អង្គការ​សិទ្ធិមនុស្ស​ខ្មែរ សុំ​ឱ្យ​រដ្ឋាភិបាល​ការពារ​ពលរដ្ឋ​​ពី​ការ​បាញ់​សម្លាប់​របស់​ថៃ

អ្នក​ដឹកនាំ និង​បុគ្គលិក​របស់​អង្គការ​សិទ្ធិមនុស្ស​នានា បាន​អំពាវនាវ​ឲ្យ​រដ្ឋាភិបាល​ចាត់​វិធានការ​ឲ្យ​បាន​ខ្លាំង​ជាង​មុន​ថែម​ទៀត ដើម្បី​កុំ​ឲ្យ​ទាហាន​ថៃ​បន្ត​បាញ់​សម្លាប់​ប្រជាពលរដ្ឋ​ខ្មែរ ដែល​ឆ្លង​ដែន​ចូល​ដី​ថៃ​ខុស​ច្បាប់។
ដោយ កែវ និមល
2012-02-27
អ៊ីម៉ែល
មតិ
Share
បោះពុម្ព

លោក អ៊ូ វីរៈ ជា​ប្រធាន​មជ្ឈមណ្ឌល​ការពារ​សិទ្ធិមនុស្ស​កម្ពុជា។ លោក​មាន​ប្រសាសន៍​នៅ​ថ្ងៃ​ទី ២៦ កុម្ភៈ​ថា ទាហាន​ថៃ​ដែល​បាញ់​សម្លាប់​ប្រជាពលរដ្ឋ​ខ្មែរ​ឆ្លង​ដែន​ខុស​ច្បាប់ ដើម្បី​ទៅ​ធ្វើ​ការ​ទៅ​រក​ស៊ី​នៅ​ក្នុង​ដី​ថៃ ជា​ការ​រំលោភ​លើ​ច្បាប់​អន្តរជាតិ និង​រំលោភ​សិទ្ធិមនុស្ស​ហើយ។

លោក អ៊ូ វីរៈ៖ «និយាយ​ទៅ សូម្បី​តែ​អ្នក​អន្តោប្រវេសន៍​ខុស​ច្បាប់ ក៏​គេ​ការពារ​ដែរ។ គ្រាន់​តែ​ថា ក្នុង​ប្រទេស​និមួយៗ គេ​មាន​ច្បាប់​ដើម្បី​ការពារ​អន្តោប្រវេសន៍​ខុស​ច្បាប់​បាន។ ប៉ុន្តែ ច្បាប់​ទាំង​ឡាយ​នោះ មិន​អាច​មាន​ដល់​ថ្នាក់​បាញ់​សម្លាប់​បាន នៅ​កន្លែង​អ៊ីចឹង​បាន​ទេ។ អត់​មាន​ច្បាប់​អន្តរជាតិ​មួយ​ណា គេ​ឲ្យ​បាញ់​សម្លាប់​អ៊ីចឹង​បាន​ទេ។ ហើយ​ការ​បាញ់​សម្លាប់​ខ្មែរ​យើង ដែល​ចូល​ទៅ​កាប់​ឈើ​ ខុស​ច្បាប់​ក៏​ដោយ។ មូលហេតុ​អី​ផ្សេង​ក៏​ដោយ ក៏​អត់​មាន​ច្បាប់​ផ្សេង​ឲ្យ​ធ្វើ​អ៊ីចឹង​បាន​ទេ»។

លោក អ៊ូ វីរៈ បាន​លើក​ឡើង​ថា បើ​គ្រាន់​តែ​ឆ្លង​ដែន​ខុស​ច្បាប់​នោះ មិន​មាន​ទោស​ដល់​ថ្នាក់​ត្រូវ​បាញ់​សម្លាប់​ចោល​ឡើយ។ ទាហាន ឬ​ឆ្មាំ​ព្រំដែន​ថៃ អាច​ចាប់​ប្រជាពលរដ្ឋ​ខ្មែរ​ឆ្លង​ដែន​ខុស​ច្បាប់​ទាំង​នោះ ដើម្បី​ផាក​ពិន័យ ឬ​យក​ទៅ​កាត់​ទោស​តាម​ច្បាប់​ថៃ​បាន​កំណត់។ ជា​ពិសេស ប្រទេស​ថៃ និង​ខ្មែរ ដែល​មាន​ព្រំដែន​ជាប់​គ្នា អាច​មាន​កិច្ចព្រមព្រៀង​ទ្វេ​ភាគី ក្នុង​បញ្ហា​ប្រជាពលរដ្ឋ​ឆ្លង​ដែន​ខុស​ច្បាប់​នេះ ដើម្បី​សម្រួល​គ្នា​បាន​ទៀត​ផង។

លោក អ៊ូ វីរៈ បាន​អំពាវនាវ​ឲ្យ​មន្ត្រី​រដ្ឋាភិបាល​កម្ពុជា ធ្វើ​សកម្មភាព​ឲ្យ​បាន​ខ្លាំង​ជាង​មុន​ថែម​ទៀត ដើម្បី​ការពារ​កុំ​ឲ្យ​មាន​ការ​បាញ់​សម្លាប់​នេះ កើត​មាន​ត​ទៅ​ទៀត។ លោក​ថ្លែង​ថា បើ​មាន​ការ​បាញ់​សម្លាប់​មនុស្ស​ហើយ ក្រសួង​ការបរទេស​កម្ពុជា ធ្វើ​កំណត់​ហេតុ​តវ៉ា​ការ​ទូត​ទៅ​ប្រទេស​ថៃ ហើយ​គេ​នៅ​តែ​បន្ត​បាញ់​សម្លាប់​ទៀត​នោះ មន្ត្រី​ខ្មែរ​ត្រូវ​តែ​រក​វិធី​ថ្មី​ហើយ។ ជា​ពិសេស​ឆ្នាំ ២០១២ នេះ ប្រទេស​កម្ពុជា ជា​ប្រធាន​សមាគម​ប្រទេស​អាស៊ាន ដែល​មាន​ប្រទេស​ថៃ​ជា​សមាជិក​ផង​ដែរ។

លោក អ៊ូ វីរៈ៖ «ប្រទេស​កម្ពុជា តាម​ពិត​មាន​កាតព្វកិច្ច​ក្នុង​ការ​ការពារ​ប្រជាពលរដ្ឋ​របស់​ខ្លួន​នោះ អាច​ដាក់​ទៅ​ក្រុមប្រឹក្សា​សិទ្ធិមនុស្ស​របស់ អ.ស.ប ដើម្បី​សើរើ​បញ្ហា​ប្រទេស​ថៃ​នេះ។ ហើយ​ឲ្យ​មាន​យន្តការ​អន្តរជាតិ ទប់​កុំ​ឲ្យ​ប្រទេស​ថៃ​រំលោភ​លើ​សិទ្ធិ​ប្រជាពលរដ្ឋ​ខ្មែរ​ក្នុង​ករណី​នេះ​បាទ»។

អ្នក​ទទួល​ខុស​ត្រូវ​អង្គការ​សិទ្ធិមនុស្ស​មួយ​រូប​ទៀត គឺ​លោក ចាន់ សុវ៉េត ជា​អ្នក​អង្កេត​របស់​សមាគម​ ការពារ​សិទ្ធិមនុស្ស​ឈ្មោះ អាដហុក។ លោក​បាន​លើក​ឡើង​ថា រឿង​ក្រសួង​ការ​បរទេស​កម្ពុជា​ធ្វើ​កំណត់​ហេតុ​ការ​ទូត​តវ៉ា​រឿង​ទាហាន​ថៃ​បាញ់​ប្រជាពលរដ្ឋ​ខ្មែរ​នោះ វា​ដូច​ជា​ដដែលៗ ម្ដង​ហើយ​ម្ដង​ទៀត មិន​មាន​ប្រសិទ្ធភាព​ឡើយ។

លោក អ៊ូ វីរៈ៖ «ខ្ញុំ​គិត​ថា អា​រឿង​ធ្វើ​កំណត់​ទូត​នោះ វា​ជា​រឿង​ហួស​សម័យ​ហើយ។ ត្រូវ​រក​មធ្យោបាយ​ល្អ​ជាង​នឹង»។

លោក ចាន់ សុវ៉េត មាន​យោបល់​ថា បើ​ប្រទេស​កម្ពុជា​តែ​មួយ និយាយ​ជា​មួយ​ប្រទេស​ថៃ គេ​មិន​ស្ដាប់​ទេ គេ​នៅ​តែ​បាញ់​ប្រជាពលរដ្ឋ​ខ្មែរ​ដដែល។ មាន​តែ​ប្រទេស​ខ្មែរ សុំ​ឲ្យ​អន្តរជាតិ ឬ​ប្រទេស​ជា​ច្រើន​ជួយ​និយាយ​កុំ​ឲ្យ​ទាហាន​ថៃ​បាញ់​សម្លាប់​មនុស្ស​បែប​នេះ​តទៅ​ទៀត។

លោក ចាន់ សុវ៉េត សុំ​ឲ្យ​រដ្ឋាភិបាល​ខ្មែរ​ចាត់ការ​ឲ្យ​មាន​ប្រសិទ្ធភាព​ក្នុង​រឿង​ទប់​ស្កាត់​ទាហាន​ថៃ ដែល​បន្ត​បាញ់​ប្រជា​ពលរដ្ឋ​ខ្មែរ​ឆ្លង​ដែន​ខុស​ច្បាប់​នោះ។ ជា​មួយ​នេះ​ដែរ​លោក សុវ៉េត សុំ​ឲ្យ​អាជ្ញាធរ​ខ្មែរ​ស៊ើបអង្កេត មាន​ទិន្នន័យ​ឲ្យ​បាន​ច្បាស់លាស់​អំពី​ចំនួន​ប្រជាពលរដ្ឋ​ខ្មែរ ដែល​ត្រូវ​ទាហាន​ថៃ​បាញ់​សម្លាប់​នោះ។

លោក ចាន់ សុវ៉េត៖ «ទាក់ទង​បញ្ហា​នេះ ទាល់​តែ​ភ្នាក់ងារ​រដ្ឋាភិបាល​យើង​ធ្វើ​ការ​ស៊ើបអង្កេត​ឲ្យ​បាន​ ម៉ត់ចត់​សិន​ថា ពិត​ប្រាកដ​មាន​ការ​បាញ់​សម្លាប់​ពិត​ប្រាកដ​មែន​អ៊ីចឹង​ឬ​អត់? ហើយ​ការ​បាញ់​សម្លាប់​នោះ អាច​បណ្ដាល​មក​ពី​អី​ខ្លះ? ប្រទេស​យើង​ត្រូវ​ធ្វើការ​ស៊ើបអង្កេត​ឲ្យ​បាន​ច្បាស់​សិន។ មាន​មនុស្ស​ប៉ុន្មាន​នាក់ ដែល​របួស និង​ស្លាប់។ បើ​ធ្វើ​ត្រឹម​តែ​កំណត់​ទូត​អ៊ីចឹង វា​មិន​មាន​ប្រសិទ្ធភាព​ទេ»។

លោក ចាន់ សុវ៉េត បាន​ឲ្យ​ដឹង​ថា របាយការណ៍​ដែល​លោក​ទទួល​បាន​ពី​បណ្ដាល​ការងារ​អង្គការ អាដហុក នៅ​តាម​បណ្ដា​ខេត្ត បាន​ឲ្យ​ដឹង​ថា គិត​ចាប់​តាំង​ពី​ដើម​ខែ​កុម្ភៈ​មក​ទល់​ថ្ងៃ​ទី ២៥ ខែ​កុម្ភៈ មាន​ប្រជាពលរដ្ឋ​ខ្មែរ​ចំនួន ៨ នាក់ បាន​ស្លាប់​ដោយសារ​ទាហាន​ថៃ​បាញ់​សម្លាប់។ ជា​ពិសេស នៅ​ខេត្ត​ឧត្តរមានជ័យ។

វិទ្យុ​អាស៊ី​សេរី មិន​អាច​ទាក់ទង​លោក កុយ គួង មន្ត្រី​អ្នក​នាំ​ពាក្យ​ក្រសួង​ការ​បរទេស និង​លោក ផៃ ស៊ីផាន មន្ត្រី​អ្នក​នាំ​ពាក្យ​ទីស្ដីការ​គណៈរដ្ឋមន្ត្រី ដើម្បី​សុំ​អត្ថាធិប្បាយ​ទាក់ទង​រឿង​ទាហាន​ថៃ​បាញ់​ប្រជាពលរដ្ឋ​ខ្មែរ មាន​ចំនួន​អ្នក​ស្លាប់​ច្រើន​ក្នុង​ខែ​កុម្ភៈ​នេះ​បាន​ឡើយ។

ប្រជាពលរដ្ឋ​មួយ​រូប​សុំ​មិន​ចេញ​ឈ្មោះ រស់​នៅ​ភូមិ​អូរ​ស្វាយ ឃុំ​អូរ​ស្វាយ ស្រុក​ត្រពាំង​ប្រាសាទ ខេត្ត​ឧត្តរមានជ័យ បាន​និយាយ​ថា ប្រជាពលរដ្ឋ​រស់​នៅ​ជាប់​ព្រំដែន​ខ្មែរ ថៃ នៅ​ម្ដុំ​ស្រុក​ត្រពាំង​ប្រាសាទ ខេត្ត​ឧត្តរមានជ័យ​មួយ​ចំនួន ត្រូវ​ទាហាន​ថៃ​បាញ់​ស្លាប់ ដោយសារ​តែ​គាត់​ច្រើន​នាំ​គ្នា​ឆ្លង​ដែន​ចូល​ដី​ថៃ ដើម្បី​កាប់​ឈើ​គ្រញូង​យក​មក​លក់ ពីព្រោះ​ឈើ​គ្រញូង ជា​ប្រភេទ​ឈើ​ប្រណិត ហើយ​មាន​ឈ្មួញ​រក​ទិញ ដោយ​ហ៊ាន​ឲ្យ​ថ្លៃ​ខ្ពស់​ទៀត​ផង។

សំឡេង​ពលរដ្ឋ​លាក់​ឈ្មោះ៖ «ពួក​នេះ​ចូល​ទៅ​រក​គ្រញូង​អេតចាយ​ណា​បង។ អា​គ្រញូង​កូន​ក្រឡឹង​យើង។ អា​តូចតាច​នោះ​ណា​បង។ មិន​មែន​ទៅ​រក​អុស​ឈើ​ធំ​ទេ»។

ប្រភព​ឈ្មួញ​លក់ និង​ទិញ​ឈើ​សុំ​មិន​ចេញ​ឈ្មោះ​បាន​ឲ្យ​ដឹង​ថា ឈើ​គ្រញូង បើ​មាន​ដើម​តូចៗ គេ​គិត​ថ្លៃ​ដោយ​ថ្លឹង​ជញ្ជីង​គិត​ជា​គីឡូ​ក្រាម។ ឈើ​គ្រញូង​តូចៗ ក្នុង​មួយ​គីឡូក្រាម មាន​តម្លៃ​ចាប់​ពី ២ ដុល្លារ​អាមេរិក​ឡើង​ទៅ​រហូត​ដល់ ៤ ដុល្លារ​អាមេរិក។ ចំពោះ​ឈើ​គ្រញូង​ប្រភេទ​មាន​ទំហំ​ធំ មាន​មុខ​កាត់​ចាប់​ពី ២០ សង់ទីម៉ែត្រ ឬ​ភាសា​សាមញ្ញ​ថា ២ តឹក​ឡើង​ទៅ និង​មាន​កម្រាស់​ក្រាស់ គេ​គិត​ជា​ម៉ែត្រគីប។ ឈើ​គ្រញូង គិត​ជា​ម៉ែត្រ​គីប មាន​តំលៃ​ចាប់​ពី ១.០០០ ដុល្លារ​ឡើង​ទៅ។

ប្រទេស​កម្ពុជា និង​ថៃ កំពុង​មាន​ទំនាស់​គ្នា​លើ​រឿង​ខ្សែ​បន្ទាត់​កំណត់​ព្រំដែន។ ជា​ពិសេស នៅ​តំបន់​ប្រាសាទ​ព្រះវិហារ​ក្នុង​ខេត្ត​ព្រះវិហារ និង​នៅ​តំបន់​ប្រាសាទ​តា​ក្របី និង​ប្រាសាទ​តា​មាន់ នៅ​ខេត្ត​ឧត្តរ​មានជ័យ​ជាដើម។

អាជ្ញាធរ​ខ្មែរ​ក៏​ធ្លាប់​ចាប់​បាន​ប្រជាពលរដ្ឋ​ថៃ​ឆ្លង​ដែន​ខុស​ច្បាប់ ចូល​មក​ដី​ខ្មែរ​ដែរ។ តែ​អាជ្ញាធរ​ខ្មែរ​មិន​ដែល​បាញ់​សម្លាប់​ឡើយ។ ឧទាហរណ៍ ដូច​ជា​ករណី​លោក វីរៈស៊ុមខ្វាមឃីត (Veera Somkwamkid) និង​អ្នកស្រី រ៉ាទ្រី ពីប៉ាតាណា ប៉ៃប៊ូន (Ratree Pipatanapaiboon) ដែល​ជា​សមាជិក​ក្រុម​មេ​ដឹកនាំ​ពួក​អាវ​លឿង​នៅ​ប្រទេស​ថៃ។ អាជ្ញាធរ​ខ្មែរ បាន​បញ្ជូន​អ្នក​ទាំង​ពីរ​រូប​នោះ ទៅ​តុលាការ​ខ្មែរ ដើម្បី​ចោទ​ប្រកាន់ និង​ផ្ដន្ទាទោស​តាម​ច្បាប់​ខ្មែរ។

ក្រៅ​ពី​បាញ់​សម្លាប់​ប្រជាពលរដ្ឋ​ខ្មែរ ដែល​លួច​ឆ្លង​ដែន​ចូល​ដី​ថៃ​កាប់​ឈើ ទាហាន និង​អាជ្ញាធរ​ថៃ ក៏​ ធ្លាប់​បាន​ចាប់​បញ្ជូន​ប្រជាពលរដ្ឋ​ខ្មែរ ដែល​ឆ្លង​ដែន​ខុស​ច្បាប់​មក​ប្រទេស​ខ្មែរ​វិញ​ជា​ញឹកញយ​ដែរ។ ប្រជាពលរដ្ឋ​ខ្មែរ​ទាំង​នោះ ចូល​ទៅ​ប្រទេស​ថៃ​ខុស​ច្បាប់ ដើម្បី​ធ្វើ​ជា​កម្មករ​សំណង់ ធ្វើ​កម្មករ​នេសាទ​តាម​ទូក​នៅ​សមុទ្រ ធ្វើ​ការ​តាម​កសិដ្ឋាន​ឯកជន និង​ខ្លះ​ជា​អ្នក​សុំទាន​នៅ​តាម​ទី​ប្រជុំ​ជន​នានា។ល។

របាយការណ៍​របស់​អង្គការ​សិទ្ធិមនុស្ស អាដហុក បាន​បង្ហាញ​ថា នៅ​ក្នុង​ឆ្នាំ ២០១១ កន្លង​ទៅ យ៉ាង​ហោច​ណាស់ មាន​ប្រជាពលរដ្ឋ​ខ្មែរ​ចំនួន ១៥ នាក់ ត្រូវ​ទាហាន​ថៃ​បាញ់​សម្លាប់ និង​មាន​ប្រជាពលរដ្ឋ​ខ្មែរ​ជា​ច្រើន​ពាន់​នាក់ ត្រូវ​ថៃ​បញ្ជូន​មក​ប្រទេស​កម្ពុជា​វិញ៕

ព័ត៌មាន (6)
Share

អ្នក​អាន​អនាមិក

បើរដ្ឋាភិបាលមិនបាច់ទៅអង្វរថៃសុំកុំបាញ់ខ្មែរទេ
រដ្ឋាភិបាលគ្រាន់តែបិទ និងទប់ស្កាត់ឈ្មុញទិញឈើក្នុងស្រុក
ខ្មែរឱ្យមានប្រសិទ្ធភាពទៅបានហើយ ព្រោះខ្មែរទៅកាប់
ឈើនៅថៃតែយកមកលក់ឱ្យឈ្មួញក្នុងស្រុកខ្មែរតើ
ហើយដឹកឈើក៍កាត់ស្រុកខ្មែរដែរ។ បើបិទឱ្យជិតតើខ្មែរទៅ
កាប់យកមកលក់ឱ្យនរណា?

Feb 28, 2012 10:40 PM

អ្នក​អាន​អនាមិក

If no one cares, why don't khmers just shoot thais back. Kill them raw. Khmers have full rights to defend themselves.

Feb 28, 2012 08:32 PM

អ្នក​អាន​អនាមិក

Boths goverment can't be ignore debated for solutions,this is severe criminal agains humanidy,Example there alot mexican are being deported home after criminal background check,Khmer locals goverment and forestwatches along Thailand border chould has educated mandatory to peoples and restrict security.Note if you let one down all of us down.this is terrible situation people got killed more than war combats.

Feb 27, 2012 03:22 PM

អ្នក​អាន​អនាមិក

This is the Condom of Kampuchea and under the Hun Sen's regime. from the east the veit flowing in non-stop and from the west the Thai killing Khmer Non-stop. So, both sides have they have good relationship with Khmer?. I never heard the khmer king or Hun Sen brought up any concern about this issue.

Feb 27, 2012 01:01 PM

អ្នក​អាន​អនាមិក

The government appears to take less confrontational approach to address this persistent issue with the Thai government. I think that the government should reveiw its diplomatic approaches they were not working. Thai soldiers continue to slaughtering Khmer citizens who crossed into Thailand illegally who allegedly cut down trees. It can't keep take diplomatic protest while it isn't working. Cambodia is a signatory to the International Covenant on Civil and Political Rights 1966, so it can bring the matter up to the Human Rights Committee, which is a monitoring body of this covenant because the government is the direct subject of international law. Whereas HRNGOs also can do the same, but they are not the direct subject before international law. However, it is worth trying so as to help prevent further loss of human life.

Feb 27, 2012 08:12 AM

មើល​មតិ​ទាំង​អស់.

គេហទំព័រ​ទាំងមូល