ប្រភពដែលជិតស្និទ្ធនឹងតុលាការខេត្តស្វាយរៀងបានមានប្រសាសន៍បញ្ជាក់ថា ដីកានាំខ្លួននោះបានចេញដោយតុលាការខេត្តស្វាយរៀងចុះថៃ្ងទី២៩ ខែធ្នូថ្មីៗនេះ។
លោក ជូង ជូងី ជាមេធាវីការពារក្តីឲ្យលោក សម រង្ស៊ី ក្នុងសំណុំរឿងនេះ បានមានប្រសាសន៍ប្រាប់វិទ្យុអាស៊ីសេរីថា លោកនឹងបន្តការពារក្តីនេះតាមនីតិវិធីច្បាប់។
លោក ជូង ជូងី បានបញ្ជាក់ថា ៖ «ការពារសិទ្ធិរបស់គាត់ទៅតាមផ្លូវច្បាប់គឺការពារនៅចំពោះមុខតុលាការ កាលណាតុលាការចោទប្រកាន់ចង់ដាក់ទោសគាត់»។
ប្រតិកម្មទៅនឹងការតាមចាប់ខ្លួនដោយតុលាការខេត្តស្វាយរៀងនោះ លោក សម រង្ស៊ី មេដឹកនាំនៃគណបក្សសមរង្ស៊ី បានមានប្រសាសន៍តាមទូរស័ព្ទពីប្រទេសបារាំងមកថា លោកមិនញញើតនោះទេ។
លោក សម រង្ស៊ី បានថ្លែងថា ៖ «ពីព្រោះគេចេញក៏ប៉ុណ្ណឹង គេមិនចេញក៏ប៉ុណ្ណឹង ខ្ញុំទៅក៏ប៉ុណ្ណឹង ខ្ញុំមិនទៅក៏ប៉ុណ្ណឹង ខ្ញុំថាម៉េចក៏នៅតែដដែលចំពោះគេ! ដូច្នេះខ្ញុំមិនទៅលេងសើចជាមួយនឹងតុលាការអាយ៉ងហ្នឹងទេ!»។
លោក ចាន់ សុវ៉េត ជាមន្រ្តីស៊ើបអង្កេតជាន់ខ្ពស់នៃអង្គការការពារសិទ្ធិមនុស្សក្រៅរដ្ឋាភិបាល ហៅកាត់ថា អាដហុក បានមានប្រសាសន៍អត្ថាធិប្បាយថា វាហាក់ដូចជាលឿនពេកក្នុងការធ្វើដូច្នោះ។
លោក ចាន់ សុវ៉េត បានមានប្រសាសន៍ថា ៖ «រហូតមកដល់ពេលនេះខ្ញុំមិនទាន់បានឃើញដីកាហ្នឹងនៅឡើយទេ តែទោះយ៉ាងណាក៏ដោយក៏យើងដឹងថា តុលាការខេត្តស្វាយរៀងបានព្យាយាមនិងខំប្រឹងកិច្ចការរបស់ខ្លួនតាមរបៀបមួយគេហៅថា នីតិវិធី ប៉ុន្តែនីតិវិធីនេះហាក់បីដូចជាផ្លោះច្រើន»។
ការចេញដីកានាំខ្លួនឬចាប់ខ្លួន លោក សម រង្ស៊ី នោះ គឺក្រោយពេលដែលតុលាការខេត្តស្វាយរៀងបានបដិសេធយ៉ាងដាច់ខាតទៅលើសំណើរបស់លោក សម រង្ស៊ី តាមរយៈមេធាវីរបស់លោកនៅក្នុងការសុំពន្យារពេលនៃការសាកសួរទៅថៃ្ងក្រោយទៀត នៅគ្រាដែលតុលាការខេត្តស្វាយរៀងនោះបានកោះហៅឲ្យលោក សម រង្ស៊ី ឲ្យចូលខ្លួនទៅបំភ្លឺនៅមុខតុលាការកាលពីថៃ្ងទី២៩ ខែធ្នូកន្លងទៅនេះ។
លោក សម រង្ស៊ី ត្រូវបានតុលាការខេត្តស្វាយរៀង ចោទប្រកាន់ក្រោមបទព្រហ្មទណ្ឌថា បានបំផ្លាញទ្រព្យសម្បត្តិសាធារណៈនៃការដកតម្រុយបង្គោលព្រំដែនកម្ពុជាវៀតណាម លេខ១៨៥ នៅក្នុងភូមិកោះក្បានកណ្តាល ឃុំសំរោង ស្រុកចន្រ្ទា ខេត្តស្វាយរៀង កាលពីថៃ្ងទី២៥ ខែតុលាកន្លងទៅនេះ។
យ៉ាងហោចណាស់ប្រជាពលរដ្ឋខ្មែរចំនួន ២នាក់ គឺលោកស្រី មាស ស្រី និងលោក ព្រំ ជា បានរងការចាប់ឃុំខ្លួនកាលពីថៃ្ងទី២៣ ខែធ្នូកន្លងទៅនេះ ដោយតុលាការខេត្តស្វាយរៀងក្រោមបទបំផ្លាញទ្រព្យសម្បតិ្តសាធារណៈជាមួយលោក សម រង្ស៊ី នោះដែរ ក្រោយពីតុលាការបានសាកសួររួចហើយនៅពេលនេះ៕