កាលពីថ្ងៃទី៣០ ខែកញ្ញា កន្លងទៅ ក្រុមប្រឹក្សាអាជ្ញាកណ្តាល បានចេញសេចក្ដីសម្រេច និងបង្គាប់ឱ្យម្ចាស់សណ្ឋាគារ Angkor Village Botanical Resort និងសណ្ឋាគារអង្គរវិឡា ទទួលយកបុគ្គលិក និងកម្មករចំនួន ៦៧នាក់ ដែលគេបានបញ្ឈប់នោះ បានចូលធ្វើការវិញ ក៏ប៉ុន្តែម្ចាស់សណ្ឋាគារបានជំទាស់ទៅនឹងសេចក្តីបង្គាប់របស់ក្រុមប្រឹក្សាអាជ្ញាកណ្ដាលនោះ បណ្ដាលឱ្យក្រុមកម្មករនាំគ្នាធ្វើកូដកម្មម្ដងមកហើយ។
ម្ចាស់សណ្ឋាគារបានឆ្លើយតបទៅនឹងការទាមទាររបស់បុគ្គលិកកម្មករតាមរយៈការបោះពុម្ពអក្សរលើបដាមួយផ្ទាំង ដែលដាក់តាំងនៅនឹងមុខសណ្ឋាគារថា រយៈពេល ១៧ឆ្នាំមកហើយសណ្ឋាគារអង្គរវិឡា បានផ្ដល់ជូនភ្ញៀវទេសចរណ៍ដែលមកស្នាក់នៅនូវកន្លែងមួយដែលបង្ហាញអំពីវប្បធម៌ខ្មែរ មានបរិស្ថានស្រស់ស្អាត ការផ្ដល់សេវាដ៏ល្អបំផុត។ កន្លែងដែលទេសចរណ៍មកស្នាក់នៅ និងលំហែកាយ ជាកន្លែងដែលមានភាពរួសរាយរាក់ទាក់ និងបរិយាកាសស្ងៀមស្ងាត់។ ដូច្នេះដើម្បីធានា និងរក្សាសេវាកម្មនេះ គេមិនអាចទទួលយកអ្នកដែលមានការប្រមាថដាក់ថ្នាំពុលក្នុងអាហារ និងធ្វើកូដកម្មខុសច្បាប់ ឬក៏ការរំខានផ្សេងៗដែលធ្វើឡើងដោយសមាជិកសហជីពបានទេ៕