មូលនិធិខ្មែរសម្រាប់ការសិក្សាផ្ដល់អាហារូបករណ៍ដល់និស្សិតក្រីក្រ
2008.09.18
មន្រ្តីមូលនិធិខ្មែរសម្រាប់ការសិក្សា (CEE Foundation) នៅទីក្រុងភ្នំពេញបានឲ្យដឹងនៅថ្ងៃទី៨ ខែកញ្ញា ឆ្នាំ២០០៨នេះថា មូលនិធិខ្មែរសម្រាប់ការសិក្សាបានធ្វើការផ្ដល់អាហារូបករណ៍ឲ្យដល់សិស្ស និស្សិតដែលមានស្ថានភាពរស់នៅក្រីក្រ ហើយរៀនពូកែឲ្យបានបន្តការសិក្សាកម្រិតថ្នាក់ឧត្តមសិក្សាដើម្បីជួយបណ្តុះធនធានមនុស្សសម្រាប់កសាងសង្គមកម្ពុជាទៅថ្ងៃមុខ។
មន្រ្តីស្ម័គ្រចិត្ដមួយរូបរបស់មូលនិធិខ្មែរសម្រាប់ការសិក្សា លោក សេង រដ្ឋា បានបញ្ជាក់ប្រាប់អ្នកយកព័ត៌មានវិទ្យុអាស៊ីសេរីថា តាមធម្មតា សិស្សនិស្សិតក្រីក្រភាគច្រើនគេមិនអាចមានលទ្ធភាពរៀនឲ្យបានពូកែប៉ុន្មានទេ ដោយសារតែកត្តាជីវភាពទន់ខ្សោយនោះ ប៉ុន្តែទោះជាយ៉ាងណាក៏ដោយ គេឃើញមានកូនអ្នកក្រីក្រមួយចំនួន ជាពិសេស អ្នកនៅតាមខេត្តនានាបានតស៊ូសិក្សារៀនសូត្ររហូតដល់បញ្ចប់ថ្នាក់ទី១២ ក៏មានដែរ។
លោកបន្តថា សិស្សទាំងនោះក្រោយពីបានបញ្ចប់កម្រិតមធ្យមសិក្សាហើយ គឺគេចង់រៀនបន្តទៀតនៅកម្រិតថ្នាក់ឧត្តមសិក្សាក៏ប៉ុន្តែគេមិនអាចធ្វើទៅបាន ហេតុនេះហើយ មូលនិធិខ្មែរសម្រាប់ការសិក្សា ដែលមានការជួយឧបត្ថម្ភគាំទ្រថវិកាពីសប្បុរសជនខ្មែរមួយចំនួននៅសហេដ្ឋអាមេរិកនោះ បានផ្ដួចផ្តើមឲ្យមានកម្មវិធីផ្ដល់អាហារូបករណ៍នេះសម្រាប់ជួយដល់និស្សិតក្រីក្រនិងរៀនពូកែ។
រីឯចំពោះការផ្ដល់នេះ មុននឹងគេផ្ដល់ឲ្យ គឺមូលនិធិខ្មែរសម្រាប់ការសិក្សាបានធ្វើការចុះស្រាវជ្រាវអំពីស្ថានភាពការសិក្សាជាក់ស្តែងនិងស្ថានភាពរស់នៅរបស់និស្សិតដើម្បីឲ្យដឹងថា តើគេពិតជាចង់បន្តការសិក្សាដែរឬទេ? ហើយថា តើគេជាសិស្សរៀនបានពូកែនៅក្នុងថ្នាក់មែនឬអត់។
លោក សេង រដ្ឋា មានប្រសាសន៍ថា ៖ «អ្នកខ្លះគាត់ក្រីក្រមែន តែដោយសារគាត់អត់មានការប្ដេជ្ញាចិត្តគាត់អត់មានអី អ៊ីចឹងយើងផ្ដល់អាហារូបករណ៍ទៅ ដូចជាអត់មានធ្វើឲ្យមានការប្រែប្រួលក្នុងការសិក្សារបស់គាត់ទេ។ អ៊ីចឹង យើងជ្រើសរើសអ្នកក្រីក្រ ហើយពូកែ។ ជួនកាលយើងពិបាកជ្រើសរើសថា បាន ១០០% តែថា ល្អក្នុងចំណោមសិស្សដែលល្អបំផុត»។
មន្រ្តីស្ម័គ្រចិត្ដរបស់មូលនិធិខ្មែរសម្រាប់ការសិក្សាមួយរូបទៀត កញ្ញា យ៉ាន់ សោភ័ណ បានបញ្ជាក់ប្រាប់ដែរថា ការផ្តល់អាហារូបករណ៍ដល់និស្សិតក្រីក្ររបស់មូលនិធិខ្មែរសម្រាប់ការសិក្សានេះគឺគេបានសុំឲ្យគ្រូបង្រៀនក្នុងសាលានីមួយៗចូលរួមសហការផងដែរក្នុងការតាមដានការសិក្សារបស់និស្សិតដើម្បីជំរុញលើកទឹកចិត្តឲ្យគេកាន់តែខិតខំធ្វើការសិក្សា។
កញ្ញា យ៉ាន់ សោភ័ណ មានប្រសាសន៍ថា ៖ «ហើយនៅក្នុងវិធីយើងចែកហ្នឹង គឺយើងសរសេរcheck (មូលប្បទានបត្រ) ហើយយើងមានគណៈអធិបតីពីសាលារៀន និងពីអ្នកតំណាងពីអាមេរិកជាអ្នកឲ្យ check យើងចេញជាcheck ដាក់ឈ្មោះកូនសិស្សហ្នឹងតែម្ដង ហើយឲ្យកូនសិស្សស៊ីញ៉េទទួល។ យើងឲ្យ ១ឆ្នាំ ៣០០ដុល្លារ អ្នកខ្លះមួយឆ្នាំ ២០០ដុល្លារ ឬក៏ ១៥០ដុល្លារ ឬក៏ ១០០ដុល្លារ ទៅតាមប្រភេទអាហារូបករណ៍ដែលយើងឲ្យ»។
មន្រ្តីមូលនិធិខ្មែរសម្រាប់ការសិក្សាបានប្រាប់ឲ្យដឹងបន្ថែមទៀតដែរថា កាលពីឆ្នាំសិក្សា២០០៧-២០០៨នេះ មូលនិធិខ្មែរសម្រាប់ការសិក្សាបានផ្ដល់អាហារូបករណ៍ឲ្យដល់និស្សិតក្រីក្រនិងរៀនពូកែ ចំនួន២៨នាក់ ដែលរៀននៅសកលវិទ្យាល័យចំនួន៥ ក្រុងភ្នំពេញ រួមមានសកលវិទ្យាល័យភូមិន្ទនីតិសាស្ដ្រនិងវិទ្យាសាស្ដ្រសេដ្ឋកិច្ច សកលវិទ្យាល័យភូមិន្ទភ្នំពេញ វិទ្យាស្ថានបច្ចេកវិទ្យាកម្ពុជា សកលវិទ្យាល័យបញ្ញាសាស្ដ្រ ហើយនិងសកលវិទ្យល័យបៀលប្រាយ។
មន្ត្រីដដែលបានបញ្ជាក់ទៀតថា និស្សិតដែលបានទទួលអាហារូបករណ៍ទាំងនោះ គឺជាអតីតសិស្សមកពីបណ្ដាខេត្តនានា ដូចជាបាត់ដំបង កំពង់ចាម កំពង់ឆ្នាំង ព្រៃវែង ភ្នំពេញ តាកែវ បន្ទាយមានជ័យ ជាដើម ហើយនិស្សិតទាំងនោះបច្ចុប្បន្នកំពុងបន្តការសិក្សាផ្នែកបរិញ្ញាបត្រច្បាប់ សេដ្ឋកិច្ច គណនេយ្យ ពាណិជ្ជកម្មអន្ដរជាត៌ និងមុខជំនាញផ្សេងៗជាច្រើនទៀត។
មន្រ្តីស្ម័គ្រចិត្ដរបស់មូលនិធិខ្មែរសម្រាប់ការសិក្សា កញ្ញា ស៊្រិន ដាវី ដែលបានចូលរួមជួយដល់កិច្ចការនោះដែរបានឲ្យដឹងថា បន្ទាប់ពីបានទទួលអាហារូបករណ៍ ពីមូលនិធិខ្មែរសម្រាប់ការសិក្សា និស្សិតក្រីក្រដែលតែកំពុងតែបន្តការសិក្សានោះ ភាគច្រើនគឺគេបានធ្វើការរៀនសូត្របានទទួលលទ្ធផលល្អប្រសើរ។
កញ្ញា ស្រ៊ិន ដាវី មានប្រសាសន៍ថា ៖ «ខ្លះទៅគាត់ទិញសម្ភារៈសិក្សា ឬក៏គាត់អាចទៅ យកលុយហ្នឹងទៅរៀនគួរអីបន្ថែមអីអ៊ីចឹង។ អ៊ីចឹងយើងឃើញថា នេះជាលទ្ធផលវិជ្ជមានមួយដែរ គឺឃើញថា លទ្ធផលរបស់គាត់ហ្នឹង គឺបានកើនឡើងល្អជាងមុន»។
ទាក់ទងនឹងការផ្តល់អាហារូបករណ៍នេះ និសិ្សតក្រីក្រមួយចំនួនដែលបានទទួលអាហារូបករណ៍ពីមូលនិធិខ្មែរសម្រាប់ការសិក្សា បានសម្ដែងទឹកចិត្តត្រេកអរយ៉ាងខ្លាំង ពីព្រោះគេមានលទ្ធភាពបន្តការសិក្សាក្នុងកម្រិតមួយខ្ពស់ដែលគេមិននឹកស្មានដល់។
ក្នុងចំណោមនិស្សិតទាំងនោះ យុវនារីនិស្សិតមួយរូបឈ្មោះ ហុក សៀម បានប្រាប់ឲ្យដឹងថា នាងមានដើមកំណើតនៅភ្នំពេញនេះទេ ក៏ប៉ុន្តែគ្រួសារឪពុកម្តាយរបស់នាងមានជីវភាពលំបាក ដូច្នេះហើយនៅពេលដែលនាងបានទទួលអាហារូបករណ៍ពីមូលនិធិខ្មែរសម្រាប់ការសិក្សានោះបានធ្វើឲ្យនាងអាចបន្តការសិក្សាបាន ដែលសព្វថ្ងៃនេះនាងកំពុងតែរៀនយកមុខវិជ្ជាច្បាប់។
យុវនារី ហុក សៀម រៀបរាប់ដូច្នេះថា ៖ «ចូលទៅវិញឆ្នាំនេះ ត្រូវឆ្នាំទី៣ ចូលឆ្នាំហ្នឹង នៅ២ឆ្នាំទៀត។ គិតបើថាអត់បានជាប់អាហារូបករណ៍ នៅសាលាច្បាប់ទេ ប្រហែលជាអត់បានបន្តមហាវិទ្យាល័យទេ ព្រោះប្រាក់ខែដំបូងបានមកអ៊ីចឹង ត្រូវចំណាយក្នុងគ្រួសារ ហើយម្យ៉ាងទៀត បងមួយទៀតក៏គាត់នៅរៀនដែរ»។
មន្រ្តីមូលនិធិខ្មែរសម្រាប់ការសិក្សា បានបញ្ជាក់ប្រាប់ផងដែរថា នៅក្នុងឆ្នាំសិក្សាក្រោយនេះគេមានគម្រោងនឹងបង្កើននូវការផ្ដល់អាហារូបករណ៍ដល់និស្សិតក្រីក្រនិងរៀនពូកែឲ្យបានច្រើនជាងឆ្នាំសិក្សាមុន ប្រមាណជា១០០នាក់។
មន្រ្តីដដែលបានបន្ថែមថា នេះគឺគ្រាន់តែជាគម្រោងនៅឡើយទេ ពីព្រោះសព្វថ្ងៃថវិកាដែលជួយដល់កម្មវិធីនោះគឺបានមកពីការរៃអង្គាសប្រាក់របស់សប្បុរសជននានានៅសហរដ្ឋអាមេរិក ហើយចំណែកឯអ្នកចូលរួមជួយជ្រោមជ្រែងធ្វើការងារនេះនៅកម្ពុជាគឺសុទ្ធតែជាអ្នកស្ម័គ្រចិត្តទាំងអស់ដោយមិនទាមទារកម្រៃឡើយ។
គួរបញ្ជាក់ដែរថា ចំពោះការផ្តល់អាហារូបករណ៍ដល់និស្សិតក្រីក្រនេះ ក្រៅពីមានការជួយរបស់មូលនិធិខ្មែរសម្រាប់ការសិក្សានោះ គេក៏ឃើញមានការជួយផ្សេងទៀតដែរពីសំណាក់រាជរដ្ឋាភិបាលពីសាលារៀនរដ្ឋ សាលាឯកជន ក្នុងប្រទេស ព្រមទាំងពីបណ្ដាអង្គការក្រៅរដ្ឋាភិបាលនានាមួយចំនួនទៀតដែរ ក៏ប៉ុន្ដែទោះជាយ៉ាងនេះក្តី ការជួយឲ្យអាហារូបករណ៍ទាំងនោះ ក៏នៅតែមិនអាចបំពេញសេចក្ដីត្រូវការរបស់និស្សិតខ្មែរក្រីក្រនោះបានទេ ពីព្រោះសព្វថ្ងៃសិស្សក្រីក្រខ្លះមិនអាចមានលទ្ធភាពបន្តការសិក្សាថ្នាក់ឧត្តមសិក្សានោះបានទេ។
ម្យ៉ាងទៀត នៅក្នុងឆ្នាំនេះ បើតាមការឲ្យដឹងពីមន្ត្រីក្រសួងអប់រំ យុវជន និងកីឡា ថា អ្នកប្រឡងជាប់សញ្ញាបត្រទុតិយភូមិមានចំនួនជាង ៥០.០០០នាក់ ហើយគេក៏មិនដឹងប្រាកដថាតើក្នុងចំណោមអ្នកប្រឡងជាប់សញ្ញាបត្រមធ្យមសិក្សាទុតិយភូមិនោះអាចបន្តការសិក្សានៅថ្នាក់ឧត្ដមសិក្សា បានទាំងអស់គ្នា ឬយ៉ាងណានោះឡើយ៕