ការបំពុលទឹកប្រឡាយនោះ មិនអាចប្រើប្រាស់ស្រោចស្រពបន្លែ និងស្រូវប្រាំង ឬដងឲ្យសត្វផឹកបានទេ ហើយធ្វើឲ្យពួកគាត់មិនអាចបូមទឹកដាំស្រូវបាន ២ ដងដូចឆ្នាំមុនៗ។ ប្រជាពលរដ្ឋបានសំណូមពរឲ្យអាជ្ញាធរជួយបំបាត់ការលំបាកនោះ។
លោក ជួប ប៊ន រស់នៅភូមិព្រៃរំដេង បានអះអាងថា តាំងពីសិប្បកម្មផលិតទឹកកក បង្ហូរទឹកសំណល់ចូលប្រឡាយ អ្នកធ្លាប់បូមទឹកស្រោចស្រូវប្រាំង មិនអាចធ្វើស្រែ ២ ដងទេ។ លោកថា ទឹកមានពណ៌ខ្មៅ និងក្លិនស្អុយមិនអាចប្រើបានតែម្ដង៖ «ព្រោះជីវភាពរស់នៅវាសង្ឃឹមលើទឹកប្រឡាយហ្នឹង។ តាំងពីម៉ាស៊ីនទឹកកកបង្កើតមក ប្រជាជនបង្កបង្កើនផលអត់កើតទេ ទឹកអំបិល ហូរមករលួយស្រូវ រលួយអីគ្រប់។ ឲ្យតែបូមដាក់សំណាប គឺរលួយ។ បូមដាក់ស្រូវ គឺរលួយ។ ហើយទឹកប្រឡាយនឹង សូម្បីតែគោ ក៏ផឹកអត់កើតត្រីក៏ហូបអត់កើត ធុំក្លិនដូចប្រេងម៉ាស៊ីន ទឹកឡើងខ្មៅ។ ខ្ញុំសាបស្រូវអីហើយឥឡូវធ្វើអត់កើតចោលទាំងអស់សំណាប»។
ស្ត្រីម្នាក់ទៀតបន្ថែមថា ទឹកប្រឡាយកខ្វក់នេះមិនអាចបូមស្រោចបន្លែបានទេ គាត់ខានដាំបន្លែ និងខានធ្វើស្រែបង្កើនរដូវមួយឆ្នាំ ហើយព្រោះទឹកមិនអាចប្រើបាន។ ម្យ៉ាងទៀត ទឹកនេះបើសត្វផឹក វាងាប់ មិនដឹងទឹកប្រឡាយមានសារធាតុអ្វីឡើយ។ អ្នកស្រីបន្តថា នៅពេលមេឃក្ដៅ គាត់មើលទៅវាលស្រែ មានពណ៌សក្បុស ចាំងផ្លេកៗ ដូចអំបិល គ្របលើចុងគល់ជញ្ជ្រាំង៖ «ប៉ះពាល់ទាំងអស់តែម្ដង។ តាំងពីសុខភាពតាំងពីក្លិនជះមកនឹងធ្វើស្រែក៏មិនបាន ដាំដំណាំក៏អត់បាន។ ខូចទឹក ហើយផលប៉ះពាល់ខ្លាំងបំផុត គឺសុខភាពនឹងឯង។ ខ្មៅព្រីកថាដូចប្រេងម៉ាស៊ីនអ៊ីចឹងឥឡូវនេះ និងក្លិនស្អុយមហាស្អុយ»។
លោក កៀត ទិត្យ នៅភូមិអង្គតាសោម បានឲ្យដឹងថា ដោយសារតែទឹកប្រឡាយកខ្វក់ និងមិនអាចប្រើបាន ពួកគាត់បានផ្ដិតមេដៃប្ដឹងច្រើនដង ទៅអាជ្ញាធរដែនដីដើម្បីឲ្យជួយដោះស្រាយ។ ប៉ុន្តែ គ្មានដំណោះស្រាយទេគេផ្ដល់ចម្លើយមកថា ឲ្យសិប្បកម្មនោះចប់អាណត្តិទៅវិញ។
លោក កៀត ទិត្យ៖ «ប៉ុន្តែទឹកវាហូរពីនោះមក ដូចថាទឹកនោះ វាមានជាតិប្រៃ។ ចុះទៅរមាស់ដែរ។ កាលពីឆ្នាំទៅ ទឹកហ្នឹងវាអត់សូវខ្មៅទេ។ ឆ្នាំនេះទឹកវាឡើងខ្មៅខ្លាំង ខ្មៅខុសពីធម្មតាតែម្ដង»។
លោក ស៊ន ផល្លី គ្រូអប់រំសាសនាគ្រិស្ត ដែលវិហារនៅជាប់ប្រឡាយ បានអះអាងថា ទឹកប្រឡាយនោះ គាត់ឃើញបង្ហូរទឹកកខ្វក់ពីផ្សារអង្គតាសោមផង និងពីសិប្បកម្មផលិតទឹកកកផង។ លោកថា ការបង្ហូរកាកសំណល់ពីផ្សារអង្គតាសោម គឺទឹកអាចប្រើបានក្នុងការស្រោចស្រព។ ប៉ុន្តែ ទឹកបង្ហូរពីសិប្បកម្មលាយចូលគ្នាជាមួយនឹងទឹកហូរពីផ្សារ ធ្វើឲ្យទឹកក្នុងប្រឡាយកាន់តែកខ្វក់ ជះក្លិនស្អុយមិនអាចប្រើបាន ធ្វើឲ្យទឹកក្នុងប្រឡាយ ត្រូវបោះបង់ចោលទាំងស្រុង។
ម្ចាស់សិប្បកម្មផលិតទឹកកក នៅឃុំអង្គតាសោម លោក ជា សំបូរ ថ្លែងថា ទឹកប្រឡាយនេះ គ្មានអ្នកប្រើទឹកនោះទេ ពីមុនមក។ ទឹកបង្ហូរចេញពីសិប្បកម្មទម្លាក់ទៅក្នុងប្រឡាយ ជាកាកធ្យូងនៃឡចំហាយសម្រាប់ផលិតទឹកកក គឺគ្មានជាតិអាម៉ូញ៉ាក់ ដែលនាំឲ្យខូចបរិស្ថាន ឬប៉ះពាល់សុខភាពមនុស្សសត្វទេ។
លោក ជា សំបូរ៖ «កាលពីមុនខ្ញុំប្រើប្រេងម៉ាស៊ូតធម្មតា ឥឡូវខ្ញុំប្រើឡចំហាយ បានវាអ៊ីចឹង។ ហើយទឹកដែលហូរទៅហ្នឹង សុទ្ធតែទឹកធ្យូងទេ អត់មានអ្វីទាំងអស់។ ព្រោះទឹកធ្យូងវាអត់ប៉ះពាល់អីទេ ហើយអាទឹកអាម៉ូញ៉ាក់ វាហូរទៅផ្សេងទៀត វាអត់មានចូលទៅទីនឹងទេ»។
វិទ្យុអាស៊ីសេរីមិនអាចទាក់ទងអាជ្ញាធរដែនដី និងមន្ត្រីជំនាញ ដើម្បីជម្រាបសួរព័ត៌មានបានទេ នៅក្នុងអំឡុងថ្ងៃឈប់សម្រាកបុណ្យចូលឆ្នាំសកល។
លោក ជា សំបូរ ម្ចាស់សិប្បកម្មផលិតទឹកកកបានឲ្យដឹងថា ប្រសិនបើមានបណ្ដឹងថា ទឹកចេញពីសិប្បកម្មផលិតទឹកកកនេះ បានប៉ះពាល់ការរស់នៅរបស់អ្នកភូមិ លោកនឹងកែប្រែការបង្ហូរទឹកចេញពីសិប្បកម្ម ទៅជាការតម្កល់ទឹកស្តុកទុក បម្លែងទៅជាទឹកមានប្រយោជន៍វិញ។
ទឹកប្រឡាយដែលអ្នកភូមិចោទថា មិនអាចប្រើបាន គឺមានភូមិអង្គតាសោម និងភូមិព្រៃរំដេង ក្នុងឃុំអង្គតាសោម ស្រុកត្រាំកក់ ខេត្តតាកែវ៕