ឈើអារជាច្រើនដែលលាក់ទុកកន្លែងផ្សេងគ្នា នៅភូមិខ្សាច់ថ្មី ឃុំតាឡាត ស្រុកសេសាន ខេត្តស្ទឹងត្រែង ត្រូវបានប្រជាពលរដ្ឋអះអាងថា ជាកម្មសិទ្ធិរបស់មេឈ្មួញជួញឈើ ដែលគេលាក់ទុកគ្រោងនឹងដឹកចេញនៅពេលយប់តាមទូក និងរថយន្តទំនើបៗ។
ពលរដ្ឋភូមិខ្សាច់ថ្មី លោក ចាប វណ្ណា នៅថ្ងៃទី១០ ខែសីហា មានប្រសាសន៍ថា ឈើដែលឈ្មួញទិញមានគូសសញ្ញាដីសនៅពីលើ ដោយបញ្ជាក់ពីទំហំនិងប្រវែងច្បាស់លាស់។ លោកបន្តថា ឈើដែលនៅក្រោមផ្ទះប្រជាពលរដ្ឋជាច្រើនកន្លែងនោះ សុទ្ធជាឈើរបស់ឈ្មួញម្នាក់ដែលជាអតីតនាយប៉ុស្តិ៍នគរបាល។
លោក ចាប វណ្ណា បញ្ជាក់ថា ឈ្មួញទាំងនេះរកស៊ីយូរហើយ តែមិនមានស្ថាប័នណាបង្ក្រាបនោះទេ ហើយបទបញ្ជាលោក ហ៊ុន សែន ក៏លែងមានអ្នកខ្លាចទៀតដែរ ដោយសារឲ្យតែឲ្យលុយមន្ត្រីទៅ គឺអាចដឹកបានមិនមានអ្នកណាចាប់ឡើយ។
ទន្ទឹមនឹងនេះ ជំទប់ទី២ ឃុំតាឡាត លោក ណ ឡិត មានប្រសាសន៍ថា បទល្មើសព្រៃឈើនៅឃុំតាឡាត ពិតជាកំពុងកើតមានយ៉ាងច្រើន។ លោកបន្តថា ឈ្មួញឈើជាអ្នកប្រើឲ្យពលរដ្ឋចូលកាប់ ឯពួកគេចាំទិញនៅមាត់កំពង់ទូកមុខប៉ុស្តិ៍នគរបាល។ លោក ណ ឡិត បញ្ជាក់ថា អាជ្ញាធរមូលដ្ឋានមិនមានលទ្ធភាពបង្ក្រាបបទល្មើសនោះបានឡើយ ព្រោះឈ្មួញឈើមានអ្នកការពារនៅពីក្រោយខ្នង៖ «ការព្រួយបារម្ភមិនមែនត្រឹមតែខ្ញុំទេ ខ្ញុំបានប្រជុំក្រុមប្រឹក្សាឃុំ ពិភាក្សាពីរឿងនេះអស់លទ្ធភាពហើយ ព្រោះគេមានអំណាច យើងទាក់ទងខាងណាក៏គេមិនធ្វើការឲ្យយើង យើងអស់សង្ឃឹម»។
លោក ណ ឡិត បន្ថែមថា លោកពិតជាចង់លុបបំបាត់បទល្មើសព្រៃឈើខ្លាំងណាស់ តែទៅប្រាប់ថ្នាក់លើក៏មិនមានវិធានការ។
វិទ្យុអាស៊ីសេរី មិនអាចទាក់ទងផ្នែករដ្ឋបាលព្រៃឈើ ខេត្តស្ទឹងត្រែង ដើម្បីធ្វើការអត្ថាធិប្បាយបានទេ នៅថ្ងៃទី១០ ខែសីហា ឆ្នាំ២០១២។
ចំណែកឯអភិបាលស្រុកសេសាន លោក បូ កែវសុវណ្ណ មានប្រសាសន៍ថា មិនមានករណីកាប់ និងជួញឈើកើតឡើងទេ នៅក្នុងភូមិសាស្ត្រស្រុកសេសាន៖ «និយាយតែផ្ដេសផ្ដាស វាគ្មានស្អីទេ មានអ្នកណាគេដឹកខែនេះភ្លៀងឡើងបែកភក់»។
ទោះជាយ៉ាងនេះក្តី លោក ណ ឡិត ឲ្យដឹងថា បទល្មើសព្រៃឈើមានពេញបន្ទុកហើយ។ លោកបន្តថា ឈ្មួញឈើនៅទីនោះមានអំណាចធំជាងអាជ្ញាធរទៀត។ លោក ណ ឡិត បញ្ជាក់ថា ម្ចាស់សិប្បកម្មអារឈើនៅទីនោះឈ្មោះ ធេង ធ្លាប់និយាយថា សិប្បកម្មខ្លួនមិនអនុញ្ញាតឲ្យនរណាម្នាក់សួរនាំ ឬថតរូបជាដាច់ខាត បើមិនដូចនេះទេ លោក ធេង នឹងប្រើកូនចៅឲ្យវាយទម្លាក់ទឹកទន្លេជាមិនខាន។
គេសង្កេតឃើញឈើអារ និងឈើមូលរាប់សិបម៉ែត្រគូប ដូចជា ផ្ចឹក សុក្រំ បេង ធ្មង់ និងគ្រញូង ត្រូវគេទុកនៅក្រោមផ្ទះក្នុងព្រៃ ក្នុងទន្លេ សម្រាប់ទុកដឹកចេញ។ នៅភូមិខ្សាច់ថ្មី មានសិប្បកម្មអារឈើមិនមានច្បាប់ពីរកន្លែង ដែលមួយកន្លែងនៅត្បូងទន្លេជាកម្មសិទ្ធិរបស់អតីតមេប៉ុស្តិ៍ ដែលដកចេញពីតំណែងឈ្មោះ វ៉ាង និងមួយកន្លែងទៀតនៅត្រើយខាងជើងទន្លេ ជាកម្មសិទ្ធិរបស់ឈ្មួញឈើឈ្មោះ ធេង។ ពលរដ្ឋឲ្យដឹងថា ឈ្មួញទាំងពីរនេះប្រើប្រាស់កម្មករជាច្រើនអ្នក ហើយមានកាំភ្លើងកាន់នៅក្នុងដៃទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។