អតីត​ទាហាន​ខ្មែរ​ក្រហម​ខ្លះ​មិន​ចាប់​អារម្មណ៍​ចំពោះ​សាលាក្ដី​ខ្មែរ​ក្រហម

ស្រប​ពេល​នឹង​សាលាក្ដី​ខ្មែរ​ក្រហម​កំពុង​ដំណើរ​ការ​កាត់​ក្ដី​លើ​អតីត​មេដឹកនាំ​ជាន់​ខ្ពស់​ក្នុង​របប​ខ្មែរ​ក្រហម អតីត​ទាហាន​ខ្មែរ​ក្រហម​នៅ​សមរភូមិ​តំបន់​ភ្នំ​វល្លិ ខេត្ត​កំពត ដែល​បច្ចុប្បន្ន​ស្ថិត​ក្នុង​ខេត្ត​កែប និយាយ​ថា ពួក​គាត់​បាន​ដឹង​ឮ​តិច​តួច​ណាស់​អំពី​រឿង​នេះ ហើយ​អ្នក​ខ្លះ​ថា មិន​ចាប់​អារម្មណ៍​ចំពោះ​សាលាក្ដី​នេះ។
ដោយ សេក បណ្ឌិត
2011-12-23
Share
ពលរដ្ឋ កែប ៣០៥ ២០-ធ្នូ-២០១១៖ ប្រជាពលរដ្ឋ​ធ្វើ​ដំណើរ​នៅ​ក្នុង​តំបន់​ភ្នំ​វល្លិ នា​ខេត្ត​កែប។
RFA/Sek Bandith

លោក ស្រី សំ អាយុ ៧៧​ឆ្នាំ ជា​អតីត​នាយ​ទាហាន​ខ្មែរ​ក្រហម​សំខាន់​មួយ​រូប​នៅ​តំបន់​ភ្នំ​វល្លិ នៅ​ចន្លោះ​ឆ្នាំ​១៩៨២ មក​ដល់​ឆ្នាំ​១៩៩៤។ លោក​បាន​ឲ្យ​ដឹង​ថា ពួក​គាត់​មិន​បាន​ឲ្យ​ដឹង​អ្វី​វែង​ឆ្ងាយ​ពី​រឿងរ៉ាវ​កាត់​ទោស​អតីត​មេ​ខ្មែរ​ក្រហម​នោះ​ទេ ដោយសារ​គ្មាន​នរណា​គេ​ឲ្យ​ដឹង។ ចំពោះ​ វិទ្យុ ឬ ទូរទស្សន៍ ក៏​មិន​ឃើញ​មាន​ផ្សាយ​ដល់​ទី​នោះ​ដែរ ហើយ​ពួកគាត់​បាន​ឮ​តែ​តាម​មាត់​តៗ​គ្នា​ពុំ​មាន​អ្វី​ច្បាស់លាស់​ឡើយ។

សេក បណ្ឌិត៖ លោក​ដឹង​អ្វី​ខ្លះ​ទេ​ពី​សាលាក្ដី​ខ្មែរ​ក្រហម? លោក ស្រី សំ៖ អត់ អត់​ដឹង​អី​ទាំងអស់ ព្រោះ​គេ​ទៅ​ប្រជុំ​អីណា​ក៏​គេ​អត់​ប្រាប់​យើង ព្រោះ​យើង​អត់​មាន​មុខងារ​អី​ដែល​ត្រូវ​ដឹង​ឮ។

ក្នុង​វ័យ​ចំណាស់​អាយុ​ជិត ៨០​ឆ្នាំ លោក ស្រី សំ បាន​ឆ្លង​កាត់​សម័យ​សង្គ្រាម​នៅ​កម្ពុជា ច្រើន​ជំនាន់​មក​ហើយ រាប់​ទាំង​សម័យ​ខ្មែរក្រហម​ផង។ លោក​ពិត​ជា​ចង់​ដឹង​អំពី​ការ​សម្រេច​ក្ដី​របស់​តុលាការ  និង​ភាព​ពិត​ជាក់​ស្ដែង​ដែល​លោក​បាន​ជួប​ផ្ទាល់​នោះ​ តើ​មាន​អ្វី​ដែល​លោក​មិន​បាន​ដឹង ឬ​ស្មាន​មិន​ដល់។

លោក​បន្ត ដោយ​រំលឹក​ពី​រឿងរ៉ាវ​អតីតកាល​ថា ការ​ធ្វើ​សង្គ្រាម​រហូត​មាន​ការ​សម្លាប់​រង្គាល​ប្រជាជន​គ្នា​ឯង ក្នុង​ចន្លោះ​ឆ្នាំ​១៩៧៥ ដល់ ១៩៧៩ នោះ លោក​មិន​ហ៊ាន​សន្និដ្ឋាន​ថា​យ៉ាងណា​ឡើយ។ ប៉ុន្តែ​ការ​តស៊ូ​នៅ​ដំណាក់​កាល​ចុងក្រោយ​ចន្លោះ​ឆ្នាំ​១៩៨០ ដល់ ១៩៩៤ ឬ​មុន​មាន​សមាហរណកម្ម នៅ​តំបន់​ភ្នំ​វល្លិ ឬ​នៅ​តំបន់​ផ្សេងៗ​ទៀត​ក្ដី ពុំ​មាន​អ្វី​ខុស​ឆ្គង​ទេ គឺ​ជា​ការ​តស៊ូ​មួយ​ដើម្បី​រស់ ដើម្បី​សេរីភាព គេច​ចេញ​ពី​ការ​គំរាមកំហែង​របស់​កងទ័ព​វៀតណាម និង​ការ​ចោទ​ប្រកាន់​នានា​ដើម្បី​ចាប់​ពលរដ្ឋ​ដាក់​គុក​ដោយ​គ្មាន​ហេតុផល។

លោក ស្រី សំ៖ «សម័យ​ខ្ញុំ​មិន​ដឹង​ទេ តែ​ក្នុង ៨២ ហើយ​គ្មាន​អី​អាក្រក់​ទេ ក្នុង ៨២ ៨៣ រហូត​មក វា​គ្រាន់​តែ​ថា ចលនា​ដែល​វ៉ៃ​នោះ កាល​នោះ​យើង​ឃើញ​ខាង​នោះ​មាន​កងទ័ព​វៀតណាម ខ្លះ​ចូល​មក​ខាង​នេះ​គិត​តែ​រួម​គ្នា​វ៉ៃ ពី​មុន​មក​យើង​មិន​ដឹង​ថា យ៉ាង​ម៉េចៗ​ខ្ញុំ​អត់​ដឹង»

គ្រួសារ​អតីត​នាយ​ទាហាន​ខ្មែរ​ក្រហម​ម្នាក់​ទៀត នៅ​តំបន់​ភ្នំ​វល្លិ លោកស្រី សេន ហ៊ាន បាន​ឲ្យ​ដឹង​ថា នៅ​តំបន់​ភ្នំ​វល្លិ ដូចជា​ពុំ​ឃើញ​មាន​ការ​ផ្សព្វផ្សាយ​អំពី​សាលាក្ដី​ខ្មែរក្រហម ថា​គេ​ធ្វើ​អ្វី​ខ្លះ​នោះ​ទេ។

លោកស្រី​បន្ត​ថា បើ​ទោះ​ជា​ចង់​ដឹង​រឿង​នេះ​ក៏​ពិបាក​ដែរ ហើយ​ពួកគាត់​គិត​ថា​រឿង​នេះ​ពុំ​មាន​អ្វី​ពាក់ព័ន្ធ​នឹង​ពលរដ្ឋ​តូចតាច​ឡើយ។ ម្យ៉ាង​ទៀត​ពួកគាត់​មួយ​ថ្ងៃៗ​ខ្វល់​ខ្លាំង​ជាង​គេ គឺ​បញ្ហា​ជីវភាព​ប្រចាំថ្ងៃ៖ «រឿង​គេ​យ៉ាង​ម៉េច របៀប​ថា ក្បាល​អ្នកណា​សក់​អ្នក​ហ្នឹង ព្រោះអី​ខ្ញុំ​ដឹង​តែ​ពី​បញ្ហា​ជីវភាព​ធ្វើ​ម៉េច​ឲ្យ​តែ​ក្នុង​ក្រុម​គ្រួសារ​គ្រប់គ្រាន់​ទៅ អ្នក​ដែល​ប្រព្រឹត្ត​ខុស ត្រូវ​តែ​ទទួល​ទោស អ្នក​ដែល​មិន​ប្រព្រឹត្ត​ត្រូវ​ខិតខំ​កសាង​ជីវភាព»

តែ​ទោះ​យ៉ាងណា​ពួកគាត់​ម្នាក់ៗ នៅ​តំបន់​នោះ​ចង់​ឃើញ​តុលាការ​ខ្មែរក្រហម បង្ហាញ​នូវ​សច្ចៈ យុត្តិធម៌​ដល់​អ្នក​ពាក់ព័ន្ធ​ទាំងអស់។

អតីត​អ្នក​រស់​នៅ​ក្នុង​តំបន់​តស៊ូ​របស់​ក្រុម​ខ្មែរក្រហម​ចុងក្រោយ​នៅ​ភ្នំ​វល្លិ​ដទៃ​ទៀត ពួកគាត់​ក៏​ចង់​ដឹង​​ពី​ដំណើរ​ការ​របស់​សាលាក្ដី​នេះ​ដែរ ប៉ុន្តែ​ដោយសារ​ខ្វះ​មធ្យោបាយ​ទទួល​ព័ត៌មាន និង​ភាព​ក្រីក្រ​ បាន​រុញ​ច្រាន​ពួកគាត់​ឲ្យ​នៅ​ឆ្ងាយ​ពី​រឿងរ៉ាវ​នេះ។

លោក ឡាត់ គី អ្នក​សម្របសម្រួល​កម្មវិធី​តុលាការ​ខ្មែរក្រហម នៃ​សមាគម​អាដហុក។ លោក​មាន​ប្រសាសន៍​ថា បើ​ពួកគាត់​ពិត​ជា​ពុំ​ទទួល​បាន​ព័ត៌មាន​បែប​នេះ​មែន​នោះ វា​ជា​រឿង​គួរ​ព្រួយបារម្ភ  ពីព្រោះ​ការ​ទទួល​បាន​ព័ត៌មាន​ពី​សាលាក្ដី​ខ្មែរក្រហម​វា​មាន​សារសំខាន់​ណាស់ ជា​ពិសេស​ពី​បញ្ហា​អាណត្តិ​របស់​សាលាក្ដី​នេះ ដែល​បាន​កំណត់​យ៉ាង​ជាក់លាក់​ពី​ឋានៈ​របស់​មេដឹកនាំ​កំពូល  និង​អ្នក​ទទួល​ខុសត្រូវ​ជាន់​ខ្ពស់​ក្នុង​របប​ខ្មែរក្រហម។

លោក ឡាត់ គី៖ «ការ​យល់​ដឹង​ពី​អាណត្តិ​របស់​សាលាក្ដី​នេះ ធ្វើ​ឲ្យ​ពួកគាត់​មិន​មាន​ការ​ភ័យខ្លាច ដែល​នាំ​ឲ្យ​ប៉ះពាល់​ដល់​សន្តិភាព សន្តិសុខ​សណ្ដាប់ធ្នាប់ និង​ធ្វើ​ឲ្យ​ពួក​គាត់​ស្ងប់​អារម្មណ៍​ផង​ដែរ»

លោក នេត្រ ភក្រ្តា អ្នក​នាំ​ពាក្យ​នៃ​សាលាក្ដី​ខ្មែរក្រហម ។ លោក​មាន​ប្រសាសន៍​បញ្ជាក់​ថា កន្លង​មក​សាលាក្ដី​បាន​សហការ​ជាមួយ​ប្រព័ន្ធ​ផ្សព្វផ្សាយ​ជា​ច្រើន  និង​មាន​ក្រុម​ការងារ​របស់​ខ្លួន​បាន​ចុះ​ផ្សព្វផ្សាយ​ផ្ទាល់​ពី​សកម្មភាព និង​គោលបំណង​របស់​ស្ថាប័ន​នេះ​ជូន​ដល់​ប្រជាពលរដ្ឋ​នៅ​តំបន់​ឆ្ងាយៗ ប៉ុន្តែ​លោក​ក៏​ទទួល​ស្គាល់​ថា នៅ​មាន​តំបន់​ខ្លះ​មាន​ប្រជាពលរដ្ឋ​មិន​ទាន់​បាន​ទទួល​ព័ត៌មាន​ពី​សាលាក្ដី​នេះ​គ្រប់គ្រាន់​នៅ​ឡើយ។ ដូចជា​នៅ​តំបន់​ភ្នំ​វល្លិ ជាដើម គឺ​មិនទាន់​បាន​ធ្វើការ​ផ្សព្វផ្សាយ​ឲ្យ​បាន​ស៊ីជម្រៅ​នៅ​ឡើយ​ទេ។

ប៉ុន្តែ​លោក​បញ្ជាក់​ថា នៅ​ពេល​ខាងមុខ​នេះ​ក្រុម​ការងារ​សាលាក្ដី នឹង​ចុះ​ធ្វើការ​ផ្សព្វផ្សាយ​នូវ​ព័ត៌មាន​ថ្មីៗ អំពី​ការវិវឌ្ឍន៍​ថ្មីៗ​របស់​សាលាក្ដី​ជូន​ដល់​ពួកគាត់​ជា​អតីត​ខ្មែរក្រហម​នៅ​ទីនោះ៖ «ពីព្រោះ​ថា​ពួកគាត់​ត្រូវ​ការ​យល់​ដឹង​ច្រើន ហើយ​យើង​សង្ឃឹម​ថា​តាម​រយៈ​វិទ្យុ​អាស៊ីសេរី ជាដើម​នេះ នឹង​ផ្ដល់​ព័ត៌មាន​ស៊ី​ជម្រៅ​ដល់​ពួកគាត់​អំពី​ដំណើរការ​ជំនុំ​ជម្រះ​ក្ដី​នេះ​បន្ថែម​ពី​លើ​កិច្ចការ​របស់​យើងខ្ញុំ»

លោក​បន្ត​ថា រហូត​មក​ដល់​ពេល​នេះ​មាន​ប្រជាពលរដ្ឋ​មក​ពី​តំបន់​ផ្សេងៗ​ ប្រមាណ​ជាង ១០​ម៉ឺន​នាក់​ហើយ​ដែល​បាន​មក​ដល់​សាលាក្ដី​ខ្មែរក្រហម​តាម​រយៈ​ដំណើរ​ទស្សនកិច្ច​សិក្សា និង​ការ​ចូលរួម​ស្ដាប់​សវនាការ​ដោយ​ផ្ទាល់។ លោក​សង្ឃឹម​ថា ពួកគាត់​រាប់​ម៉ឺន​នាក់​នោះ នឹង​ធ្វើ​ការ​ផ្សព្វផ្សាយ​បន្ត​ទៀត​ ទៅ​ដល់​ក្រុម​គ្រួសារ និង​អ្នក​ដទៃ​ទៀត​ក្នុង​សហគមន៍​របស់​ពួកគាត់៕

ព័ត៌មាន (2)

មើល​មតិ​ទាំង​អស់.

Anonymous says:
Dec 22, 2011 10:35 PM

គួរឧិ្យអាណិតខ្មែរណាស់ហៅក្រហមឫប្រល័យពូជសាសន៍តើពេលណាទើបមានខ្មែរសខ្មែរល្អ

Anonymous says:
Dec 23, 2011 02:56 AM

គួរឱ្យស្ដាយណាស់ នៅមានតំបន់ខ្លះដែលពុំបានទទួល
ការផ្សព្វផ្សាយពីសាលាក្ដីកូនកាត់ខ្មែរក្រហម ឬពួកគាត់
ទ្រូវបានទទួលការហាមឃាត់ពីរបបភ្នំពេញ?

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល