អង្គភាព​ប្រឆាំង​អំពើ​ពុករលួយ​បង្ហាញ​កំហុស​របស់​ព្រះរាជអាជ្ញា

អង្គភាព​ប្រឆាំង​អំពើ​ពុករលួយ​បាន​បង្ក្រាប និង​ចាប់​ខ្លួន​លើក​ដំបូង​ទៅ​លើ​ព្រះរាជអាជ្ញា​មួយ​រូប​ក្នុង​ខេត្ត​ពោធិ៍សាត់ ដែល​ជា​មន្ត្រី​នៅ​ក្នុង​ប្រព័ន្ធ​យុត្តិធម៌​នៃ​ប្រទេស​កម្ពុជា។
ដោយ សុខ សេរី
2010-12-02
Share
ឱម យ៉ិនទៀង ៣០៥ ប្រធាន​អង្គភាព​ប្រឆាំង​អំពើ​ពុករលួយ លោក ឱម យ៉ិនទៀង ធ្វើ​សន្និសីទ​កាសែត​នៅ​ឯ​ទីស្នាក់ការ​អង្គភាព​ប្រឆាំង​អំពើ​ពុករលួយ ក្នុង​រាជធានី​ភ្នំពេញ កាល​ពី​ថ្ងៃ​០១ ខែ​ធ្នូ ឆ្នាំ​២០១០។
RFA/Sok Serey

អង្គភាព​ប្រឆាំង​អំពើ​ពុករលួយ​នៅ​ក្នុង​ប្រទេស​កម្ពុជា នៅ​ថ្ងៃ​ទី​១ ខែ​ធ្នូ បាន​ប្រកាស​ថា ខ្លួន​នឹង​បន្ត​បង្រ្កាប និង​ចាប់​ខ្លួន​ជន​សង្ស័យ​អំពើ​ពុករលួយ​ជា​បន្ត​ទៀត​នៅ​ថ្ងៃ​ខាង​មុខ​នៅ​គ្រប់​ពេល​វេលា និង​មិន​រើស​មុខ​ឡើយ បើ​សិន​ណា​ខ្លួន​ប្រមូល​បាន​ឯកសារ និង​ភស្តុតាង​គ្រប់គ្រាន់ ដើម្បី​ចាត់​វិធានការ​តាម​ច្បាប់។

ការ​ប្រកាស​នេះ គឺ​មិន​យូរ​ប៉ុន្មាន​ក្រោយ​ពី​អង្គភាព​នេះ​ចាប់​ខ្លួន​ជន​សង្ស័យ​ប្រព្រឹត្ត​អំពើ​ពុករលួយ​ចំនួន ៣​នាក់​នៅ​ក្នុង​ខេត្ត​ពោធិ៍សាត់ កាល​ពី​ថ្ងៃ​ទី​២៩ ខែ​វិច្ឆិកា កន្លង​ទៅ​នេះ នៅ​ក្នុង​នោះ​មាន​ព្រះរាជអាជ្ញា​តុលាការ​ខេត្ត​ពោធិ៍សាត់ លោក តុប ច័ន្ទសិរីវុធ និង​ជន​រួម​គំនិត​ចំនួន ២​នាក់​ទៀត គឺ​ឈ្មោះ ឃុន សុខណា និង​ឈ្មោះ យូ  ហើយ​ជន​រួម​គំនិត​ម្នាក់​ទៀត​ឈ្មោះ អ៊ែល វណ្ណៈ បាន​រត់​គេច​ខ្លួន។

ប្រធាន​អង្គភាព​ប្រឆាំង​អំពើ​ពុករលួយ លោក ឱម យ៉ិនទៀង បាន​មាន​ប្រសាសន៍​នៅ​ក្នុង​សន្និសីទ​កាសែត​នៅ​ថៃ្ង​ទី​១ ខែ​ធ្នូ​ថា ៖ «យើង​អាច​សង្ស័យ​ថា យូ នេះ​ជា​អ្នក​ទទួល​យក​ស្ងាត់ៗ។ យូ​នេះ​មក​ប្រាប់​ទៀត​ថា ឥឡូវ​ឈប់​ហើយ ឈប់​យក​លុយ​ហ្នឹង​ហើយ ឥឡូវ​បែក​ការណ៍​ហើយ ធ្វើ​បែបបទ​អ្នក​ឯក ២​នាក់ បញ្ជូន​ទៅ​តុលាការ​វិញ»

អង្គភាព​នេះ​បាន​អះអាង​ថា បាន​ប្រមូល​ភស្តុតាង​បាន​គ្រប់គ្រាន់​ហើយ ជុំវិញ​សំណុំ​រឿង​មន្ត្រី​ពន្ធដារ បាន​យក​ពន្ធដារ​លើ​យានជំនិះ​លើស​ការ​កំណត់​របស់​រដ្ឋ ដើម្បី​ប្រយោជន៍​ផ្ទាល់​ខ្លួន​កន្លង​មក​ពី​ប្រជាពលរដ្ឋ។

ប្រធាន​អង្គភាព​ប្រឆាំង​អំពើ​ពុករលួយ លោក ឱម យ៉ិនទៀង បាន​មាន​ប្រសាសន៍​នៅ​ក្នុង​សន្និសីទ​កាសែត​នៅ​ថ្ងៃ​ទី​១ ខែ​ធ្នូ ថា ករណី​អំពើ​ពុករលួយ​របស់​ព្រះរាជអាជ្ញា​នៅ​ខេត្ត​ពោធិ៍សាត់ គឺ​ជា​អំពើ​ធ្ងន់ធ្ងរ​ក្នុង​សង្គម​កម្ពុជា។

ព្រះរាជអាជ្ញា​លោក តុប ច័ន្ទសិរីវុធ ត្រូវ​បាន​អង្គភាព​ប្រឆាំង​អំពើ​ពុករលួយ​បាន​ចុះ​ចាប់​ខ្លួន​នៅ​ក្នុង​ខេត្ត​ពោធិ៍សាត់ កាល​ពី​ថៃ្ង​ទី​២៩ ខែ​វិច្ឆិកា កន្លង​ទៅ ក្រោម​បទ​ចោទ​ថា លោក​បាន​ប្រព្រឹត្ត​អំពើ​ពុករលួយ​ទឹក​ប្រាក់​ចំនួន ៨.០០០​ដុល្លារ​អាមេរិក​ពី​អ្នក​ដឹក​ឈើ​ខុស​ច្បាប់ និង​បទ​ចោទ​ថា លោក​បាន​ជំរិត​ទារ​ប្រាក់ និង​បទ​ចោទ​ទៀត​ថា លោក​បាន​បង្ខាំង​មនុស្ស​ខុស​ច្បាប់ គឺ​ចោទ​ប្រកាន់​តាម​ច្បាប់​ព្រហ្មទណ្ឌ​សម័យ​អន្តរកាល​អ៊ុនតាក់ (UNTAC)។

ជន​សង្ស័យ ២​នាក់​ទៀត​ជា​អង្គរក្ស និង​ជា​ប្អូន​ថ្លៃ ត្រូវ​បាន​ចាប់​ខ្លួន​ជាមួយ​គ្នា ក្រោម​បទ​ចោទ​ថា បាន​រួម​គំនិត​ជាមួយ​គ្នា​ក្នុង​ការ​ជំរិត​ទារ​ប្រាក់ និង​បង្ខាំង​មនុស្ស​ខុស​ច្បាប់​នោះ។

តុលាការ​ខេត្ត​ពោធិ៍សាត់ បាន​ចោទ​ប្រកាន់​ជា​ផ្លូវ​ការ​ហើយ​លើ​ជន​សង្ស័យ​ទាំង​នោះ​នៅ​ពេល​ថ្មីៗ​នេះ ហើយ​បាន​ឃុំ​ខ្លួន​ជន​សង្ស័យ​ដើម្បី​បន្ត​ការ​ស៊ើប​អង្កេត​បន្ថែម​នៅ​មុន​ពេល​បើក​ការ​កាត់​ទោស។

ប្រធាន​គណៈកម្មាធិការ​កម្ពុជា​ឯករាជ្យ​ប្រឆាំង​អំពើ​ពុករលួយ ដែល​ជា​អង្គការ​ក្រៅ​រដ្ឋាភិបាល លោកស្រី ម៉ម ស៊ីថា បាន​មាន​ប្រសាសន៍​ថា ការ​បង្ក្រាប​កន្លង​មក​នេះ គឺ​ជា​សារ​ខ្លាំង​មួយ ៖ «សូម​ឲ្យ​ទង្វើ សកម្មភាព ​មាន​ប្រសិទ្ធភាព ចង់​ឲ្យ​អង្វែង»

សេចក្ដី​ព្រាង​ច្បាប់​ប្រឆាំង​អំពើ​ពុករលួយ​ដែល​មាន ៥៧​មាត្រា និង ៩​ជំពូក ត្រូវ​បាន​សភា​ជាតិ បាន​អនុម័ត​កាល​ពី​ខែ​មីនា ឆ្នាំ​២០១០ កន្លង​ទៅ​នេះ ប៉ុន្តែ​បាន​រង​ការ​រិះគន់​ជា​ច្រើន​ពី​គណបក្ស​ប្រឆាំង និង​អង្គការ​សង្គម​ស៊ីវិល​នានា​ថា គ្មាន​តម្លាភាព​ក្នុង​ការ​ប្រកាស​ទ្រព្យ​សម្បត្តិ៕

ព័ត៌មាន (1)

មើល​មតិ​ទាំង​អស់.

Anonymous says:
Dec 01, 2010 04:53 PM

Let's see how long it last and how far it go.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល