កម្ពុជា​កំណត់​អាយុ និង​ចំណូល​ជន​បរទេស​មក​រៀប​ការ​ជា​មួយ​ស្ត្រី​ខ្មែរ

មន្ត្រី​ជាន់ខ្ពស់​កម្ពុជា​បាន​ឲ្យ​ដឹង​ថា បុរស​បរទេស​មាន​អាយុ​លើស​ពី ៥០​ឆ្នាំ និង​មាន​ប្រាក់​ចំណូល​ទាប​ជាង ២៥០០​ដុល្លារ​អាមេរិក ក្នុង ១​ខែ មិន​អនុញ្ញាត​ឲ្យ​រៀបការ​ស្ត្រី​ខ្មែរ​ធ្វើ​ជា​ភរិយា​ទៀត​ទេ។
ដោយ ដែន អយុធ្យា
2011.03.16
Share on WhatsApp
Share on WhatsApp

មន្ត្រី​ក្រសួង​ការ​បរទេស​កម្ពុជា​បាន​មាន​ប្រសាសន៍​ឲ្យ​ដឹង​ថា ប្រទេស​កម្ពុជា​មាន​ការ​កំណត់​ច្បាស់​លាស់ មិន​ឲ្យ​បុរស​បរទេស​មាន​អាយុ​លើស​ពី ៥០​ឆ្នាំ និង​មាន​ប្រាក់​ចំណូល​ទាប រៀប​ការ​ជា​មួយ​នារី​ខ្មែរ​ឡើយ។

លោក កុយ គួង មន្ត្រី​នាំ​ពាក្យ​ក្រសួង​ការ​បរទេស​កម្ពុជា បាន​ឲ្យ​វិទ្យុ​អាស៊ី​សេរី​ដឹង​នៅ​ថ្ងៃ​ទី​១៦ ខែ​មីនា ពី​មូល​ហេតុ​នាំ​ឲ្យ​ក្រសួង​ចេញ​​​​កំណត់​ទូត​ពី​អាយុ និង​ប្រាក់​ចំណូល​បុរស​បរទេស​ចង់​មក​រៀប​ការ​ជា​មួយ​ស្ត្រី​ខ្មែរ​ធ្វើ​ជា​ភរិយា ប្រយោជន៍​ទប់​ស្កាត់​អាពាហ៍ពិពាហ៍​ក្លែងក្លាយ និង​ការ​ជួញដូរ​ស្ត្រី​ឲ្យ​បម្រើ​ផ្លូវ​ភេទ​ជា​ដើម ៖ «ជា​ពិសេស​ការ​ជួញដូរ​ពលកម្ម​នោះ។ ជាង​នេះ​ទៀត យើង​ចង់​ឃើញ​នូវ​អាពាហ៍ពិពាហ៍​មួយ​ប្រព្រឹត្តិ​ទៅ​ពិត​ប្រាកដ ហើយ​សម​រម្យ និង​ស្ត្រី​ខ្មែរ​យើង​ដែល​ទៅ​រស់​នៅ​ជា​មួយ​ស្វាមី​ជា​បរទេស​នៅ​បរទេស ឲ្យ​មាន​លក្ខណៈ​ថ្លៃថ្នូរ​សមរម្យ។ ដូច្នេះ​បាន​ជា​យើង​កម្រិត​ទាំង​វ័យ ទាំង​ប្រាក់​ចំណូល​របស់​ជន​បរទេស​ដែល​មាន​បំណង​ចង់​មក​រៀប​ការ​ជា​មួយ​ស្ត្រី​កម្ពុជា​នោះ»

ក្រសួង​ការ​បរទេស​កម្ពុជា កាល​ពី​ថ្ងៃ​ទី​១ ខែ​មីនា ឆ្នាំ​២០១១ បាន​ចេញ​កំណត់​ការ​ទូត ១​ច្បាប់ ផ្ញើ​ជូន​បេសកកម្ម​ការ​ទូត និង​កុងស៊ុល​នានា​ប្រចាំ​ប្រទេស​កម្ពុជា អំពី​ការ​កំណត់​វ័យ​បុរស​បរទេស មាន​អាយុ​លើស​ពី ៥០​ឆ្នាំ និង​មាន​ប្រាក់​ចំណូល​ទាប​ជាង ២៥០០​ដុល្លារ​អាមេរិក មិន​អនុញ្ញាត​ឲ្យ​រៀប​មង្គល​ការ​ជា​មួយ​ស្ត្រី​ខ្មែរ​នោះ​ទេ។

លោក យ៉ា ណាវុធ ប្រធាន​អង្គការ​ខារ៉ាម​កម្ពុជា បាន​គាំទ្រ​ចំពោះ​វិធានការ​រដ្ឋាភិបាល ដែល​បាន​កំណត់​អាយុ និង​ប្រាក់​ចំណូល​​​​បុរស​បរទេស​ចង់​បាន​ភរិយា​ជា​ស្ត្រី​ខ្មែរ ថា​ជា​យន្តការ​ល្អ​មួយ ដើម្បី​ជួយ​ដល់​ស្ត្រី​ខ្មែរ​ទូទៅ​កុំ​ឲ្យ​មាន​ការ​កេងប្រវ័ញ្ច​ផ្លូវ​ភេទ ឬ​ក៏​ឲ្យ​​ពួក​គេ​មាន​ជីវភាព​រស់​នៅ​បាន​សម​រម្យ។ ប៉ុន្តែ​លោក​ថា វិធានការ​ត្រឹម​កំណត់​អាយុ និង​ប្រាក់​កម្រៃ​របស់​បុរស​បរទេស គឺ​មិន​ទាន់​គ្រប់​គ្រាន់​ទេ គឺ​រដ្ឋាភិបាល​ត្រូវ​ផ្សព្វ​ផ្សាយ​ឲ្យ​បាន​ទូលំទូលាយ ពី​ផល​ប៉ះពាល់​នៃ​អាពាហ៍ពិពាហ៍​ខុស​ជាតិ​សាសន៍ ឬ​ភាសា​ខុស​គ្នា​ឲ្យ​បាន​ប្រសើរ​ជាង​សព្វ​ថ្ងៃ ៖ «អ្នក​ខ្លះ​ការ​ទៅ​តាម​របៀប​តែ​ផ្លូវ​ភេទ​ទេ មិន​មែន​រៀប​ស្រឡាញ់​រស់​នៅ​ជា​លក្ខណៈ​ប្ដី​ប្រពន្ធ​ទេ។ តាម​ការ​ពិត​រឿង​អាពាហ៍ពិពាហ៍​គេ​មិន​ដែល​និយាយ​ពី​អាយុ​ក្មេង ឬ​ក៏​ចាស់​ទេ សំខាន់​គឺ​សាមី​ខ្លួន​ទាំង​ពីរ​ហ្នឹង​គេ​ពិត​ជា​ស្រលាញ់​គ្នា ឬ​អត់។ ម្យ៉ាង​ទៀត​សាមី​ខ្លួន​ឯង​ហ្នឹង​ទាល់​តែ​មាន​ចិត្ត​ស្រឡាញ់​គ្នា​ទៅ​វិញ​ទៅ​មក​ផង។ កុំ​របៀប​មើល​ឃើញ​តែ​លុយ​គេ កាល​ណា​យើង​មើល​ឃើញ​តែ​លុយ​គេ អា​ហ្នឹង​ហើយ​ដែល​វា​អាច​រង​គ្រោះ​ពេល​ដែល​យើង​ទៅ​នៅ​ក្រៅ​ប្រទេស​នោះ»

តាម​ការ​គូស​បញ្ជាក់​របស់​លោក យ៉ា ណាវុធ ក្នុង​រយៈ​ពេល ២​ឆ្នាំ ចុង​ក្រោយ​នេះ គិត​តែ​កោះ​តៃវ៉ាន់​មួយ​ប៉ុណ្ណោះ មាន​ស្ត្រី​ខ្មែរ​ជាង ២០​នាក់ ដែល​បាន​រៀប​ការ​ជា​​មួយ​បុរស​តៃវ៉ាន់ ត្រូវ​បាន​អង្គការ​ខារ៉ាម​កម្ពុជា​ជួយ​សង្គ្រោះ​មក​កាន់​កម្ពុជា​វិញ ដោយ​ស្ត្រី​ទាំង​នោះ​ត្រូវ​បាន​គេ​ជួញ​ដូរ​ផ្លូវ​ភេទ និង​កេងប្រវ័ញ្ច​កម្លាំង​ពលកម្ម។

យ៉ាង​នេះ​ក្តី លោក កឹម សុខា ប្រធាន​គណ​បក្ស​សិទ្ធិ​មនុស្ស បាន​ចាត់​ទុក​ការ​កំណត់​អាយុ​បុរស​បរទេស និង​ប្រាក់​ចំណូល ដែល​ចង់​រៀប​ការ​ជា​មួយ​ស្ត្រី​ខ្មែរ ថា​ជា​ការ​រើសអើង​ជាតិ​សាសន៍ ព្រោះ​មនុស្ស​គ្រប់​រូប​មាន​សិទ្ធិ​ជ្រើសរើស​គូស្រករ​សម្រាប់​អនាគត​រៀង​ៗ​ខ្លួន។ ប៉ុន្តែ​លោក កឹម សុខា បាន​សាទរ​រដ្ឋាភិបាល ប្រសិន​បើ​ចំណាត់​ការ​នេះ មាន​គោល​ដៅ​គិត​គូរ​ពី​អនាគត​ស្ត្រី​ខ្មែរ​ស្មោះ​ត្រង់​នោះ ៖ «ឧទាហរណ៍​គេ​មាន​ប្រាក់​ខែ​តិច ប៉ុន្តែ​គេ​មាន​ធនធាន​នៅ​ក្រៅ​ប្រទេស។ មាន​អ្នក​ខ្លះ​អាយុ​ចាស់​ទៅ​គាត់​មាន​ធនធាន​គាត់​ច្រើន។ ជន​បរទេស​មួយ​ចំនួន​ពេល​ចាស់​ទៅ​គេ​មាន​សល់​ធនធាន​គេ​ច្រើន​ដែរ មិន​បាច់​ប្រាក់​ខែ​គេ​ទេ។ អា​ហ្នឹង​ត្រូវ​ជជែក​ឲ្យ​ច្បាប់​ឡើង​វិញ។ យើង​មិន​អាច​គ្រាន់​តែ​ថា កំណត់​ប្រាក់​ខែ​១​បាន​ទេ។ តើ​គេ​ត្រូវ​ធានា​អី​ខ្លះ យើង​ត្រូវ​ធានា​យ៉ាង​ម៉េច​ដែល​គេ​អាច​ចិញ្ចឹម​ភរិយា​ខ្មែរ​យើង​ហ្នឹង​បាន​ជា​ជាង​ត្រឹម​តែ​យើង​កំណត់​តែ​ប្រាក់​ខែ​ហ្នឹង»

ទោះ​ជា​បែប​នេះ​ក្ដី លោក ខៀវ សុភ័គ្រ មន្ត្រី​នាំ​ពាក្យ​ក្រសួង​មហា​ផ្ទៃ​កម្ពុជា​មាន​ប្រសាសន៍​ថា ការ​កំណត់​អាយុ និង​ប្រាក់​ចំណូល​បុរស​បរទេស គឺ​ពិត​ជា​បាន​រួម​ចំណែក​ជួយ​ដល់​ស្ត្រី​ខ្មែរ​ពី​ការ​កេងប្រវ័ញ្ច​តាម​គ្រប់​រូប​ភាព រួម​មាន​ការ​ជួញ​ដូរ​ផ្លូវ​ភេទ ការ​ជួញ​ដូរ​កម្លាំង​ពលកម្ម ក៏​ដូច​ជា​ចូល​រួម​ចំណែក​ជួយ​ដល់​ស្ត្រី​ខ្មែរ​រៀប​ការ​ជា​មួយ​បុរស​បរទេស មាន​ជីវភាព​រស់​នៅ​​សមរម្យ ៖ «មិន​តែ​ចំពោះ​ស្ត្រី​ទេ ខាង​បុរស​ក៏​អ៊ីចឹង​ដែរ បើ​សិន​យក​ទៅ​គ្រាន់​តែ​បម្រើ​គេ ឬ​ក៏​យក​ទៅ​គ្រាន់​តែ​ដើម្បី​រង​ទុក្ខ​វេទនា។ អា​ហ្នឹង​ទុក្ខ​របស់​ភរិយា ឬ​ក៏​ទុក្ខ​របស់​ស្វាមី​ហ្នឹង គឺ​ជា​ទុក្ខ​របស់​ពល​រដ្ឋ​ខ្មែរ​ទូទៅ​ដែរ។ ជា​ពិសេស​រដ្ឋាភិបាល​លោក​មាន​ភារកិច្ច​ដើម្បី​គាំ​ពារ​ពល​រដ្ឋ​ខ្មែរ​ទាំង​អស់ ទាំង​រស់​នៅ​ក្នុង​ស្រុក ក៏​ដូច​ជា​រស់​នៅ​ក្រៅ​ប្រទេស»

មន្ត្រី​ក្រសួង​ការ​បរទេស​កម្ពុជា​បាន​ឲ្យ​ដឹង​ថា គិត​ជា​មធ្យម​មាន​បុរស​បរទេស​មក​ស្ដី​ដណ្ដឹង ឬ​រៀប​ការ​ជា​មួយ​ស្ត្រី​ខ្មែរ​ធ្វើ​ជា​ភរិយា មាន​ពី​៥០ ទៅ​៧០​គូ​ក្នុង​១​ខែៗ។

កាល​ពី​ឆ្នាំ​២០០៧ កាសែត​តៃប៉ិ​ថែមស៍ (Taipei Times) បាន​ដក​ស្រង់​សម្ដី​ស្ត្រី​ខ្មែរ​​ជិត ៣​ពាន់​នាក់ ដែល​បាន​រៀប​ការ​ជា​មួយ​បុរស​តៃវ៉ាន់ មក​ចុះ​ផ្សាយ​បាន​ឲ្យ​ដឹង​ថា មាន​ស្ត្រី​ខ្មែរ​ភាគ​ច្រើន​ត្រូវ​បាន​រដ្ឋាភិបាល​តៃវ៉ាន់​ បដិសេធន៍​មិន​ផ្ដល់​សញ្ជាតិ​ឲ្យ​នោះ​​ទេ ដោយ​សារ​ស្ត្រី​ខ្មែរ​ទាំង​នោះ បាន​រៀប​អាពាហ៍ពិពាហ៍​ក្លែង​ក្លាយ។ ហើយ​ថា​ភាគ​ច្រើន​នៃ​ស្ត្រី​កម្ពុជា ត្រូវ​បាន​គេ​ជួញ​ដូរ​កម្លាំង​ពលកម្ម និង​​​​ជួញ​ដូរ​ផ្លូវ​ភេទ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Nov 16, 2013 12:43 PM

នាងខ្ញុំមានសំនួរមួយចង់បញ្ជាក់ តើច្បាប់នេះមានផលប៉ះពាល់ដល់ការធានាជាគូដណ្តឹងដែររឺទេ? ឱទាហរណថា បុរសមានអាយុ៥១ឆ្នាំហើយមានប្រាក់ចំណូលតិចជាង២៥០០ដុល្លាក្នុងមួយខែ ហើយគាត់ជាប្រជាពលរដ្ឋអូស្រ្តាលី គាត់បានភ្ជាប់ពាក្យជាមួយនារីខ្មែម្នាក់ដែលមានអាយុជាង៣០ឆ្នាំ បន្ទាប់ពីពួកគាត់បានស្រលាញ់និងទាក់ទងគ្នា អស់ជាច្រើនឆ្នាំ មុននឹងមានច្បាប់ថ្មីនេះ។ តើគាត់មានសិទិ្ធធានាគូរដណ្តឹងទៅរស់នៅប្រទេសអូស្រ្តាលីដែររឺទេ? សូមមេត្តាផ្តល់ចំលើយដល់ចំងល់របស់នាងខ្ញុំដោយអនុគ្រោះផង និងដូមអគុណ

គេហទំព័រ​ទាំងមូល