តុលាការកាត់ទោសអតីតជំនួយការឧបនាយករដ្ឋមន្ត្រី១រូបពីបទឆបោក
១៩-ឧសភា-២០១០: សាលាដំបូងរាជធានីភ្នំពេញ
នេះជាករណីក្ដីក្ដាំដ៏កម្រមួយរវាងអ្នកយកប្រាក់ទៅទិញតំណែងក្នុងរដ្ឋាភិបាល និងអ្នកទទួលរត់ការដែលមានខ្សែ ឬនៅអែបជាមួយនឹងអ្នកធំ។
ចៅក្រមតុលាការក្រុងភ្នំពេញ លោក សេង នាង បានប្រកាសសាលក្រមនៅថ្ងៃទី៤ មិថុនា កាត់ទោសឈ្មោះ ទា គឹមហុង អតីតមន្ត្រីជំនួយការលោកឧបនាយករដ្ឋមន្ត្រី ស ខេង ពីបទឆបោក ឲ្យជាប់គុកចំនួន ២ឆ្នាំ ដោយអនុវត្តឲ្យជាប់ឃុំចំនួន ៧ខែ និងត្រូវសងប្រាក់ចំនួន ២៥.០០០ដុល្លារ ទៅឈ្មោះ ហេង ហៀម វិញ។
ឈ្មោះ ទា គឹមហុង ត្រូវចៅក្រមតុលាការក្រុងភ្នំពេញចោទប្រកាន់ និងកាត់ទោសពីបទឆបោក ដោយសារគាត់បានទទួលប្រាក់ចំនួនជិត ៣ម៉ឺនដុល្លារ ពីឈ្មោះ ហេង ហៀម ជាថ្នូរជាមួយការសន្យារត់ការរកតំណែងជាន់ខ្ពស់មួយកន្លែងនៅក្នុងរដ្ឋាភិបាល កាលពីឆ្នាំ២០០៨កន្លងទៅ។ ឈ្មោះ ទា គឹមហុង បានសារភាពថា បានទទួលប្រាក់មួយចំនួនពីឈ្មោះ ហេង ហៀម ពិតប្រាកដមែន។
លោក សេង នាង ចៅក្រមសាលាដំបូងក្រុងភ្នំពេញ បានមានប្រសាសន៍ថា ឈ្មោះ ទា គឹមហុង ត្រូវបានចោទប្រកាន់ពីបទឆបោក មិនមែនពីបទពុករលួយ ដោយសារគាត់មិនមានតួនាទីជាមន្ត្រីសាធារណៈ ដូចនេះមិនអាចចោទប្រកាន់ពីបទពុករលួយបានទេ។
លោក សេង នាង បានបញ្ជាក់ថា ៖ «អំពើរបស់គាត់ត្រឹមតែឆបោក។ គាត់អត់មានតួនាទីជាមន្ត្រីសាធារណៈ។ បទស៊ីសំណូក ទាល់តែតួនាទីជាមន្ត្រីសាធារណៈ»។
ក្រៅពីចោទប្រកាន់ និងកាត់ទោសឈ្មោះ ទា គឹមហុង ចៅក្រមតុលាការក្រុងភ្នំពេញ បានចោទប្រកាន់ទៅលើឈ្មោះ ប្រាក់ វីរៈ មួយរូបទៀត ដែលជាប៉ូលិសទាក់ទងជាមួយសំណុំរឿងឆបោកនេះដែរ។ ឈ្មោះ ប្រាក់ វីរៈ ត្រូវកាត់ទោសឲ្យជាប់ពន្ធនាគារចំនួន ២ឆ្នាំ ប៉ុន្តែព្យួរទោស។
លោកឧត្ដមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍នៅថ្ងៃទី៤ មិថុនា ថា ឈ្មោះ ទា គឹមហុង ត្រូវបានលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បណ្ដេញចេញពីមុខងារជំនួយការ ក្រោយពេលមានពាក្យបណ្ដឹងទាក់ទងជាមួយសកម្មភាពមិនគប្បីរបស់ឈ្មោះ ទា គឹមហុង បានមកដល់លោកជាយូរមកហើយ។
លោកឧត្ដមសេនីយ៍ឯក ខៀវ សុភ័គ បានអះអាងថា ៖ «រាប់ឆ្នាំ! ប៉ុន្តែឯកឧត្ដមឧប លោកបណ្ដេញចេញតែម្ដង! ...និយាយរួម គាត់បានធ្វើឲ្យខូចឈ្មោះគាត់! បណ្ដឹងតែមួយទេ ដែលគេរាយការណ៍ចូលមកឧបភ្លាម ឧបលោកបណ្ដេញចេញភ្លាម! ការបណ្ដេញចេញនេះ គឺដើម្បីបើកផ្លូវជូនតុលាការធ្វើការវិនិច្ឆ័យតាមច្បាប់»។
ការទិញដូរបុណ្យស័ក្ដិ ឬមុខតំណែងក្នុងក្រសួង មន្ទីរនានា កើតមានជារឿយៗនៅប្រទេសកម្ពុជា ប៉ុន្តែគេកម្រឃើញមានពាក្យបណ្ដឹង ទាក់ទងជាមួយការទិញដូរតំណែងនេះជាផ្លូវការណាស់៕
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- រដ្ឋបាលក្រុងភ្នំពេញ ផ្អាកការជួបជុំ និងមុខរបរមួយចំនួនសម្រាប់រយៈពេល ៧ ថ្ងៃ
- លោក កឹម សុខា ប្រកាសមិនពាក់ព័ន្ធជាមួយលោក សម រង្ស៊ី
- ជីវប្រវត្តិសង្ខេបរបស់សម្តេចក្រុមព្រះ នរោត្តម រណឫទ្ធិ
- ព្រះសពរបស់សម្តេចក្រុមព្រះ នរោត្តម រណឫទ្ធិ នឹងត្រូវយាងមកធ្វើបុណ្យនៅកម្ពុជា
- មេធាវីអន្តរជាតិព្រមានថា រដ្ឋាភិបាលលោក ហ៊ុន សែន នឹងមានបញ្ហាបើហ៊ានឲ្យកញ្ញា សេង ធារី ជាប់ទោស
