មន្ត្រីមូលដ្ឋានឃុំលំជ័រ ស្រុកអូរយ៉ាដាវ ខេត្តរតនគិរីឲ្យដឹងនៅថ្ងៃសៅរ៍ ទី២៩ ខែឧសភា ឆ្នាំ២០១០ ថា អ្នកភូមិបានយល់ព្រមបញ្ឈប់គម្រោងធ្វើបាតុកម្មបណ្ដេញក្រុមហ៊ុនស្រាវជ្រាវរ៉ែរបស់ប្រទេសវៀតណាម ដែលធ្វើឲ្យមានផលប៉ះពាល់ដីស្រែចម្ការអ្នកភូមិហើយ បន្ទាប់ពីក្រុមហ៊ុន អាជ្ញាធរមូលដ្ឋាន រួមនិងអ្នកភូមិ បានជួបប្រជុំគ្នាដោះស្រាយបញ្ហាដោយសន្តិវិធី។
មេឃុំលំជ័រ លោក សេវ ថ្វាន មានប្រសាសន៍ថា ផលប៉ះពាល់ជាក់ស្ដែងលើដីចម្ការអ្នកភូមិ មានតែបីគ្រួសារប៉ុណ្ណោះ ហើយការខូចខាតមិនមានអ្វីធំដុំទេ ទើបមានការសម្របសម្រួលកញ្ចប់បញ្ហាដោយក្រុមហ៊ុនសន្យាថា នឹងមិនឲ្យមានការជីកកកាយប៉ះពាល់ដីចម្ការអ្នកភូមិទៅទៀត។ ចំណែកអ្នកភូមិក៏មិនបានទាមទារសំណងការខូចខាតអ្វីដែរ ដោយស្នើសុំប្រាក់ចំនួន ១៨០.០០០រៀល សម្រាប់ការចំណាយនៅថ្ងៃជួបជុំគ្នានេះតែប៉ុណ្ណោះ។
លោកបន្តថា ៖ «គេឈប់ធ្វើប៉ះហើយ ប៉ុន្តែគេធ្វើនៅក្នុងព្រៃហ្នឹង គេនៅតែបន្តរុករកទេ»។
កាលពីថ្ងៃសុក្រ ទី២៨ ខែឧសភា ឆ្នាំ២០១០ តំណាងក្រុមហ៊ុន អាជ្ញាធរមូលដ្ឋានខេត្តរតនគិរី និងអ្នកភូមិ បាននាំគ្នាចុះទៅពិនិត្យដល់ចម្ការអ្នកភូមិ ដែលក្រុមហ៊ុនស្រាវជ្រាវរ៉ែដែកវៀតណាម ឈ្មោះ ហង អាន រតនគិរី កូអ៊ិលធីឌី (HOANG ANH-RATTANAKIRI Co, Ltd) បានជីកកកាយប៉ះពាល់ហើយមិនព្រមធ្វើការដោះស្រាយសំណងផលប៉ះពាល់ទាំងនោះ ទើបអ្នកភូមិឡែ ភូមិកក់ និងភូមិឈើគ្រៀង ប៉ុនប៉ងធ្វើបាតុកម្មបណ្ដេញក្រុមហ៊ុន កាលពីថ្ងៃទី២៤ ខែឧសភា ឆ្នាំ២០១០ ក៏ប៉ុន្តែមន្ត្រីអាជ្ញាធរ និងក្រុមហ៊ុនបានសម្របសម្រួលសុំឲ្យអ្នកភូមិពន្យារពេល ៥ថ្ងៃ សម្រាប់ការដោះស្រាយបញ្ហា។
តំណាងក្រុមហ៊ុន ហង អាន រតនគិរី លោក ហៀរ ស៊ុន មានប្រសាសន៍ថា អ្នកភូមិភាគច្រើនយល់ច្រឡំខ្លាចបាត់បង់ដីស្រែចម្ការ បន្ទាប់ពីឃើញក្រុមហ៊ុនចុះមកបោះទីតាំងធ្វើការស្រាវជ្រាវពីរ៉ែ។លោកបញ្ជាក់ថា ក្រុមហ៊ុនកំពុងធ្វើការស្រាវជ្រាវតាមរយៈអាជ្ញាប័ណ្ណ ដែលបានអនុញ្ញាតពីរាជរដ្ឋាភិបាល ហើយប្រសិនណាតំបន់ដែលកំពុងស្រាវជ្រាវពិតជាមានរ៉ែនោះ ការសិក្សាពីផលប៉ះពាល់ដល់អ្នកភូមិនឹងត្រូវធ្វើមុននឹងឈានទៅដល់ការធ្វើអាជីវកម្មជីកយករ៉ែនោះ។
លោកមានប្រសាសន៍បន្តថា ៖ «ឥឡូវហ្នឹង វាប៉ះប្រហែលជា ចូលពីផ្លូវថ្នល់ ប្រហែលជាមួយម៉ែត្រទៅពីរម៉ែត្រ កៀកចម្ការ! យើងកាយយូរហើយ យើងកាយអត់ឃើញ យើងលប់វិញទៅ គាត់ដាំដំឡូង»។
តំណាងអ្នកភូមិ លោក សល់ យួន មានប្រសាសន៍ថា អ្នកភូមិមិនជំទាស់នឹងការវិនិយោគរបស់ក្រុមហ៊ុនដែលមានការអនុញ្ញាតពីរាជរដ្ឋាភិបាលទេ ក៏ប៉ុន្តែអ្វីដែលជាផលប៉ះពាល់ដល់អ្នកភូមិ ពីគម្រោងវិនិយោគនោះ ត្រូវមានការពិភាក្សា និងដោះស្រាយជាមួយអ្នកភូមិជាមុនសិន។
លោកមានប្រសាសន៍បន្តថា ៖ «ដូចថាចំណុចសម្រុះសម្រួលរួចហើយ យើងយល់ព្រម កុំឲ្យគេកាយដីចម្ការដីអីហ្នឹង»។
ក្រសួងឧស្សាហកម្មប្រទេសកម្ពុជាអនុញ្ញាតឲ្យក្រុមហ៊ុន ហង អាន រតនគិរី ធ្វើការសិក្សាស្រាវជ្រាវពីរ៉ែដែកលើផ្ទៃដី ១០០០ហិកតារ នៅស្រុកអូរយ៉ាដាវ ពីឆ្នាំ២០១០ ដល់ឆ្នាំ២០១១ ដែលពាក់ព័ន្ធតំបន់អ្នកភូមិជនជាតិដើម នៅឃុំចំនួន៥ កំពុងរស់នៅ។
អ្នកភូមិនិយាយថា ពួកគាត់កំពុងភ័យខ្លាចពីការបាត់បង់ដីស្រែចម្ការ លំនៅឋាន វប្បធម៌ប្រពៃណី និងតំបន់ព្រៃឈើ រ៉ែធនធានធម្មជាតិ ដែលអ្នកភូមិធ្លាប់រស់អាស្រ័យផល។ ពួកគាត់សំណូមពរឲ្យមានការសិក្សាពីផលប៉ះពាល់ជាមួយអ្នកភូមិ ឲ្យបានជាក់លាក់ និងកាត់ចេញនូវផលប៉ះពាល់ទាំងនោះ មុននឹងធ្វើសម្បទានដីនៅតំបន់ជនជាតិដើមរស់នៅ៕
