លោកស្រី ម៉ារៀ ខុនសេបសិន រូសស៊ីស (Maria Concepcion Roces) មន្ត្រីអង្គការសុខភាពពិភពលោក បានអះអាងថា ជំងឺគ្រុនផ្ដាសាយថ្មីនេះបានប្រែក្លាយខ្លួនទៅជាជំងឺគ្រុនផ្ដាសាយ ធម្មតាតាមរដូវទៅវិញហើយ។
សេចក្ដីប្រកាសព័ត៌មានរបស់រដ្ឋមន្ត្រីក្រសួងសុខាភិបាលកាលពីថ្ងៃអង្គារ ទី២៩ បានប្រកាសថា លោក ហ៊ុន សែន នាយករដ្ឋមន្ត្រីកម្ពុជា, ឧបនាយករដ្ឋមន្ត្រី យឹម ឆៃលី, ទេសរដ្ឋមន្ត្រី ឆាយ ថន និងលោក តាវ សេងហួរ ក៏បានឆ្លងជំងឺគ្រុនផ្ដាសាយថ្មីនេះដែរ បន្ទាប់ពីកិច្ចប្រជុំគណៈរដ្ឋមន្ត្រីកាលពីថ្ងៃទី២៥ ខែមិថុនា។ ជំងឺគ្រុនផ្ដាសាយថ្មី A(H1N1) នេះ បានបង្ខំឲ្យលោក ហ៊ុន សែន មិនអាចចូលរួមពិធីខួបកំណើតលើកទី៥៩ របស់គណបក្សប្រជាជនកម្ពុជា និងត្រូវលុបចោលកម្មវិធីការងារមួយចំនួនទៀត។
លោកស្រី ម៉ារៀ ខុនសេបសិន រូសស៊ីស បន្ថែមថា តាំងពីខែមករា មកទល់នឹងខែមិថុនានេះ មិនទាន់មានករណីស្លាប់ ដោយសារជំងឺផ្ដាសាយថ្មីនេះនៅឡើយទេ។ លោកស្រីថា តាំងពីខែមិថុនា ឆ្នាំ២០០៨ មកដល់នឹងខែមិថុនា ឆ្នាំ២០១០នេះ មានករណីជំងឺនេះចំនួន ៥៩១ករណី ហើយមានមនុស្សស្លាប់ដោយសារជំងឺនេះចំនួន ៦នាក់។
លោកស្រី ម៉ារៀ ខុនសេបសិន រូសស៊ីស បានមានប្រសាសន៍ថា ៖ «ឥឡូវយើងឃើញថា ករណីផ្ដាសាយទាំងឡាយមានភាពខ្សោយ ហើយកាលពីឆ្នាំមុនមានមនុស្សស្លាប់តិចតួចទេ។អ្នកជំងឺផ្ដាសាយនេះត្រូវការនៅផ្ទះ និងផឹកថ្នាំ ហើយបន្ទាប់មកពួកគេនឹងជា។ នរណាក៏អាចកើតជំងឺនេះដែរ មិនថាតែមន្ត្រីរាជការទេ! ការដែលសំខាន់នៅពេលដែលគេអ្នកមានជំងឺផ្ដាសាយនេះ មិនថាតែនាយករដ្ឋមន្ត្រី ឬក៏មនុស្សធម្មតាទេ គឺការព្យាបាលត្រឹមត្រូវ ដូច្នោះវាមិនមែនមានភាពអាសន្នទេ»។
លោកស្រីបន្ថែមថា ៖ «វាជាការប្រសើរណាស់ដែលនាយករដ្ឋមន្ត្រី បានផ្អាកសកម្មភាព និងកិច្ចប្រជុំរបស់គាត់ជាមួយក្រុមមានចំនួនច្រើន។ នេះគឺជាវិធានការល្អនៅពេលដែលអ្នកជំងឺមានសញ្ញាជំងឺផ្ដាសាយ វាជាការល្អដែលពួកគេនៅផ្ទះ ដើម្បីចៀសវាងការឆ្លងវីរុសនេះទៅមនុស្សដទៃទៀត»។
លោកស្រីថា ករណីដែលគួរឲ្យប្រុងប្រយ័ត្នមានតែលើករណីអ្នកជំងឺដែលកំពុងមានជំងឺរ៉ាំរ៉ៃ ដូចជាមានជំងឺសួត ជំងឺបេះដូង និងស្ត្រីមានផ្ទៃពោះ ដែលជំងឺផ្ដាសាយថ្មីនេះនឹងអាចបណ្ដាលឲ្យមានបញ្ហាធ្ងន់ធ្ងរ។
លោក ជាម យៀប មន្រ្តីជាន់ខ្ពស់ និងជាតំណាងរាស្ត្រគណបក្សប្រជាជនកម្ពុជា មានប្រសាសន៍នៅថ្ងៃពុធនេះដែរថា លោក ហ៊ុន សែន មានអាការៈធម្មតាហើយ ប៉ុន្តែលោកនៅមិនទាន់ចូលធ្វើការងារនៅឡើយទេ។ លោកថា លោកនៅមិនទាន់ដឹងនៅឡើយទេពីមូលហេតុនៃការឆ្លងជំងឺផ្ដាសាយរបស់លោក ហ៊ុន សែន។
សេចក្ដីប្រកាសបន្ថែមថា ការជូនដំណឹងអំពីជំងឺលោក ហ៊ុន សែន គឺដើម្បីបំបាត់ការងឿងឆ្ងល់ចំពោះអវត្តមានរបស់លោក និងបញ្ចៀសការរាលដាលនៃជំងឺនេះ។
លោក ហ៊ុន សែន បានអវត្តមានក្នុងពិធីខួបកំណើតលើកទី៥៩ របស់គណបក្សប្រជាជនកម្ពុជា កាលពីថ្ងៃច័ន្ទ ទី២៨ ខែមិថុនា ដែលនៅពេលនោះលោក ជា ស៊ីម ប្រធានបក្ស ប្រកាសថា នឹងគាំទ្រការបោះបង្គោលព្រំដែនជាមួយប្រទេសលាវ និងវៀតណាមទាល់តែចប់។ ការបោះបង្គោលព្រំដែនរវាងរដ្ឋាភិបាលកម្ពុជា និងវៀតណាម កំពុងទទួលការរិះគន់ពីសំណាក់គណបក្ស សម រង្ស៊ី ថាបានធ្វើឲ្យបាត់បង់ទឹកដីខ្មែរ៕
