ព្រឹទ្ធសមាជិករបស់រដ្ឋសភា លោក ជា សុទ្ធ បានប្រកាសបើកសម័យប្រជុំលើកដំបូងនោះ ហើយបានអនុម័តបទបញ្ញត្តិផ្ទៃក្នុងរបស់រដ្ឋសភាដោយមានការបោះឆ្នោតគាំទ្រពីសមាជិកសភាចំនួន១១៩រូបដែលបានចូលរួមក្នុងសម័យប្រជុំនោះ។
បន្ទាប់ពីមានកិច្ចប្រជុំរដ្ឋសភារួចហើយ សមាជិកសភាថ្មីបានធ្វើការស្បថចូលកាន់តំណែងនៅរសៀលថ្ងៃពុធនេះ ហើយនឹងធ្វើការប្រជុំបោះឆ្នោតដើម្បីជ្រើសតាំងប្រធានសភាថ្មី និងបោះឆ្នោតផ្ដល់សេចក្ដីទុកចិត្តដល់រដ្ឋាភិបាលអាណត្តិថ្មីនោះដែរនៅថ្ងៃព្រហស្បតិ៍។
នៅក្នុងសម័យប្រជុំដំបូងរបស់រដ្ឋសភានោះ ព្រះមហាក្សត្រ ព្រះបរមនាថ នរោត្តម សីហមុនី បានមានព្រះរាជបន្ទូលលើកឡើងឲ្យមានការពង្រឹងយុត្តិធម៌សង្គម កំណែទម្រង់ច្បាប់ ប្រព័ន្ធយុត្តិធម៌ និងអភិបាលកិច្ចល្អ។
ព្រះមហាក្សត្របានមានព្រះរាជបន្ទូលថា ៖ «ជាពិសេសត្រូវកសាងឲ្យមានយុត្តិធម៌សង្គមឲ្យកាន់តែមានកម្រិតខ្ពស់ជាលំដាប់។ កំណែទម្រង់ស្ដីអំពីអភិបាលកិច្ចល្អ ដែលក្នុងនោះមានកំណែទម្រង់ច្បាប់និងប្រព័ន្ធយុត្តិធម៌នៅតែបន្តទៅទៀតឲ្យកាន់តែសកម្មនិងខ្លាំងក្លាថែមទៀត»។
គណបក្សសមរង្ស៊ីដែលធ្លាប់បានគំរាមថា នឹងធ្វើពហិការមិនចូលរួមសម័យប្រជុំលើកដំបូងនោះក៏បានសម្រេចចិត្តចូលរួមផងដែរ។ ដោយឡែកគណបក្សសិទ្ធិមនុស្សដឹកនាំដោយ លោក កឹម សុខា ដែលបានឈ្នះឆ្នោតចំនួន៣អាសនៈដែរនោះមិនមានវត្តមានក្នុងកិច្ចប្រជុំសភាលើកដំបូងនោះឡើយ។
ប្រធានគណបក្សសិទ្ធិមនុស្ស លោក កឹម សុខា បានមានប្រសាសន៍ថា ការមិនចូលរួមក្នុងកិច្ចប្រជុំសភាដំបូងនិងក្នុងពិធីស្បថដើម្បីចូលកាន់តំណែងនៅឯព្រះបរមរាជវាំង នារសៀលថ្ងៃទី២៤នេះ គឺដើម្បីបន្តជំទាស់ទៅនឹងលទ្ធផលនៃការបោះឆ្នោត កាលពីថ្ងៃទី២៧ កក្កដាកន្លងទៅ។
លោកបានបន្ថែមទៀតថា លោកនឹងមិនចូលរួមក្នុងកិច្ចពិធីបោះឆ្នោតជ្រើសតាំងប្រធានសភានិងការបោះឆ្នោតផ្ដល់សេចក្ដីទុកចិត្តដល់រដ្ឋាភិបាលថ្មីអាណត្តិថ្មីនោះទេ។
លោក កឹម សុខា បានមានប្រសាសន៍ថា ៖ «គឺយើងអត់មានគោលការណ៍របស់យើងថាយើងនឹងចូលប្រជុំទេ»។
លោកនាយករដ្ឋមន្ត្រី ហ៊ុន សែន បានមានប្រសាសន៍ចំពោះការចូលរួមរបស់គណបក្សសមរង្ស៊ី និងអវត្តមានរបស់គណបក្សសិទ្ធិមនុស្សយ៉ាងដូច្នេះថា ៖ «ខ្ញុំក៏បានសួរគាត់ថា ហេតុអីបានឯកឧត្ដម កឹម សុខា អត់មក? គាត់ថា "អត់ដឹងដែរ ដូចជាខុសគ្នា"។ បើសិនជាខុសគ្នាគឺមានសេចក្ដីថា ឯកឧត្ដម សម រង្ស៊ី ឥឡូវមិនដឹងថាយ៉ាងម៉េចទេ អាហ្នឹងទុកឲ្យគាត់វិនិច្ឆ័យគ្នាគាត់ ព្រោះជាសម្ព័ន្ធភាពស្លាប់រស់ជាមួយគ្នា។ មួយមកប្រជុំ មួយអត់មកប្រជុំ មិនដឹងថាអ្នកណាបោកអ្នកណាទេពេលនេះ។ ហើយបើសិនជាឯកឧត្ដម កឹម សុខា អត់មក ឯកឧត្ដម សម រង្ស៊ី មក មានន័យថាសម្ព័ន្ធភាពនេះទៅទៀតហើយ បែកហើយ ឥឡូវនៅសល់តែមួយ អ្នកដែលមិនចូលរួមទៅជាសល់ឯកឧត្ដម កឹម សុខា ទៅវិញ»។
លោកនាយករដ្ឋមន្ត្រី ហ៊ុន សែន ក៏បានពណ៌នាថ្ងៃប្រជុំសភាលើកដំបូងនោះថាជាថ្ងៃជោគជ័យ៕