពុជា មាន​កម្រិត​លេខ ៨ ហើយ។

លើស​ពី​នេះ​ទៅ​ទៀត លោក​​បញ្ជាក់​ថា សេរីភាព​សារព័ត៌មាន​នៅ​កម្ពុជា សម្បូរ​រហូត​ហួស​ព្រំដែន​ធ្វើ​ឲ្យ​អ្នកសារព័ត៌មាន​ចំនួន​ជាង ១​ពាន់​នាក់ យក​ស្លាក​កាសែត​ទៅ​រក​ស៊ី​ខុស​ច្បាប់ គំរាម​កំហែង​អាជ្ញាធរ​មូលដ្ឋាន​ដែល​បង្ក​ឲ្យ​មាន​បញ្ហា​ដល់​សង្គម​ថែម​ទៀត។ លោក​រដ្ឋមន្ត្រី​ឲ្យ​ដឹង​ថា សព្វថ្ងៃ​ប្រទេស​កម្ពុជា មាន​អ្នក​សារព័ត៌មាន​ពី ៤​ពាន់ ទៅ ៦​ពាន់​នាក់ បាន​ចុះ​បញ្ជី​ផ្លូវការ និង​អ្នក​សារព័ត៌មាន​ចំនួន​ប្រហែល​ជាង ១​ពាន់​នាក់​មិន​បាន​ចុះ​បញ្ជី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល