អាដហុក​ចេញ​របាយកាណ៍​ថ្កោលទោស​ការ​បាញ់​សម្លាប់​ខ្មែរ​ដោយ​ទាហាន​ថៃ

សមាគម​ការពារ​សិទិ្ធ​មនុស្ស​និង​អភិវឌ្ឍន៍​នៅ​កម្ពុជា (អាដហុក) បាន​ចេញ​សេចក្តី​ថ្លែងការណ៍​របស់​ខ្លួន​មួយ​ដោយ​ថ្កោលទោស​ដាច់ខាត​ចំពោះ​សកម្មភាព​បាញ់​សម្លាប់​ប្រជាពលរដ្ឋ​ខ្មែរ​ដោយ​ពួក​ទាហាន​ថៃ ចាប់​តាំង​ពី​ពាក់​កណ្តាល​ឆ្នាំ​២០០៨ រហូត​មក​ដល់​ដើម​ឆ្នាំ​២០១០។
ដោយ ឡេង ម៉ាលី
2010-02-26
អ៊ីម៉ែល
មតិ
Share
បោះពុម្ព
ទាហាន​ថៃ​ដើរ​ក្បែរ​តំបន់​​ប្រាសាទ​ព្រះវិហារ​ខ្មែរ​នៅ​ថ្ងៃ​ទី​១៩ កក្កដា ២០០៨។
ទាហាន​ថៃ​ដើរ​ក្បែរ​តំបន់​​ប្រាសាទ​ព្រះវិហារ​ខ្មែរ​នៅ​ថ្ងៃ​ទី​១៩ កក្កដា ២០០៨។
RFA File Photo/Savyouth

សេចក្តី​ថ្លែង​ការណ៍​ដែល​ចុះ​កាលបរិច្ឆេទ​នៅ​ថ្ងៃ​ព្រហស្បតិ៍ ទី​២៥ ខែ​កុម្ភៈ ឆ្នាំ​២០១០ សមាគម​អាដហុក​បាន​សរសេរ​ថា ដោយ​ផ្អែក​តាម​ប្រភព​ព័ត៌មាន​ផ្សេងៗ និង​តាម​របាយការណ៍​ស៊ើប​អង្កេត​របស់​ខ្លួន​ផ្ទាល់ សមាគម​នេះ​បាន​រក​ឃើញ​ពលរដ្ឋ​កម្ពុជា​ចំនួន ១០​នាក់​ត្រូវ​ទាហាន​ថៃ​បាញ់​សម្លាប់ ដោយ​ចោទ​ថា ជន​រង​គ្រោះ​ទាំង​នោះ​បាន​ឆ្លង​ដែន និង​ចូល​កាប់​ឈើ​លើ​ទឹក​ដី​ថៃ​ខុស​ច្បាប់។

សមាគម​អាដហុក​បាន​បន្ត​ថា ប្រទេស​ថៃ​មិន​មាន​សិទ្ធិ​បាញ់​សម្លាប់​ជន​ស៊ីវិល​ណា​ដែល​បាន​ឆ្លង​ចូល​ទឹក​ដី​ថៃ​នោះ​ទេ គឺ​មាន​សិទ្ធិ​ត្រឹម​តែ​ប្រើប្រាស់​ច្បាប់​អន្តោប្រវេសន៍​របស់​ជាតិ​ខ្លួន​ផ្តន្ទា​ទោស​ជន​បរទេស​ទាំង​នោះ​ប៉ុណ្ណោះ បើ​ទោះ​ជា​ការ​ឆ្លង​ចូល​នោះ​ខុស​ច្បាប់​ក៏​ដោយ។

លោក នី ចរិយា ប្រធាន​ផ្នែក​ស៊ើប​អង្កេត​សមាគម​អាដហុក មាន​ប្រសាសន៍​ចាត់ទុក​សកម្មភាព​ទាហាន​ថៃ​បាញ់​សម្លាប់​ពលរដ្ឋ​កម្ពុជា​ទាំង​នោះ ថា​ជា​ការ​រំលោភ​សិទ្ធិ​មនុស្ស​ធ្ងន់ធ្ងរ ហើយ​ថា ការ​ព្រងើយ​កន្តើយ​របស់​រដ្ឋាភិបាល​ថៃ​មិន​ចាត់​វិធានការ​ស៊ើប​អង្កេត​រក​ជន​ល្មើស​មក​ផ្តន្ទា​ទោស គឺ​ជា​ការ​ចូលរួម​ដោយ​ប្រយោល​ក្នុង​ឆន្ទៈ​ពិត​ប្រាកដ​មួយ​ឲ្យ​ទាហាន​ថៃ​បាញ់​សម្លាប់​ពលរដ្ឋ​កម្ពុជា ក្នុង​ទម្រង់​រើសអើង​ពូជ​សាសន៍។

លោក​មាន​ប្រសាសន៍​បន្ថែម​ថា ៖ «អា​ហ្នឹង​យើង​យោង​ទៅ​លើ​គេ​ហៅ​ថា លក្ខន្តិក​នៃ​ក្រុង​រ៉ូម ដែល​និយាយ​អំពី​បទល្មើស​ផ្សេងៗ​ទាក់ទង​ទៅ​នឹង​បទល្មើល​ប្រឆាំង​នឹង​មនុស្ស​ជាតិ បទល្មើស​ឧក្រិដ្ឋកម្ម​សង្គ្រាម មាន​បទល្មើស​ច្រើន​ទៀត។ ទោះ​បី​ថៃ​មិន​បាន​ផ្ដល់​សច្ចាប័ន​ទទួល​ស្គាល់ អាយស៊ីស៊ី ក៏​ដោយ កាល​ណា​ប្រព្រឹត្ត​អ៊ីចឹង​ទៅ យោង​ទៅ​តាម​លក្ខន្តិក​នៃ​ក្រុង​រ៉ូម​ហ្នឹង គេ​អាច​ចាត់ទុក​ថា ប្រទេស​ហ្នឹង​បាន​ប្រព្រឹត្ត​នូវ​បទល្មើស​ឧក្រិដ្ឋកម្ម​ប្រឆាំង​មនុស្ស​ជាតិ ឬ​ក៏​ឧក្រិដ្ឋកម្ម​សង្គ្រាម​ដែរ»

នៅ​ថ្ងៃ​ទី​២៥ ខែ​កុម្ភៈ ឆ្នាំ​២០១០ សមាគម​បាន​ផ្ញើ​សេចក្តី​ថ្លែង​ការណ៍ និង​របាយការណ៍​ទាំង​នេះ ទៅ​ស្ថានទូត​ថៃ​នៅ​ប្រទេស​កម្ពុជា​ហើយ ហើយ​ក៏​បាន​ផ្ញើ​ទៅ​ឲ្យ​អង្គការ​សហ​ប្រជាជាតិ​នៅ​ទីក្រុង​បាងកក​ដែរ។

រហូត​មក​ដល់​ល្ងាច​ថ្ងៃ​ដដែល វិទ្យុ​អាស៊ីសេរី​មិន​ទាន់​ទទួល​បាន​ការ​ឆ្លើយ​តប​ណា​មួយ​ទៅ​នឹង​សេចក្តី​ថ្លែង​ការណ៍​របស់​សមាគម​អាដហុក​ទេ។ អ្នក​ទទួល​ទូរស័ព្ទ​ស្ថានទូត​បាន​ប្រាប់​ថា មន្រ្តី​ទូត​កំពុង​ជាប់​ប្រជុំ ៖ «ឥឡូវ​ពួក​ខាង​មន្រ្តី​ការទូត​ចូល​ប្រជុំ​ហើយ»

ជាមួយ​គ្នា​នេះ​ដែរ សមាគម​អាដហុក​ក៏​បាន​អំពាវនាវ​ដល់​រដ្ឋាភិបាល​កម្ពុជា​ថា ត្រូវតែ​មាន​វិធានការ​ផ្លូវ​ច្បាប់​អន្តរជាតិ ដើម្បី​ឲ្យ​ភាគី​ថៃ​អនុវត្ត​ច្បាប់​ឲ្យ​បាន​ពេញលេញ​ដែរ។

កន្លង​មក​ក្រសួង​ការបរទេស​ប្រទេស​កម្ពុជា​ធ្លាប់​បាន​ផ្ញើ​កំណត់​ទូត​ទៅ​ក្រសួង​ការបរទេស​ថៃ​ជា​ហូរហែ ក៏​ប៉ុន្តែ​នៅ​មិន​ទាន់​មាន​ការ​ឆ្លើយ​តប​ជា​វិជ្ជមាន​ណា​មួយ​នៅ​ឡើយ​ទេ៕

ព័ត៌មាន (0)
Share
គេហទំព័រ​ទាំងមូល