មជ្ឈមណ្ឌលសិទ្ធិមនុស្សកម្ពុជា គឺជាអង្គការការពារសិទ្ធិមនុស្សមួយក្នុងចំណោមអង្គការការពារសិទ្ធិមនុស្សផ្ដេងៗទៀតនៅក្នុងប្រទេសកម្ពុជា។ អង្គការនេះកំពុងចាប់ផ្តើមផ្សព្វផ្សាយទាក់ទាញម្ចាស់ក្រុមហ៊ុនឯកជន សហគ្រាសធំ តូចនានា ឲ្យអនុវត្តគម្រោងមួយដែលអង្គការនេះហៅថា «អាជីវកម្ម និង សិទ្ធិមនុស្ស» ដែលចាត់ទុកថា ជាកាតព្វកិច្ចរបស់ក្រុមហ៊ុននីមួយៗ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ថ្លែងថា មន្ត្រីអង្គការលោកបានជួបប្រជុំពិភាគ្សាជាមួយមន្ត្រីទូត ដំណាងក្រុមហ៊ុនពាណិជ្ជកម្មនានា និងមន្ត្រីរដ្ឋាភិបាល នៅល្ងាចថ្ងៃទី១១ ខែមិថុនា នៅសណ្ឋាគារកាំបូឌីយ៉ាណា ដើម្បីបញ្ជូលកម្មវិធីនេះនៅតាមក្រុមហ៊ុន។ លោកថា ប្រធានបទរក្សាបរិស្ថាន និងការគោរពសមធម៌ពាណិជ្ជកម្ម ឬការទទូលផលពាណិជ្ជកម្មស្មើភាពគ្នាសម្រាប់មនុស្សទូទៅ ក៏បានដាក់ចូលក្នុងគម្រោងនេះដែរ។
លោក អ៊ូ វីរៈ មានប្រសាសន៍ថា ៖ «បើសិនជានិយាយពីការគោរព និងការរំលោភសិទ្ធិមនុស្ស វាមានក្រុមហ៊ុនដែលរំលោភសិទ្ធិមនុស្សមួយចំនួន ទាក់ទងនឹងកម្មករផង ទាក់ទងសង្គម និងបរិស្ថានជុំវិញគាត់ផង។ ក្រុមហ៊ុនដែលកាប់ព្រៃឈើ ក្រុមហ៊ុនរករ៉ែ បំផ្លាញដល់សង្គម ដល់បរិស្ថានទឹកស្អាតរបស់អ្នកភូមិ ក្រុមហ៊ុនដែលរំលោភដីធ្លីប្រជាពលរដ្ឋជាដើម។ ប៉ុន្តែអ្វីដែលពួកខ្ញុំចង់ធ្វើហ្នឹង គឺចង់ឆ្លុះបញ្ចាំងផងដែរថា មានក្រុមហ៊ុនជាច្រើនផ្សេងទៀត ដែលគាត់ប្ដេជ្ញាចិត្តគោរពសិទ្ធិ ដើម្បីទទួលជោគជ័យក្នុងអាជីវកម្មរបស់គាត់ផង ហើយចូលរួមកសាងសង្គមជាតិយើងផង»។
កម្មវិធីនេះបានរៀបចំឡើងដោយសារមានការសិក្សាឃើញថា មានការរំលោភសិទ្ធិមនុស្សនៅតាមក្រុមហ៊ុន សហគ្រាស សិប្បកម្មនានា ដូចជា បង្ខំបុគ្គលិក កម្មករ ធ្វើការលើសម៉ោង ចាក់សោកម្មករក្នុងបន្ទប់បង្ខំឲ្យធ្វើការ បង្ខំឲ្យធ្វើការក្នុងកន្លែងជាតិគីមីពុល ហើយក្រុមហ៊ុនខ្លះបានរំលោភយកដីប្រជាជន បណ្តេញប្រជាជនចេញពីលំនៅ កាប់បំផ្លាញព្រៃឈើ រុករករ៉ែ បំផ្លាញបរិស្ថាន ប៉ះពាល់ដល់ជីវភាពរស់នៅអ្នកស្រុករស់នៅជុំវិញក្រុមហ៊ុនជាដើម។
មន្ត្រីគម្រោងនៃកម្មវិធីនេះ លោក ចក់ សុភី បញ្ជាក់បន្ថែម ៖ «ប្រជាជនកម្ពុជាយើងមួយចំនួនមិនបានទទួលអត្ថប្រយោជន៍ពីការអភិវឌ្ឍសេដ្ឋកិច្ចនោះនៅឡើយទេ ជារឿយៗ ប្រជាជនកម្ពុជា បែរជាទទួលឥទ្ធិពលអវិជ្ជមាន ដោយសារគម្រោងអភិវឌ្ឍន៍សេដ្ឋកិច្ចទាំងនោះ ដូចជាការគំរាមកំហែង ការបាត់បង់ការងារ ដីធ្លី ផ្ទះសម្បែង ឬបាត់បង់សិទ្ធិប្រើប្រាស់ធនធានធម្មជាតិជាដើម...។ មួយទៀត ដូចជាផ្នែកខាងរោងចក្រ ដែលម្ចាស់រោងចក្របង្ខំឲ្យបុគ្គលិកធ្វើការលើសម៉ោង...»។
មន្ត្រីតំណាងរដ្ឋាភិបាល លោកឧត្ដមសេនីយ៍ ប៉ោ ភក្តិ ប្រធាននាយកដ្ឋានអភិបាលកិច្ចល្អមូលដ្ឋាននៃក្រសួងមហាផ្ទៃ ដែលបានចូលរួមកិច្ចប្រជុំនោះ បានគាំទ្រគម្រោងនេះ ហើយបានអះអាងថា គម្រោងនេះល្អ ហើយស្របទៅនឹងគោលការណ៍អភិវឌ្ឍន៍របស់រដ្ឋាភិបាលសព្វថ្ងៃ។
លោក ប៉ោ ភក្ដិ មានប្រសាសន៍ដូច្នេះ ៖ «ថ្មីបន្តិចសម្រាប់បរិបថខាងកម្ពុជាយើង ទោះបីយើងបានធ្វើកន្លងមកដោយមិនដឹងខ្លួនក៏ដោយ ប៉ុន្តែវាជារឿងដែលគេបានជជែកគ្នានៅប្រទេសផ្សេងៗ។ ខ្ញុំគិតថា នេះក៏វាស្របនឹងការងារគម្រោងអភិបាលកិច្ចល្អមូលដ្ឋានដែរ ព្រោះយើងចង់ជំរុញឲ្យមានអភិបាលកិច្ចល្អមូលដ្ឋាន ការផ្ដល់សេវាសាធារណៈជូនប្រជាពលរដ្ឋអី»។
ក្រុមមន្ត្រីសិទ្ធិមនុស្សត្អូញត្អែរថា គេកម្រឃើញមានក្រុមហ៊ុនឯកជនគិតគូរអំពីការគោរពសិទ្ធិមនុស្ស រក្សាបរិស្ថាន និងចេះពិចារណាអំពីសិទ្ធិស្មើភាពគ្នាក្នុងការទទួលផលសេដ្ឋកិច្ចពាណិជ្ជកម្មណាស់នៅក្នុងប្រទេសកម្ពុជា សព្វថ្ងៃ។ ផ្ទុយទៅវិញ ក្រុមហ៊ុននីមួយៗគិតតែពីផលប្រយោជន៍ផ្ទាល់ខ្លួន ជាពិសេសម្ចាស់ក្រុមហ៊ុនរោងចក្រកាត់ដេរតែម្ដង។
លោក ចក់ សុភី បន្តថា ៖ «កម្មកររោងចក្រខ្លះគាត់ត្រូវបានចាក់សោឲ្យធ្វើការនៅក្នុងរោងចក្រ បង្ខំឲ្យធ្វើការហួសម៉ោង ហើយសហគ្រាសមួយចំនួនដែលគាត់ផលិតកាកសំណល់ផ្សេងៗ មានជាតិពុល ហើយហូរទៅបំពុលទន្លេ ប៉ះពាល់ដល់សហគមន៍ ដូចជាផ្នែកនេសាទត្រីផងដែរ។ មួយទៀត គឺកម្មករខ្លះត្រូវបានមិនឲ្យបង្កើតជាសហគមន៍ និងនិយាយពីការរំលោភសិទ្ធិពីថៅកែរបស់គាត់ហ្នឹង។ នៅក្រុមហ៊ុនកសិកម្មខ្លះ បង្ខំឲ្យកម្មករធ្វើការជាមួយជាតិគីមីដែលមានគ្រោះថ្នាក់ដោយគ្មានប្រដាប់ការពារ។ ទាំងអស់នេះគឺជាការរំលោភសិទ្ធិ»។
របាយការណ៍របស់ក្រសួងផែនការដែលបានធ្វើជំរឿនឆ្នាំ២០០៩ ក្រោមប្រាក់ឧបត្ថម្ភរបស់រដ្ឋាភិបាលជប៉ុន និងទីភ្នាក់ងារសហប្រតិបត្តិការអន្តរជាតិប្រទេសជប៉ុន JICA បង្ហាញថា នៅទូទាំងប្រទេសកម្ពុជា មានសហគ្រាសក្រុមហ៊ុនទាំងតូចធំចំនួន ៥សែន និងមានបុគ្គលិក កម្មករ ទាំងពីរភេទសរុបចំនួនជាង ១លាន៥សែននាក់។
យ៉ាងណាក្តី ក្នុងចំណោមក្រុមហ៊ុនទាំងនោះ មានក្រុមហ៊ុនមួយដែលក្រុមសិទ្ធិមនុស្ស រួមទាំងរដ្ឋាភិបាលផងដែរ បានកោតសសើរ និងទទួលស្គាល់ថា ក្រុមហ៊ុនធនាគារមួយឈ្មោះ អេស៊ីលីដា គឺជាក្រុមហ៊ុនល្អជាងគេ បានគោរពសិទ្ធិមនុស្ស គោរពច្បាប់ការពារបរិស្ថាន និងផ្ដល់ផលប្រយោជន៍សេដ្ឋកិច្ចស្មើៗភាពគ្នាដល់បុគ្គលិក និងសង្គមជាតិផងដែរ។
ប្រធាននាយកប្រតិបត្តិធនាគារ អេស៊ីលីដា លោក អ៊ិន ចាន់នី អះអាងថា ការធ្វើពាណិជ្ជកម្មរបស់ធនាគារ អេស៊ីលីដា បានជោគជ័យកន្លងមក គឺដោយសារធនាគារនេះគោរពគោលការណ៍បីសំខាន់គឺ គោរពសិទ្ធិមនុស្ស រក្សាបរិស្ថាន និងចែកចាយផលប្រយោជន៍ពាណិជ្ជកម្មប្រកបដោយសមធម៌។
លោក អ៊ិន ចាន់នី មានប្រសាសន៍ថា ៖ «តាមពិតគ្រប់អាជីវកម្មទាំងអស់ មូលដ្ឋានរបស់គេគឺចង់ចំណេញហើយ ក៏ប៉ុន្តែត្រូវគិតអំពីមនុស្សដែលពាក់ព័ន្ធ មានទាំងបុគ្គលិក កម្មករ និយោជិក របស់ស្ថាប័នខ្លួនឯងហ្នឹងផង អតិថិជនដែលខ្លួនឯងធ្វើការជាមួយផង ហើយសាធារណជនដែលមានការពាក់ព័ន្ធជាមួយផង។ ចំណុចទី៣ គឺទាក់ទងនឹងផែនដីដែលយើងរស់នៅទាំងអស់គ្នា ជួនកាលអាជីវកម្មខ្លះដែលជាដៃគូរបស់ស្ថាប័នយើង គាត់ប្រកបរបរដែលនាំឲ្យមានផលប៉ះពាល់ទៅដល់បរិស្ថាន ទៅដល់អីហ្នឹង ក៏យើងត្រូវគិតដែរ។ អ៊ីចឹងទាំងនេះខ្ញុំគិតថា ជាចំណុចសំខាន់ណាស់»។
ទាក់ទងទៅនឹងការពង្រឹងសិទ្ធិមនុស្សនៅតាមក្រុមហ៊ុនសហគ្រាសនានានេះ មន្ត្រីគម្រោងរបស់មជ្ឈមណ្ឌលអង្គការសិទ្ធិមនុស្សកម្ពុជា លោក ចក់ សុភី មានប្រសាសន៍ថា អង្គការរបស់លោកបានធ្វើការជាមួយក្រុមហ៊ុនឯកជនចំនួនតិចនៅឡើយទេ ហើយមានគម្រោងធ្វើការជាមួយក្រុមហ៊ុនធំនិង មធ្យម នៅជំហានទី១ និងបន្តធ្វើជាមួយក្រុមហ៊ុន និងសិប្បកម្មតូចៗនៅជំហានទីពីរ។ លោកបន្ថែមថា គេនឹងប្រកាសឈ្មោះក្រុមហ៊ុនណាដែលបានធ្វើល្អ គឺគោរពលក្ខខណ្ឌទាំងបីខាងលើ នឹងត្រូវបានគេគោរព និងមានកេរ្តិ៍ឈ្មោះល្អលើទីផ្សារពាណិជ្ជកម្ម៕