ពលរដ្ឋ​នៅ​បឹងកក់​ចោទ​អាជ្ញាធរ​និង​ក្រុមហ៊ុន​ថា​រារាំង​មិន​ឲ្យ​ជួសជុល​ផ្ទះ

ប្រជាពលរដ្ឋ​ប្រមាណ​៣០​គ្រួសារ​បាន​ថ្លែង​ឲ្យ​ដឹង​នៅ​ថ្ងៃ​១៩ មករា ដោយ​ចោទ​ប្រកាន់​អាជ្ញាធរ​ខណ្ឌ​ដូនពេញ​និង​បុគ្គលិក​ក្រុមហ៊ុន​ស៊ូកាគូ​ដែល​អភិវឌ្ឍ​បឹងកក់​នោះ​ថា ពួកគេ​បាន​រារាំង​មិន​ឲ្យ​អ្នក​ភូមិ​ជួស​ជុល​ផ្ទះ​នោះ​ទេ​និង​បង្ខំ​ឲ្យ​រុះរើ​វិញ​ចំពោះ​ផ្ទះ​ណា​បាន​ជួស​ជុល​ហើយ​នោះ។
ដោយ ទីន ហ្សាការីយ៉ា
2010-01-19
អ៊ីម៉ែល
មតិ
Share
បោះពុម្ព
ផ្ទះ​ដែល​សង់​នៅ​លើ​បឹង​កក់។
ផ្ទះ​ដែល​សង់​នៅ​លើ​បឹង​កក់។
RFA Photo

ស្រ្តី​មួយ​រូប​ឈ្មោះ ឌី បាន​អះអាង​ថា អ្នក​ភូមិ​ទី​២៣ មាន​ការ​ព្រួយ​បារម្ភ​ចំពោះ​ទី​លំនៅ​របស់​ពួកគេ​ដែល​ខាង​ភាគី​ក្រុមហ៊ុន​ស៊ូកាគូ​មិន​ដែល​មក​ជួប​មុខ​និយាយ​គ្នា​ជាមួយ​ប្រជាពលរដ្ឋ​នោះ​ថា មាន​ការ​ដោះ​ដូរ​ឬ​ផ្តល់​សំណង​ឲ្យ​ប្រជាពលរដ្ឋ​យ៉ាង​ណា​នោះ ប៉ុន្តែ​កាល​ពី​ពេល​ថ្មីៗ​នេះ អ្នក​ភូមិ​មួយ​ចំនួន​បាន​ជួស​ជុល​ផ្ទះ ប៉ុន្តែ​ក្រុមហ៊ុន​បាន​មក​ហាមឃាត់​ទៅ​វិញ។

អ្នកស្រី ឌី បាន​ឲ្យ​ដឹង​ដូច្នេះ ៖ «ខាង​ក្រុមហ៊ុន​យក​កម្លាំង​សមត្ថកិច្ច​មក​ចាប់​យក​សសរផ្ទះ យក​សម្ភារៈ​ដែល​ជួសជុល​ដឹក​យក​ទៅ​ខណ្ឌ​អស់»

ស្រ្តី​ម្នាក់​ទៀត​ដែល​ជា​ម្ចាស់​ផ្ទះ​ធ្វើការ​ជួស​ជុល​នោះ បាន​និយាយ​ដែរ​ថា ផ្ទះ​អ្នកស្រី​បាន​ជួសជុល​រួច ប៉ុន្តែ​ត្រូវ​បាន​កម្លាំង​សមត្ថកិច្ច​ខណ្ឌ​ដូនពេញ បាន​ទៅ​ដាក់​កំណត់​ឲ្យ​រុះ​ដូច​ដើម​វិញ ព្រមទាំង​មាន​លិខិត​ឲ្យ​រុះរើ​ពី​អភិបាល​រង​ខណ្ឌ​ដូនពេញ គឺ​លោក សុខ ពេញវុធ យក​ទៅ​បិទ​ភ្ជាប់​នៅ​លើ​ជញ្ជាំង​ផ្ទះ​ផង​ដែរ។

ស្ត្រី​ដដែល​បាន​អះអាង​ទៀត​ថា ផ្ទះ​របស់​ពួកគេ​មិន​មែន​ជា​ផ្ទះ​នៅ​លើ​ទឹក​បឹងកក់​នោះ​ទេ គឺ​នៅ​ជាប់​ខាង​ក្រោយ​ស្ថានទូត​បារាំង ហើយ​ចំពោះ​ផ្ទះ​អ្នក​មាន​អំណាច​មួយ​ចំនួន​នៅ​តំបន់​នោះ​ដែរ ពុំ​មាន​ការ​ហាម​ឃាត់​មិន​ឲ្យ​ជួស​ជុល​នោះ​ឡើយ។

ស្រ្ដី​ដែល​មិន​បញ្ចេញ​ឈ្មោះ​ឲ្យ​ដឹង​ដូច្នេះ​ថា ៖ «ដូច​ថា ផ្ទះ​ខ្លះ​គេ​ធ្វើ​ជា​វីឡា​កូនកាត់​អ៊ីចឹង​ទៅ គេ​អត់​រុះរើ​ដោយសារ​គេ​មាន​ខ្នង ឬ​ក៏​ជា​អង្គរក្ស​អ្នក​នេះ​អ្នក​នោះ​អ៊ីចឹង គេ​អត់​រុះរើ​ទេ ដល់​ពេល​ខ្ញុំ ខ្ញុំ​ប្រជាជន​ធម្មតា​អ៊ីចឹង​គេ​មក​រក​រឿង​យើង។ បើ​នៅ​កន្លែង​សង្កាត់​អ៊ីចឹង​ខ្ញុំ​ថា​អ៊ីចេះ ពូ​ឯង​មើល​ផ្ទះ​គេ​ជួសជុល​បាន​អត់​រុះរើ​ផ្ទះ​គេ ម៉េច​មក​រុះរើ​តែ​ផ្ទះ​ខ្ញុំ បើ​ពូឯង​វ៉ៃ​ចោល វ៉ៃ​ផ្ទះ​គេ​ដែរ​ទៅ ខ្ញុំ​ក៏​សុខ​ចិត្ត​ដែរ។ គាត់​សួរ​ថា អ្ហែង​មាន​ខ្នង​ដូច​គេ​ឬ​អត់? ខ្ញុំ​ថា អ៊ីចឹង​ប្រជាជន​ធម្មតា​ទាល់តែ​មាន​ខ្នង​ដូច​ពូឯង​និយាយ​អ៊ីចឹង​បាន​រស់​នៅ​បាន​ឬ?»

អភិបាល​រង​ខណ្ឌ​ដូនពេញ លោក សុខ ពេញវុធ មិន​បាន​អធិប្បាយ​អំពី​បញ្ហា​នេះ​ទេ ដោយ​លោក​ឲ្យ​សួរ​ទៅ​ក្រុមហ៊ុន​និង​លោក សុខ សម្បត្តិ ជា​អភិបាល​ខណ្ឌ​ដូនពេញ។

វិទ្យុ​អាស៊ី​សេរី​មិន​អាច​ទាក់ទង​តាម​ទូរស័ព្ទ​សួរ​លោក សុខ សម្បត្តិ អភិបាល​ខណ្ឌ​ដូនពេញ និង​ភាគី​ក្រុមហ៊ុន​សូកាគូ​បាន​ទេ​នៅ​ថ្ងៃ​ទី​១៩ មករា។

រី​ឯ​ចៅ​សង្កាត់​ស្រះចក​បាន​មាន​ប្រសាសន៍​ថា លោក​មិន​ដឹង​រឿង​នេះ​ទេ ព្រោះ​លោក​សុំ​ច្បាប់​ឈប់​សម្រាក​១​ខែ ដោយ​លោក​បាន​បញ្ជាក់​ថា ឲ្យ​សួរ​ទៅ​អភិបាល​ខណ្ឌ​រង​គឺ​លោក សុខ ពេញវុធ ដដែល ព្រោះ​ថា​លោក សុខ ពេញវុធ ជា​អ្នក​ទទួល​ខុស​ត្រូវ​ក្នុង​រឿង​នេះ។

អភិបាល​រង​រាជធានី​ភ្នំពេញ លោក ម៉ាន់ ឈឿន ក៏​មិន​បាន​ដឹង​អំពី​បញ្ហា​នេះ​ដែរ ដោយ​លោក​ឲ្យ​សួរ​ទៅ​ខាង​អភិបាល​ខណ្ឌ​ដូនពេញ​ដូច​គ្នា​នឹង​លោក​ចៅ​សង្កាត់​ស្រះចក​ដែរ ព្រោះ​គេ​បាន​បង្កើត​គណៈកម្មការ​មួយ​ដើម្បី​ដោះស្រាយ​អំពី​បញ្ហា​នេះ។

ទោះ​ជា​យ៉ាងណា ប្រជាពលរដ្ឋ​បាន​បញ្ជាក់​ថា បើ​សិន​ជា​ក្រុមហ៊ុន​ធ្វើការ​អភិវឌ្ឍន៍​បឹងកក់ ហើយ​ប៉ះ​ពាល់​ផ្ទះ​ពួកគេ​ដែល​កំពុង​រស់​នៅ​តាំង​ពី​ឆ្នាំ​១៩៨០​មក​ហើយ​នោះ គឺ​សុំ​ឲ្យ​ក្រុមហ៊ុន​មាន​គោលការណ៍​ចរចា​គ្នា​ឲ្យ​បាន​ច្បាស់​លាស់​នោះ​ពួកគេ​មិន​ជំទាស់​ឡើយ៕

ព័ត៌មាន (0)
Share
គេហទំព័រ​ទាំងមូល