កម្មករ​រោងចក្រ​នៅ​កំពង់ចាម​ធ្វើ​កូដកម្ម​រក​ដំណោះស្រាយ

កម្មករ​កម្មការិនី​រោងចក្រ​កាត់​ដេរ​សំលៀក​បំពាក់ មេនហាតថេន (Manhattan) នៅ​ខែត្រ​កំពង់ចាម បាន​ធ្វើ​កូដកម្ម​អហិង្សា​រយៈពេល​បី​ថ្ងៃ​កន្លង​មក​ហើយ ពុំ​មាន​លទ្ធផល​នោះ​ឡើយ ទោះ​បី​ជា​ពួកគេ​ជិត​ពីរ​ពាន់​នាក់ បាន​ធ្វើ​ដំណើរ​ហែ​ក្បួន​ពី​រោងចក្រ​មក​សាលា​ខែត្រ ដើម្បី​ឲ្យ​លោក​អភិបាល​ខែត្រ​ជួយ​ដោះស្រាយ​នៅ​ថ្ងៃ​ទី​២២ កុម្ភៈ ក្ដី។
ដោយ ទីន ហ្សាការីយ៉ា
2012.02.22
កម្មករ កំពង់ចាម ៣០៥ កម្មករ​រោងចក្រ​កាត់​ដេរ​សំលៀក​បំពាក់ មេនហាតថេន (Manhattan) នៅ​ខែត្រ​កំពង់ចាម ធ្វើ​ដំណើរ​ហែ​ក្បួន​ពី​រោងចក្រ​មក​សាលា​ខែត្រ ដើម្បី​ឲ្យ​លោក​អភិបាល​ខែត្រ​ជួយ​ដោះស្រាយ នៅ​ថ្ងៃ​ទី​២២ កុម្ភៈ ឆ្នាំ​២០១២។
RFA/Tin Zakariya

តំណាង​កម្មករ​រោងចក្រ​កាត់​ដេរ មេនហាតថេន ខែត្រ​កំពង់ចាម បាន​ឲ្យ​ដឹង​ថា កម្មករ កម្មការិនី​ជិត​ពីរ​ពាន់​នាក់​នឹង​នាំ​គ្នា​បន្ត​ធ្វើ​កូដកម្ម​បិទ​ផ្លូវ​ជាតិ​លេខ​៧ នៅ​ពេល​ខាង​មុខ ប្រសិន​បើ​អាជ្ញាធរ​ខែត្រ និង​មន្ទីរ​ការងារ​មិន​រក​ដំណោះស្រាយ​ជូន​កម្មករ​ចំនួន ១២​ចំណុច ដូច​ដែល​កម្មករ​បាន​ទាមទារ​ទេ​នោះ។

ការ​លើក​ឡើង​ដូច្នេះ នៅ​បន្ទាប់​ពី​តំណាង​កម្មករ​ចំនួន ៤​រូប បាន​ចូល​ជួប​អភិបាល​រង​ខែត្រ​កំពង់ចាម នៅ​សាលា​ខែត្រ និង​មន្ត្រី​មន្ទីរ​ការងារ នៅ​ព្រឹក​ថ្ងៃ​ទី​២២ កុម្ភៈ ខណៈ​កម្មករ​ជិត ២​ពាន់​នាក់ បាន​ធ្វើ​កូដកម្ម​ដើរ​ហែ​ក្បួន​ពី​រោងចក្រ​មក​មុខ​សាលា​ខែត្រ​កំពង់ចាម ដើម្បី​ឲ្យ​អភិបាល​ខែត្រ​ជួយ​ជំរុញ​ភាគី​ក្រុមហ៊ុន​គោរព​ទៅ​តាម​ការ​បង្គាប់​របស់​ក្រុមប្រឹក្សា​អាជ្ញា​កណ្ដាល ឲ្យ​ក្រុមហ៊ុន​អនុវត្ត​នូវ​ការ​ទាមទារ​របស់​កម្មករ​ទាំង ១២​ចំណុច តែ​មិន​បាន​សម្រេច​នោះ។

លោក យ៉ាន់ រ័ត្នកែវពិសី ជា​មន្ត្រី​ដោះស្រាយ​វិវាទ​ការងារ​នៃ​សហជីព​សេរី​កម្មករ​នៃ​ព្រះរាជាណាចក្រ​កម្ពុជា។ លោក​មាន​ប្រសាសន៍​ថា ខាង​អភិបាល​រង​ខែត្រ​បាន​សន្យា​ថា លោក​នឹង​ជំរុញ​ឲ្យ​ក្រសួង​ការងារ​ដោះស្រាយ​បញ្ហា​វិវាទ​នេះ។ ប៉ុន្តែ​យ៉ាង​នេះ​ក្ដី លោក​បញ្ជាក់​ថា អាជ្ញាធរ​ខែត្រ​គួរ​តែ​ដាក់​គំនាប​ទៅ​លើ​ភាគី​ក្រុមហ៊ុន​ដែល​មិន​គោរព​សិទ្ធិ​កម្មករ រំលោភ​ច្បាប់​ការងារ ពិសេស​មិន​គោរព​សេចក្ដី​សម្រេច​របស់​ក្រុមប្រឹក្សា​អាជ្ញា​កណ្ដាល។

លោក យ៉ាន់ រ័ត្នកែវពិសី៖ «នាយកដ្ឋាន​ការងារ​ហ្នឹង​គាត់​ថា ថៅកែ​​ពិបាក​ណាស់ ក្បាល​រឹង​ណាស់ ពិបាក​ការ​ដោះស្រាយ​ណាស់ អ៊ីចឹង​ថៅកែ​ម្នាក់​គាត់​មាន​គំនិត​ខូច ធ្វើ​បាប​កម្មករ តើ​ឲ្យ​គាត់​ធ្វើ​បាប​ដដែល ឬ​មួយ​ឲ្យ​ថៅកែ​ហ្នឹង​គោរព​ទៅ​តាម​ច្បាប់?»

ការ​ទាមទារ​របស់​កម្មករ​ចំនួន ១២​ចំណុច ដែល​ក្រុមប្រឹក្សា​អាជ្ញាកណ្ដាល​បាន​សម្រេច​នោះ មាន​ដូច​ជា សុំ​ឲ្យ​ក្រុមហ៊ុន​បញ្ចូល​កិច្ចសន្យា​ការងារ​ដែល​កំណត់​ថេរវេលា​របស់​កម្មករ និយោជក ដែល​ធ្វើការ​លើស​ពី ២​ឆ្នាំ ទៅ​ជា​កិច្ចសន្យា​មាន​ថិរវេលា​មិន​កំណត់។ ទាមទារ​ឲ្យ​ផ្ដល់​ប្រាក់​ឧបត្ថម្ភ​ចំនួន​ពីរ​ខែ​ដល់​កម្មករ និយោជក ដែល​ពួក​គាត់​មាន​កិច្ចសន្យា​មិន​កំណត់​ពេល​វេលា ដែល​បាន​សុំ​ឈប់​ពី​ការងារ​នោះ។ សុំ​ឲ្យ​ក្រុមហ៊ុន​រៀបចំ​កន្លែង​ដាក់​យាន​ជំនិះ​របស់​កម្មករ ហើយ​ប្រសិន​បើ​បាត់​ក្នុង​រោងចក្រ​សុំ​ឲ្យ​ក្រុមហ៊ុន​ទទួល​ខុស​ត្រូវ និង​ចំណុច​ផ្សេងៗ​ទៀត។

ក្រុម​កម្មករ​បាន​លើក​ឡើង​ថា តំណាង​ក្រុមហ៊ុន​ជនជាតិ​ចិន មិន​គោរព​សិទ្ធិ​កម្មករ​នោះ​ទេ ពេល​ធ្វើ​ការ​គេ​តម្រូវ​ឲ្យ​កម្មករ​ដោះ​ស្បែក​ជើង មាន​ការ​រើស​អើង​សហជីព។ នៅ​ពេល​ដឹង​ថា អ្នក​ណា​ម្នាក់​ជាប់​សាច់​ញាតិ​ជាមួយ​តំណាង​កម្មករ​គេ​បញ្ឈប់​អ្នក​នោះ​ពី​ការងារ។ កម្មករ​បាន​អះអាង​ថា ថ្មីៗ​នេះ ថៅ​កែ​បាន​បញ្ឈប់​កម្មករ និង​តំណាង​កម្មករ​ចំនួន​បី​នាក់​ហើយ៖ «គាប​សង្កត់​កម្មករ​ណាស់ ហើយ​មិន​ហ៊ាន​តវ៉ា​ទៀត ដល់​ពេល​កំណត់​គេ​ដក​ចេញ»

ប្រធាន​រដ្ឋបាល​សួន​ឧស្សាហកម្ម មេតហាតថេន លោក សម សីហា មិន​ធ្វើ​អធិប្បាយ​លើ​ករណី​កម្មករ​ធ្វើ​កូដកម្ម​នេះ​ទេ នៅ​ថ្ងៃ​ទី​២២ កុម្ភៈ ឆ្នាំ​២០១២ ដោយ​លោក​ប្រាប់​ថា​ជាប់​ប្រជុំ។

ប្រធាន​មន្ទីរ​ការងារ និង​បណ្ដុះបណ្ដាល​វិជ្ជាជីវៈ​ខែត្រ​កំពង់ចាម លោក ចេង ហ៊ាង មាន​ប្រសាសន៍​ថា ការ​ដោះស្រាយ​យ៉ាង​ណា​នោះ លោក​រង់ចាំ​ការ​សម្រេច​ជា​ថ្មី​របស់​ក្រុមប្រឹក្សា​អាជ្ញាកណ្ដាល​ម្ដង​ទៀត ប្រសិន​បើ​ភាគី​ក្រុមហ៊ុន​នៅ​តែ​មិន​គោរព​ការ​សម្រេច​របស់​ក្រុមប្រឹក្សា​អាជ្ញាកណ្ដាល​ទៀត មាន​តែ​ដោះស្រាយ​តាម​ប្រព័ន្ធ​តុលាការ។

លោក ចេង ហ៊ាង បាន​បន្ថែម​ថា កាល​ពី​ថ្ងៃ​ទី​១៥ ធ្នូ លោក​បាន​ទៅ​សម្របសម្រួល​រវាង​ភាគី​កម្មករ និង​ភាគី​ក្រុមហ៊ុន គឺ​ពួកគេ​បាន​ព្រមព្រៀង​គ្នា​ចំនួន​បី​ចំណុច​ហើយ ក្នុង​ចំណោម ១២​ចំណុច​ដែល​កម្មករ​ទាមទារ​នោះ។

កម្មករ​រោងចក្រ មេតហាតថេន ធ្វើ​កូដកម្ម​នេះ ជា​ថ្ងៃ​ទី​៣​ហើយ​ដែល​ពួក​គេ​បាន​ធ្វើ​កូដកម្ម​នៅ​មុខ​រោងចក្រ​តាំង​ពី​ថ្ងៃ​ទី​២០ កុម្ភៈ មក។ ការ​ធ្វើ​កូដកម្ម​នេះ នៅ​ស្រប​ពេល​កម្មករ​រោងចក្រ​ផលិត​ស្បែក​ជើង​កៅវ៉េ (Kaoway) នៅ​ក្រុង​បាវិត ខែត្រ​ស្វាយរៀង បាន​ធ្វើ​កូដកម្ម ហើយ​មាន​ជន​មិន​ស្គាល់​មុខ​បាន​បាញ់​កម្មករ​របួស​​ចំនួន​បី​នាក់​កាល​ពី​ថ្ងៃ​ទី​២០ កុម្ភៈ។

ទោះ​ជា​យ៉ាង​ណា​ក៏ដោយ តំណាង​កម្មករ​បាន​លើក​ឡើង​ថា ពួកគេ​នឹង​ដឹក​នាំ​កម្មករ​បន្ត​ធ្វើ​កូដកម្ម​អហិង្សា​ទៀត ដើម្បី​រក​ដំណោះ​ស្រាយ បើ​មិន​ដូច្នោះ​ទេ កម្មករ​ជិត ២​ពាន់​នាក់ ក្នុង​កម្មករ​សួន​ឧស្សាហកម្ម​មេតហាតថេន ជាង ៣​ពាន់​នាក់ នឹង​នាំ​គ្នា​បិទ​ផ្លូវ​ជាតិ​លេខ​៦ ឬ​ក៏​នាំ​គ្នា​មក​តវ៉ា​នៅ​មុខ​សាសា​លា​ខែត្រ​ទៀត ដើម្បី​សុំ​ឲ្យ​លោក​អភិបាល​ខែត្រ​ជួយ​ដោះស្រាយ​បញ្ហា​វិវាទ​ការងារ​នេះ៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Feb 21, 2012 11:26 PM

When a country is being run by a group of strong men under a supervision of a strong man Hun Sen(A dictator), it's equal to a country of calamity. What were those House of Representatives doing? Where were they? Excecpt, Mr. Sun Chhay, Madam Mua Sokhua, Mr. Kim Sokha, Mr. Sam Rainsi,and perhaps, any other People Party Member's names that I didn't knew. These mentioned brave names were always at the side of the suffering poor, hopeless people when somethings happened. It's such a waist of foreign borrowed, doners(in or outside country) national budget to have the rest of the inactive House Members reprented Khmers at this time. We need the hard working, knowledgeble, smart, and brave House members like Mr. Sun Chhay, Madam Mua Sokhua, Mr. Sam Rainsi, Mr. Kim Sokha, and names that I should have known from People Party.

Anonymous
Feb 22, 2012 05:15 PM

where there is suppression, there will be protested.