ការងារនេះទទួលបានការគាំទ្រពីក្រុមអង្គការមិនមែនរដ្ឋាភិបាល ដែលធ្វើការងារជំរុញការចូលរួមរបស់ស្ត្រីក្នុងកិច្ចការសង្គមនៅកម្ពុជា។
អង្គការមិនមែនរដ្ឋាភិបាលធ្វើការងារទាក់ទងនឹងស្ត្រី ចាត់ទុកគោលបំណងរក្សាមន្ត្រីរាជការជានារីមិនអោយចូលនិវត្តន៍ជាបណ្ដោះអាសន្នដោយរដ្ឋាភិបាលកម្ពុជាថា មានភាពវិជ្ជមានចំពោះគោលការណ៍សមភាពយេនឌ័រ ឬភាពស្មើគ្នារវាងបុរស និងស្ត្រី ក្នុងការអភិវឌ្ឍ។
ការលើកឡើងរបស់អង្គការមិនមែនរដ្ឋាភិបាលធ្វើឡើងបន្ទាប់ពីរដ្ឋលេខាធិការដ្ឋានមុខងារសាធារណៈ នៃគណៈរដ្ឋមន្ត្រី បានផ្ញើលិខិតមួយអំពីការចូលនិវត្តន៍របស់មន្ត្រីជានារី។ ក្នុងលិខិតនោះ លោក ពេជ្រ ប៊ុនធិន រដ្ឋលេខាធិការ នៃរដ្ឋលេខាធិការដ្ឋានមុខងារសាធារណៈនៃគណៈរដ្ឋមន្ត្រី បានលើកឡើងពីគម្រោងបណ្ដោះអាសន្នរក្សាទុកមន្ត្រីរាជការជានារី ដែលមានតំណែងក្នុងរដ្ឋបាលសាធារណៈជាបណ្ដោះអាសន្ន ហើយរដ្ឋលេខាធិការដ្ឋានមុខងារសាធារណៈកំពុងតែស្រាវជ្រាវពីផ្លូវច្បាប់ ដែលអាចអោយមន្ត្រីរាជការជានារីបានបន្តការងាររបស់ខ្លួនតទៅទៀត។
នាយិកាប្រតិបត្តិអង្គការសីលការ អ្នកស្រី ធីតា ឃិះ មានប្រសាសន៍នៅថ្ងៃពុធ ទី១៨ ខែមេសា ថា វិធានការបែបនេះពិតជាអាចជួយអោយរដ្ឋាភិបាលអាចរក្សាបានចំនួនស្ត្រី និងអាចឈានទៅ សម្រេចគោលដៅបង្កើនចំនួនស្ត្រីក្នុងជួរថ្នាក់ដឹកនាំ។
អ្នកស្រី ធីតា ឃិះ៖ «ហើយបើមិនធ្វើអ៊ីចឹងទេ ផែនការរបស់រដ្ឋាភិបាលអត់បានសម្រេច ព្រោះគាត់ (រដ្ឋាភិបាល) បានធ្វើផែនការអោយគាត់ឡើង ប៉ុន្តែដល់ឥឡូវដល់ពេលទម្លាក់គាត់ចុះវិញ បើសិនជាគាត់ត្រូវចូលនិវត្តន៍ ដូច្នេះផែនការចំនួនអត់គ្រប់។ ព្រោះស្ត្រីគាត់មានតួនាទីហ្នឹងទើបបានថ្មីៗ ហេតុដូច្នេះបើទម្លាក់គាត់ទៅវិញជាការខាតបង់ធនធានមនុស្សយ៉ាងសំខាន់»។
មានហេតុផលមួយចំនួនត្រូវបញ្ជាក់ថា ជាដើមចមនៃវិធានការថ្មីនេះ។ ក្នុងនោះរួមមានចំនួនមន្ត្រីរាជការជានារី ដែលត្រូវចូលនិវត្តន៍មានចំនួនច្រើន និងពុំមាននារីក្នុងតួនាទីដែលអាចដាក់ជំនួស។
អង្គការសីលការ បានរកឃើញថា មានមន្ត្រីរាជការជានារីជាច្រើននាក់ត្រូវដំឡើងតួនាទី ប៉ុន្តែពុំបានទទួលកាំប្រាក់តាមតួនាទីឡើយ ហើយភាពយឺតយ៉ាវនោះ គឺជាផលលំបាកមួយសម្រាប់ពួកគាត់នៅពេលចូលនិវត្តន៍ ពោលគឺពួកគាត់មិនអាចទទួលបានប្រាក់សោធននិវត្តន៍ទៅតាមចំនួនពិតប្រាកដទៅតាមតួនាទីថ្មី។
វិធានការរបស់រដ្ឋាភិបាលនៅពេលនេះនឹងបានជាឱកាសសម្រាប់រដ្ឋាភិបាលពិនិត្យឡើងវិញចំពោះការខកខានមិនបានផ្ដល់ប្រាក់បៀវត្សទៅតាមតួនាទីរបស់មន្ត្រីរាជការជានារីដែលទើបឡើងកាន់តំណែងថ្មី។
នាយិកាអង្គការចំរើនស្ត្រី អ្នកស្រី ប៉ុក ណណ្តា មានប្រសាសន៍ថា ខណៈដែលមានវិធានការល្អ រដ្ឋាភិបាលគួរយកចិត្តទុកដាក់បន្ថែមទៀតចំពោះប្រាក់បៀវត្សរ៍ដែលមន្ត្រីរាជការជានារីគួរទទួលបាន៖ «ហ្នឹងខ្ញុំយល់ឃើញថា អាចរក្សាចំនួនស្ត្រី ឬក៏បង្កើនចំនួនស្ត្រីក្នុងមុខងារសាធារណហ្នឹងគឺកាន់តែប្រសើរឡើង ទី២ទៀត ការឡើងឋានៈហ្នឹងទៀត សុំផ្ដល់តួនាទីហ្នឹងជាមួយនឹងការឡើងឋានៈផងដែរ កម្រិតនៃកាំនោះដែរ ទើបបានស្ត្រីយើងហ្នឹងបានតួនាទីច្រើន»។
ទាក់ទិននឹងការរិះរកមធ្យោបាយ អោយមន្ត្រីរាជការជានារីនេះ អ្នកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី មានប្រសាសន៍ថា ក្រសួងកិច្ចការនារីកំពុងធ្វើការជាមួយរដ្ឋលេខាធិការដ្ឋាន មុខងារសាធារណៈ ដោយផ្អែកទៅលើច្បាប់ពាក់ព័ន្ធមួយចំនួន។
អ្នកស្រី អ៊ឹង កន្ថាផាវី៖ «មកដល់ថ្ងៃនេះយើងខ្ញុំកំពុងពិភាក្សាជាមួយមុខងារសាធារណៈ ហើយលទ្ធផលអាចចេញក្នុងពេលខាងមុខនេះ ហើយចាំជម្រាបថាធ្វើតាមរូបមន្តណា។ ប៉ុន្តែយើងផ្អែកទៅលើសហលក្ខន្តិកៈ នៃមន្ត្រីរាជការ និងច្បាប់ដែលមានគ្រប់គ្រងរដ្ឋបាលសាធារណៈ»។
បើទោះជាយ៉ាងណា អ្នកស្រី អ៊ឹង កន្ថាផាវី មិនបានបញ្ជាក់ពីចំនួនមន្ត្រីរាជការជានារីដែលត្រូវចូលនិវត្តន៍នោះមានចំនួនប៉ុន្មានឡើយ។
នៅក្នុងមាត្រា ៥៤នៃច្បាប់ស្ដីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា បានបញ្ជាក់ថា អ្នករាជការទាំងពីរភេទត្រូវដាក់អោយចូលនិវត្តន៍ជាកំហិតពេលដល់អាយុ ៥៥ឆ្នាំ។ អាយុកំហិតនេះអាចរំកិលដល់ ៦០ឆ្នាំ បើលក្ខន្តិកៈដោយឡែកបានកំណត់។
នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្រ្វែល (COMFREL) លោក គល់ បញ្ញា មានប្រសាសន៍ថា រដ្ឋាភិបាលគួរពិចារណាពីការជ្រើសរើសមន្ត្រីរាជការនារីបន្ថែមជាជាង អនុវត្តវិធានការដែលមិនស្របនឹងផ្លូវច្បាប់។
លោកបន្តថា ការនិយមបក្សពួកជាឧបសគ្គក្នុងការបង្កើនការចូលរួមរបស់ស្ត្រី៖ «លើកទឹកចិត្តអោយក្មេងៗសាក្រោយហ្នឹង ហើយរើសចូលភ្លាមៗ ហើយជំនួសអ្នកធ្វើការដែលចូលនិវត្តន៍ហ្នឹងទៅវាចេញបាត់ហើយ មានបញ្ហាអី។ ទាញអ្នកដែលពូកែៗចូលទៅ ខ្វះអីអ្នកពូកែៗមួយគំនរ។ មិនអាចយើងទៅផ្អាកការអនុវត្តច្បាប់ម៉េចបាន។ ច្បាប់គឺច្បាប់ហើយ បើនិយាយពីនីតិរដ្ឋ ត្រូវតែអនុវត្ត។ បើយើងចង់អ៊ីចឹងមានតែទៅសភាអោយវិសោធនកម្ម ថាឥឡូវសុំផ្អាក»។
របាយការណ៍កម្មវិធីអភិវឌ្ឍន៍សហប្រជាជាតិ ហៅកាត់ថា (UNDP) ក្នុងឆ្នាំ២០០៩ បង្ហាញថា រដ្ឋាភិបាលកម្ពុជា បានតែងតាំងស្ត្រីចំនួន ២៤រូប ត្រូវអោយធ្វើជាអភិបាលរងរាជធានីខេត្ត និងចំនួន ០២រូប អោយធ្វើជាអភិបាលស្រុក និង ១៦៩រូប អោយធ្វើជាអភិបាលរងស្រុក ក្រុង និងខណ្ឌ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។