អគ្គស្នងការនគរបាលជាតិបានសម្រេចនឹងដាក់ពង្រាយកងកម្លាំងសមត្ថកិច្ចចម្រុះ មាននគរបាលជាតិ កងរាជអាវុធហត្ថផ្ទៃប្រទេស និងយោធា សរុបចំនួនជាង ១ម៉ឺននាក់ នៅតាមគោលដៅសំខាន់ៗ ដើម្បីធានាសន្តិសុខ សុវត្ថិភាព និងសណ្ដាប់ធ្នាប់សាធារណៈ ចាប់ពីថ្ងៃទី១ ដល់ថ្ងៃទី៧ ខែកុម្ភៈ ឆ្នាំ២០១៣ ខាងមុខនេះ ប្រកបដោយជោគជ័យ។
ការសម្រេចនេះធ្វើឡើងក្នុងកិច្ចប្រជុំមួយនៅឯអគ្គស្នងការដ្ឋាននគរបាលជាតិ ក្រោយពីប្រមុខរដ្ឋាភិបាល លោក ហ៊ុន សែន បានចេញផ្សាយសារាចរមួយចុះថ្ងៃទី៨ ខែមករា ឆ្នាំ២០១៣ ផ្ដោតលើពិធីដង្ហែ និងថ្វាយព្រះភ្លើងដល់ព្រះបរមសពព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ។
អ្នកនាំពាក្យអគ្គស្នងការដ្ឋាននគរបាលជាតិ លោកឧត្ដមសេនីយ៍ឯក គៀត ច័ន្ទថារិទ្ធ បានមានប្រសាសន៍ប្រាប់អ្នកកាសែតក្រោយពីកិច្ចប្រជុំនោះថា ពិធីដង្ហែព្រះបរមសព និងពិធីថ្វាយព្រះភ្លើងនោះ គឺជាពិធីប្រវត្តិសាស្ត្រ ដូច្នេះការពង្រឹងសន្តិសុខ និងការរៀបចំសណ្ដាប់ធ្នាប់សាធារណៈ គឺត្រូវតែធ្វើដោយម៉ត់ចត់។
លោក គៀត ច័ន្ទថារិទ្ធ៖ «ព្រោះយើងបិទតាំងពីគល់ស្ពានជ្រោយចង្វារ ខាងត្បូងហ្នឹង មកដល់រង្វង់មូលស្ថានទូតបារាំង កន្លែងកាំភ្លើងកួចកាណុងហ្នឹង ហើយយើងបិទតាមខាងកើតផ្លូវព្រះមុនីវង្ស រហូតដល់ផ្លូវបូកគោ ប៉ុន្តែមិនមែនមានន័យថា បិទចរាចរណ៍ផ្លូវមុនីវង្សទេណា ប៉ុន្តែផ្លូវបត់ហ្នឹង គឺយើងចាប់បិទហើយ។ អ៊ីចឹងយើងមិនឲ្យមធ្យោបាយ ជាពិសេសឡានចូលទេ។ ទំហំនេះធំណាស់ ពីបូកគោមកជលផល មកដល់រដ្ឋសភានេះ ប៉ុន្តែរយៈពេលតែមួយព្រឹកទេ អ៊ីចឹងសូមមេត្តា...។ ថ្ងៃដង្ហែគឺថ្ងៃទី៤ ខែកុម្ភៈ ឆ្នាំ២០១៣ ព្រឹកថ្ងៃទី៤ ប្រជាពលរដ្ឋជ្រាបបញ្ហានេះដែរ ហើយក៏សូមមេត្តាអធ្យាស្រ័យដែរ ព្រោះយើងគិតគូរសណ្ដាប់ធ្នាប់រៀបរយនេះធំណាស់»។
ប្រជាពលរដ្ឋម្នាក់នៅខេត្តកណ្តាល បាននិយាយថា លោកនិងក្រុមគ្រួសារនឹងចូលរួមក្នុងពិធីដង្ហែព្រះបរមសព និងថ្វាយព្រះភ្លើងខាងមុខនេះ៖ «ខ្ញុំត្រូវតែទៅចូលរួមទោះជាមានការងារមមាញឹករត់ម៉ូតូឌុបក្ដី។ រំលឹកវិញ្ញាណក្ខន្ធរបស់គាត់ (ព្រះមហាវីរក្សត្រ ) ពីព្រោះគាត់បានទុកស្នាដៃល្អៗដល់ប្រទេសកម្ពុជាយើង និងដល់ប្រជាពលរដ្ឋខ្មែរ»។
ឯកសារជាផ្លូវការចុះហត្ថលេខាដោយឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃទី១០ ខែធ្នូ ឆ្នាំ២០១២ កន្លងទៅនេះ បានឲ្យដឹងថា នៅថ្ងៃទី១ ខែកុម្ភៈ ឆ្នាំ២០១៣ នៅវេលាម៉ោង ៨ព្រឹក គឺយាងព្រះបរមមញ្ជូសា នៃព្រះបរមសពតាមរាជរថតូច ចេញពីព្រះបរមរាជវាំងទៅតម្កល់លើរាជបុស្បុកនៅមុខព្រះបរមរាជវាំង និងដង្ហែតាមដងផ្លូវសំខាន់ក្នុងរាជធានីភ្នំពេញ មុននឹងតម្កល់នៅវាលព្រះមេរុ ហើយនៅថ្ងៃទី៤ ខែកុម្ភៈ ឆ្នាំ២០១៣ នៅវេលាម៉ោង ១៨ និង ៣០នាទី នឹងប្រារព្ធព្រះរាជពិធីថ្វាយព្រះភ្លើងបូជាព្រះបរមសពនៅវាលព្រះមេរុ ពេលនោះនឹងមានការបាញ់កាំជ្រួច និងកាំភ្លើងធំផង។
នៅថ្ងៃទី៥ ខែកុម្ភៈ ឆ្នាំ២០១៣ នៅវេលាម៉ោង ៧ព្រឹក ព្រះរាជពិធីរើសព្រះបរមអដ្ឋិធាតុ និងដង្ហែទៅទន្លេចតុមុខ។ នៅវេលាម៉ោង ១៧ យាងព្រះបរមអដ្ឋិធាតុទៅគង់នៅក្នុងព្រះកោដ្ឋពេជ្រ រួចដង្ហែទៅតម្កល់លើព្រះមហាបញ្ចា ឬព្រះចេតិយ ក្នុងព្រះមេរុ។
រហូតដល់ថ្ងៃទី៧ ខែកុម្ភៈ ឆ្នាំ២០១៣ ជាថ្ងៃចុងក្រោយ នៅវេលាម៉ោង ១៨ នឹងយាងព្រះកោដ្ឋ ព្រះបរមអដ្ឋិធាតុ ចុះពីព្រះមហាបញ្ចា ឬព្រះចេតិយមកលើព្រះរាជរថ ដង្ហែចូលព្រះបរមរាជវាំងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។