សេចក្តីជូនដំណឹងរបស់ក្រុមការងារនេះ ចុះថ្ងៃទី៨ ធ្នូ ២០០៩ បានឲ្យដឹងថា ប្រធានបទសម្រាប់ឆ្នាំនេះមាន "យើងទាំងអស់គ្នាត្រូវការសិទ្ធិសេរីភាពបញ្ចេញមតិនិងយុត្តិធម៌" និង "ទទួលយកភាពខុសគ្នានិងបញ្ចប់ការរើសអើង“។
សម្ព័ន្ធអង្គការសង្គមស៊ីវិលធំៗចំនួន១៨ ដែលមានសមាជិកប្រហែល២០០អង្គការ សមាគម ក៏បានអញ្ជើញសមាជិកសមាជិការដ្ឋសភានិងព្រឹទ្ធសភាទាំងអស់ឲ្យចូលរួមជាកិត្តិយសក្នុងពិធីអបអរទិវាសិទ្ធិមនុស្សអន្តរជាតិ ខួបទី៦១នោះដែរ។
ព័ត៌មានបន្តថា នៅមុនការចាប់ផ្តើមប្រារព្ធពិធី ក្រុមការងារមានរៀបចំឲ្យមានការជួបជុំគ្នានៅបរិវេណវត្តភ្នំប៉ែកខាងត្បូង ចំនួន៣.០០០នាក់ រួចហើយហែក្បួនដោយសន្តិវិធី សម្ដែងការសាទរខួបទី៦១ តាមបណ្តោយផ្លូវព្រះនរោត្តម មកកាន់ទីប្រារព្ធពិធីនៅទីធ្លាមុខវត្តបទុមវត្តី៕