មានប្រសាសន៍ក្នុងអង្គសិក្ខាសាលាថ្នាក់ជាតិស្ដីពីការអភិវឌ្ឍសហគមន៍ព្រៃឈើនៅព្រឹកថ្ងៃ៣០ មីនា នៅឯសណ្ឋាគារភ្នំពេញ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ តុងអ៊ីវ បានអះអាងថា ដោយយល់ច្បាស់ពីផលប្រយោជន៍របស់ព្រៃឈើចំពោះជីវភាពរស់នៅប្រចាំថ្ងៃរបស់ប្រជាពលរដ្ឋ រាជរដ្ឋាភិបាលកម្ពុជា សម្រេចផ្ដល់ដីព្រៃចំនួន ២លានហិកតាទៅឲ្យប្រជាសហគមន៍ព្រៃឈើគ្រប់គ្រងថែរក្សា ការពារ និងអាស្រ័យផល។
លោកបន្តថា រាជរដ្ឋាភិបាលបានចាត់ទុកសហគមន៍ព្រៃឈើជាការងារអាទិភាពក្នុងការគ្រប់គ្រងព្រៃឈើ ដើម្បីលើកកម្ពស់កម្រិតជីវភាពរស់នៅរបស់ប្រជាពលរដ្ឋនៅតាមជនបទ ដោយជំរុញឲ្យមានការបង្កើតជាសហគមន៍ព្រៃឈើឲ្យកាន់តែទូលំទូលាយថែមទៀត។
លោក ច័ន្ទ តុងអ៊ីវ មានប្រសាសន៍ដូច្នេះ ៖ «រដ្ឋបាលព្រៃឈើត្រូវជំរុញ កំណត់តំបន់ព្រៃឈើសម្រាប់រៀបចំជាព្រៃសហគមន៍ដើម្បីឆ្លើយតបទៅនឹងសូចនាករដូចដែលបានរំដោះក្នុងកម្មវិធីព្រៃឈើជាតិចំនួន ២លានហិកតារក្នុងរយៈពេល ៣០ឆ្នាំ»។
នាយកប្រតិបត្តិសមាគមអភិវឌ្ឍន៍កុមារដែលជាអង្គការក្រៅរដ្ឋាភិបាលមួយធ្វើការងារផ្ដោតលើបញ្ហាសហគមន៍ព្រៃឈើ លោក ជា បូរ៉េត បានសម្ដែងពីទឹកចិត្តរីករាយចំពោះដំណឹងនេះ។ ប៉ុន្តែលោកមានការព្រួយបារម្ភចំពោះឧបសគ្គនានា ដែលរួមមានភាពអនាធិបតេយ្យនៃការកាប់ទន្ទ្រានយកដីធ្វើកម្មសិទ្ធិពីកងកម្លាំងប្រដាប់អាវុធមួយចំនួន និងកង្វះការគាំទ្ររបស់អាជ្ញាធរដែនដីក្នុងការបង្កើតសហគមន៍ព្រៃឈើថា ជាការនាំឲ្យរាំងស្ទះដល់គម្រោងអភិវឌ្ឍន៍សហគមន៍ព្រៃឈើក្នុងទូទាំងប្រទេស។
លោក ជា បូរ៉េត មានប្រសាសន៍ដូច្នេះ ៖ «ឧបសគ្គចម្បងទាក់ទិនទៅនឹងមូលដ្ឋានយើងមួយចំនួន គឺអត់ទាន់យល់នូវតម្លៃនៃព្រៃឈើប៉ុន្មានទេ ភាគច្រើនគាត់គិតតែផលប្រយោជន៍បុគ្គល ដូចជាជនឆ្លៀតឱកាសមួយចំនួនគាត់ទិញដី ឃុបឃិតគ្នាលក់ដីអីអ៊ីចឹងទៅនៅក្នុងតំបន់ព្រៃសហគមន៍។ មួយទៀតទាក់ទងនឹងការបង្កើតភូមិថ្មីៗមានការពេញនិយម។ មានន័យថា គេបង្កើតដោយយកកងទ័ពមកដាក់មុខ ហើយគេនាំប្រជាជនមួយចំនួនទៅនៅក្នុងព្រៃហ្នឹង»។
ប្រធានសហគមន៍ព្រៃឈើមួយក្នុងខេត្តកំពង់ឆ្នាំង ដែលមានឈ្មោះថា "សហគមន៍ពេជចង្វាររុក្ខាល្អឆើត" គឺអ្នកស្រី យិន ប៉ិច សម្ដែងពីការត្រេកអរលាយឡំនឹងក្ដីបារម្ភថា អំពើពុករលួយនិងការិយាធិបតេយ្យអាចជាគន្លឹះរាំងស្ទះគោលបំណង និងការប្ដេជ្ញារបស់រដ្ឋាភិបាលក្នុងការអភិវឌ្ឍន៍សហគមន៍ព្រៃឈើនេះ។
អ្នកស្រី យិន ប៉ិច មានប្រសាសន៍ថា ៖ «សូមឲ្យរដ្ឋាភិបាលជួយបង្កើតសហគមន៍ព្រៃឈើ ដូចជាសហគមន៍ខ្ញុំ ដូចជាសហគមន៍ព្រៃឈើផ្សេងៗទៀតឲ្យបានឆាប់ៗនេះ ព្រោះជួបការលំបាកយ៉ាងខ្លាំង»។
ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើ លោក ទី សុគន្ធ បានឲ្យដឹងថា បច្ចុប្បន្នក្នុងទូទាំងប្រទេសមានសហគមន៍ព្រៃឈើចំនួន ៤២៤កន្លែង មានសមាជិកសហគមន៍សរុបមាន ៨១.៩២៤គ្រួសារ គ្របដណ្ដប់លើផ្ទៃដីប្រមាណ ៤០ម៉ឺនហិកតាក្នុងខេត្តចំនួន ២០ នៃស្រុកចំនួន ៨២ និង ១៩៧ឃុំ។ តែរហូតមកដល់បច្ចុប្បន្ននេះមានសហគមន៍ព្រៃឈើតែ ១៤៥កន្លែងប៉ុណ្ណោះដែលត្រូវបានក្រសួងកសិកម្ម រុក្ខាប្រមាញ់ និងនេសាទ ប្រកាសទទួលស្គាល់៕
