សង្គម​ស៊ីវិល​ជំរុញ​ឲ្យ​រដ្ឋាភិបាល​បង្កើត​ច្បាប់​គ្រប់គ្រង​ថវិកា​គណបក្ស​នយោបាយ

មន្ត្រី​គណបក្ស​ប្រឆាំង និង​មន្ត្រី​អង្គការ​សង្គម​ស៊ីវិល ជំរុញ​ឲ្យ​រដ្ឋាភិបាល​បង្កើត​ច្បាប់​គ្រប់គ្រង​ថវិកា​គណបក្ស​នយោបាយ​ពេល​ឃោសនា​បោះ​ឆ្នោត ដើម្បី​ឲ្យ​គណបក្ស​ទាំង​អស់​ដែល​ឈរ​ឈ្មោះ​បោះ​ឆ្នោត​មាន​តម្លាភាព និង​យុត្តិធម៌។
ដោយ ទីន ហ្សាការីយ៉ា
2010-05-27
អ៊ីម៉ែល
មតិ
Share
បោះពុម្ព
សិក្ខាសាលា​ស្ដីពី ហិរញ្ញវត្ថុ​គណបក្ស​នយោបាយ​ពេល​ឃោសនា​បោះឆ្នោត នៅ​សណ្ឋាគារ Imperial Garden Hotel ក្នុង​រាជធានី​ភ្នំពេញ កាល​ពី​ថ្ងៃ​២៦ ឧសភា ២០១០។
សិក្ខាសាលា​ស្ដីពី ហិរញ្ញវត្ថុ​គណបក្ស​នយោបាយ​ពេល​ឃោសនា​បោះឆ្នោត នៅ​សណ្ឋាគារ Imperial Garden Hotel ក្នុង​រាជធានី​ភ្នំពេញ កាល​ពី​ថ្ងៃ​២៦ ឧសភា ២០១០។
RFA/Tin Zakariya

ការ​លើក​ឡើង​ដូច្នេះ នៅ​ក្នុង​សិក្ខាសាលា​មួយ​ស្ដីពី ហិរញ្ញវត្ថុ​គណបក្ស​នយោបាយ​ពេល​ឃោសនា​បោះឆ្នោត នៅ​សណ្ឋាគារ Imperial Garden Hotel រាជធានី​ភ្នំពេញ នៅ​ថ្ងៃ​ទី​២៦ ខែ​ឧសភា ឆ្នាំ​២០១០ ដែល​បាន​រៀបចំ​ដោយ​គណៈកម្មាធិការ​ដើម្បី​ការ​បោះ​ឆ្នោត​ដោយ​សេរី និង​យុត្តិធម៌ នៅ​កម្ពុជា (Comfrel)។

តំណាង​រាស្ត្រ​គណបក្ស សម រង្ស៊ី លោក សុន ឆ័យ បាន​មាន​ប្រសាសន៍​ថា គណបក្ស​ធំ ឬ​គណបក្ស​កាន់​អំណាច មាន​ឧកញ៉ា ឬ​អ្នក​ជំនួញ​បាន​ផ្ដល់​អំណោយ​នៅ​ពេល​ឃោសនា​បោះ​ឆ្នោត ដែល​គណបក្ស​នេះ​អាច​យក​ជំនួយ​ទាំង​នោះ​ទៅ​ប្រើប្រាស់​គ្មាន​ការ​គ្រប់គ្រង​នោះ គឺ​អាច​មាន​ករណី​ខ្លះ​ឈាន​ទៅ​ដល់​ការ​ទិញ​ដូរ​សន្លឹក​ឆ្នោត។

លោក សុន ឆ័យ បាន​បញ្ជាក់​ថា ៖ «ដែល​យើង​មាន​បញ្ហា កំពុង​តែ​រៀប​រយ​ពង្រឹង​ស្ថាប័ន​ជាតិ​នេះ គឺ​ការ​ជ្រៀត​ចូល​នូវ​ឥទ្ធិពល​នៃ​កម្លាំង​ក្រុម​អ្នក​ធ្វើ​ជំនួញ ឬ​ក៏​ក្រុម​បទល្មើស បើ​សិន​ជា​គណបក្ស​ពុំ​មាន​ការ​គ្រប់គ្រង​ទេ គឺ​គេ​ទិញ​មនុស្ស​ឲ្យ​ចូល​ទៅ​ក្នុង​នយោបាយ​តែម្ដង ដើម្បី​បម្រើ​សកម្មភាព​ឧក្រិដ្ឋកម្ម​របស់​គេ»

មន្ត្រី​ជាន់​ខ្ពស់​នៃ​គណបក្ស​ប្រជាជន​កម្ពុជា លោក ជាម យៀប បាន​មាន​ប្រសាសន៍​ថា គណបក្ស​ប្រជាជន​កម្ពុជា​មាន​ប្រភព​ចំណូល​ថវិកា​ច្រើន ដោយ​លោក​អះអាង​ថា សមាជិក​គណបក្ស​នេះ​មាន​ជាង ៥​លាន​នាក់ ដែល​សមាជិក​មួយ​ចំនួន​ជា​ឧកញ៉ា ហើយ​គ្រប់​សមាជិក​ទាំង​អស់​បាន​បង់​ថវិកា​ចូល​បក្ស​សម្រាប់​ផ្គត់ផ្គង់​ពេល​ឃោសនា​បោះ​ឆ្នោត។

លោក ជាម យៀប បាន​អះអាង​ថា ៖ «គណបក្ស​ប្រជាជន​កម្ពុជា​បាន​កសាង​នូវ​ឧកញ៉ា​រាប់​ភ្លេច ក្រុមហ៊ុន​មួយ​គំនរ ដល់​អ៊ីចឹង​ក្រុមហ៊ុន​ស្អី​ៗ​ហ្នឹង សប្បុរស​ជន​ហ្នឹង​គេ​ជួយ​ដល់​គណបក្ស​ហ្នឹង! មាន​ចំណាយ​វា​លើស​លុប​ជាង​គណបក្ស​ដទៃ!»

តំណាង​រាស្ត្រ​គណបក្ស​សិទ្ធិ​មនុស្ស លោក យ៉ែម បុញ្ញាឫទិ្ធ បាន​រិះគន់​ទៅ​លើ​ក្រុម​ឧកញ៉ា ដែល​ជួយ​គណបក្ស​កាន់​អំណាច​នៅ​ពេល​ឃោសនា​បោះ​ឆ្នោត​នោះ ថា​ជា​ការ​ទាញ​យក​ប្រយោជន៍​ផ្ទាល់​ខ្លួន តាម​រយៈ​រដ្ឋាភិបាល​បាន​ផ្ដល់​ដី​សម្បទាន​សេដ្ឋកិច្ច ដែល​កំពុង​តែ​ធ្វើ​បាប​ប្រជា​ពលរដ្ឋ​នៅ​តាម​តំបន់​មួយ​ចំនួន​បច្ចុប្បន្ន។

លោក យ៉ែម បុញ្ញាឫទិ្ធ បាន​មាន​ប្រសាសន៍​ថា ៖ «ឥឡូវ​ឧកញ៉ា​រាប់​ភ្លេច​មែន ដាក់​លុយ​ទៅ​បាន​ហើយ​ឧកញ៉ា! បើ​សិន​យើង​ជា​អ្នក​រកស៊ី គេ​ដាក់​ទៅ ១០​ម៉ឺន គេ​ចង់​បាន​មក​វិញ ២០​ម៉ឺន ហើយ​ដើម្បី​បាន​លុយ​ត្រឡប់​មក​វិញ ត្រូវការ​អី​ខ្លះ? ត្រូវការ​ដី​សម្បទាន ត្រូវការ​សុំ​នេះ​សុំ​នោះ សុំ​នាំ​ចូល​ផ្ដាច់​មុខ ហ្នឹង​ហើយ​ដែល​ជា​បញ្ហា​មួយ​ដែល​យើង​សង្កេត​ឃើញ! សង្គម​យើង​វា​មាន​បញ្ហា​ច្រើន!»

ប្រធាន​សមាគម​សិទ្ធិ​មនុស្ស​អាដហុក និង​ជា​ប្រធាន​គណៈកម្មាធិការ​នាយក​ខុមហ្រ្វែល លោក ធន សារាយ បាន​បញ្ជាក់​ថា កាល​ណា​មាន​ច្បាប់​ស្ដីពី​ការ​គ្រប់គ្រង​ថវិកា​គណបក្ស​នយោបាយ​ពេល​ឃោសនា​បោះ​ឆ្នោត នោះ​វា​នឹង​មាន​សមធម៌​ពេល​បោះ​ឆ្នោត។

អគ្គលេខាធិការ​រង​នៃ​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប.) លោក សុកុលៈ ទីបោ បាន​គាំទ្រ​ចំពោះ​ការ​ជំរុញ​រដ្ឋាភិបាល​ឲ្យ​បង្កើត​ច្បាប់ គ្រប់គ្រង​ថវិកា​គណបក្ស​នយោបាយ​ពេល​ឃោសនា​បោះ​ឆ្នោត ដែល​សង្គម​កម្ពុជា​ចង់​បាន បន្ទាប់​ពី​ច្បាប់​ប្រឆាំង​អំពើ​ពុក​រលួយ ដែល​រដ្ឋសភា​បាន​អនុម័ត​កាល​ពី​ពេល​ថ្មី​ៗ​នេះ។

មន្ត្រី​អង្គការ​សង្គម​ស៊ីវិល​បាន​បញ្ជាក់​ទៀត​ថា ក្នុង​ពេល​បោះ​ឆ្នោត​ម្ដង​ៗ​នៅ​កម្ពុជា គេ​សង្កេត​ឃើញ​ថា តែងតែ​មាន​បញ្ហា​កើត​ឡើង​នៅ​ក្នុង​អំឡុង​ពេល​ឃោសនា​រក​សំឡេង​ឆ្នោត ដោយ​មាន​ការ​ប្ដឹង​ចោទ​ប្រកាន់​រវាង​គណបក្ស​នយោបាយ អំពី​ការ​ទិញ​ទឹក​ចិត្ត​តាម​រយៈ​ការ​ផ្ដល់​អំណោយ ការ​ទិញ​សកម្មជន​នយោបាយ​ពី​គណបក្ស​មួយ​ទៅ​គណបក្ស​មួយ ជាដើម៕

ព័ត៌មាន (0)
Share
គេហទំព័រ​ទាំងមូល